إنتي حبك يا حبيبتي ثورة ثورة.. لا رجوع إنتفاضة شوق وجوع إنما الأزمة ف غباوتك المسيلة للدموع @ يوم ما شفتِك جه ف بالي أدي صوت قلبي لفخامتِك بس تاني مرة شفتك فجأه يعني.. إذ.. بدا لي: حبنا يبقى انتقالي @ في المظاهرة المليونية رمش عين ف الزحمة جابني شدني للأمن.. سابني! حوشي عني عنيكي ديّه! مش عيون.. دول بلطجية!
@ حبنا كان قصة عرجا يعني بتسايري واساير فجأة ولقيتنا ف يناير زي قوس ماشي ف كمنجه شبر شبر وزنقة زنقه @ يا حبيبتي ليه الحراك مفتقد ع الساحة بيننا داحنا من يوم ما اتقابلنا عند أهيف إحتكاك فيه قرار فض اشتباك @ كل مرة مِطَاطَيّه وانحناء للدكتاتوره والنهارده جت فاتوره فيها اشيل وحدي القضيه واتضرب بالمَطّاطيه؟!
@ إن للباطل جوله كان هتافك ف المظاهره خِدْعِتِك دلوقتي ظاهره كنتي واخدانا مقاوله.. ثورجية وأمن دوله! @ إنتي ف التحرير، معاندة وانا.. عب منعم رياض بس ما يصلش التضاد.. أمّا اقوللك يد واحدة.. تحدفيني بطوبة جامدة! @ كنت اظن انه.. يزول بس خَدني صدة ردة وهدني بثورة مضادة باختصار.. عايز أقول: باقي من حبِّك.. فلول. @ شيلي فيشة التليفون حطمي سجن النظام ادخلي ف حضني اعتصام اعلني جمعة جنون نزّلي الجيش ف الصالون!