سجل يا تاريخ أسامينا أحمد وتهاني ومينا وصلاح وجيهان وإيمان وحسام وريهام وأمينة يا ما شالوا وحطوا علينا وإحنا معصوبه عنينا والظلم يزيد حوالينا ومش لاقين يا وطن تفسير فيه بطاله بقت تهرينا ومفيش فتافيت تكفينا وجِهات عُليا بتدينا أئلام حيّه مع التبذير عشنا ف وطن مدبوح ملهوش ولا باب مفتوح وكيان مهزوم مجروح وكل طريق نمشيه بتحذير قايمين نايمين ف فساد ياما هد بإيده ولاد والنار دي سبيل يتقاد للي حيكشف ستر كبير مبقاش ف الوسط عداله واللي يقول عيشتي زباله واللي يقوم يوصف حاله يلقي سجون سابقه التحضير فيه بيوت بالذور شبعانه وبيوت بتبات سقعانه وعيال بتبات عريانه وغيرها بيكبر بالتذوير فقر الناس الغلبانه مع ناس دايره وشقيانه ووشوش باهته ودبلانه وغيرها بيصرف ف المواخير وعشان ف الدولة كبار أخدت مطالبنا هزار وشافوها لعب صغار قامت ثورة ف التحرير و الضرب صدر بقرار وعلينا فتحوا النار وكأن بلدنا ف تار غامض سابق له التدبير وإشهد بينا يا تاريخ إننا قمنا في تاريخ وبقينا كما الصواريخ مطلوقه تنده بالتغيير كلنا جنبك يا بلادي وعشانك جينا ننادي علي حلم ماهواش عادي بلون الدم مش التباشير وعشان ما نعيش أحرار وولادنا ف يوم تختار حنقدم روحنا شعار ونصبح شُهداء التحرير