العبقرية والدراما والبسلة والجزر خالد ممكن اسألك سؤال.. إيه رأيك في فكرة إن العباقرة والعظماء دايماً بيبقي ورا نجاحاتهم مأساة كبيرة أوي أو فقر أو عدم اهتمام بيهم أو عقدة معينة طه حسين مثلاً وهيلين كيلر حتي أوباما كان بيعاني في طفولته، أنا لما بصيت للناس دي كلها عشان نفسي أكون حاجة كبيرة أوي زيهم في يوم من الأيام بصيت ل 18 سنة إللي عشتهم لحد دلوقتي الحمد لله أسرة مرتاحة مادياً واهتمام كبير أوي بيا لدرجة إنه ساعات بيزهقني جو عاطفي مستقر ومش لاقية مشاكل كبيرة حصلتلي.. طبعاً انت هتقول الإنسان دا مبيعجبهوش العجب أنا باحمد ربنا أوي علي اللي أنا فيه بس نفسي ميكونش دا دلع ملوش لازمة.. مش عارفة بقي أنا حسبتها غلط؟.. يعني ممكن يكون فيه ناس تانية نجحت وكانوا مرتاحين في دنيتهم من غير ما يكونوا فقرا أو فاقدين بصرهم ومش بيذاكروا علي نور الشمعة.. هوا فيه ناس كدا ولا انا مفيش أمل فيا؟؟؟ سوبر مرمر - إزيك يا «سوبر مرمر» يا متسائلة.. أنا معاكي في إن معظم العباقرة والعظماء عندهم دراما عالية في قصص حياتهم هي اللي صنعت منهم عباقرة وعظماء.. إنما مش معاكي في إن الدراما دي لازم تكون فقر أو مرض أو مشاكل.. الدراما يا «مرمر» ممكن تكون ثراء فاحش مع مرض غريب الفلوس دي ماتعالجهوش.. وممكن تبقي فلوس كتير وصحة زي الفل بس غياب كامل للحب.. وممكن تبقي المشكلة اللي انتي نفسك فيها بس مش واخدة بالك منها.. الاهتمام الكبير والمبالغ فيه من الأهل واللي ساعات بيزهقك.. دي دراما برضه يا عسولة.. بس تظل كل الدراما دي أشبه «بالجزر».. والأهم منها هي «البسلة».. أو بمعني أصح الموهبة.. دراما مع موهبة.. يعني حلة بسلة بالجزر.. إذن.. فيه أمل يا «سوبر مرمر» يا متسائلة! شفرة مجتمع دافنشي كل سنة وأنت طيب يا كساب باشا.. إنك يبقي أدامك أقل من شهرين وتخلص جيش وعايش في مجتمع مقفول كل حياته عبارة عن مهنة واحدة فقط لا غير.. وطول عمرك مستني الفرصة إنك تحطم الجبال وتطير أعلي من الطيارات النفاثة.. وتكتشف إنك أدام لغز أصعب من شفرة دافنشي.. هو إن أي حاجة بنفكر فيها مش هتنفع أبداً في المجتمع اللي انت عايش فيه ده.. والمطلوب منك.. إنك بتدور علي الصفر اللي تبدأ منه.. مستعد آه بس مستصعبها أوي آجي منين وأروح علي فين ياكبير... نورني. أحمد الجلاد - وإنت طيب ياعم «أحمد».. أنا معاك في إن المجتمع عَوَء وما بيشجعش الموهوبين بجد واللي عايزين يطيروا أعلي من الطائرات النفاثة.. ومعاك في إن حل المشكلة دي أصعب من لغز شفرة دافنشي.. إنما مين اللي قالك إن محاولة حل لغز شفرة دافنشي ما فيهوش متعة.. أمال «توم هانكس» في فيلم «شفرة دافنشي» عمل إيه؟! ما هو حل اللغز يامعلم.. حَلُّه إزاي؟! بالدقة والملاحظة وترتيب الأفكار.. إتخيل إنك «توم هانكس».. وحياتك هي اللوحة.. ركز في اللوحة جامد.. حتحل اللغز.. وإبقي طمني! البنات بنات..مش إخواتك يا شندي باشا.. صباحو خلاط.. بص ياعم أخوك الصغير كان طول عمره ملهوش في البنات لحد لما خلصت الجامعة وكان كل اللي عرفتهم بعتبرهم إخواتي المشكلة الصغيرة إني مش عارف أثبت علي بنت من كترهم دلوقتي في حياتي وكل واحدة بشوف إنها هي دي.. (نظرية برضه) وآخرهم بنت عرفتها من منتدي ومن سوريا وكمان (تقدر تقول بحب علي نفسي) مناسبة ليا مش عارف أختار مين فيهم طالعة في دماغي إني اتقدملها وبتاع شوف بأه وصلت لحد فين وقد إيه أنا خربان.. المشكلة الكبيرة بأه إني مع كل ده مستكتر الحب علي نفسي.. اشجيني وقولي أعمل إيه ياعمنا. شندي - بص ياعم «شندي».. المشكلة الرئيسية عندك مش في الاختيار من بين البنات اللي انت بتعتبرهم كلهم زي إخواتك.. لأ.. المشكلة اللي بجد في إنك بتعتبرهم زي إخواتك.. يعني إيه زي إخواتك؟! إخواتك همه إخواتك.. وصاحباتك هُمَّه صاحباتك.. وحبيباتك همه حبيباتك.. مشكلتك يا «شندي» إنك ما بتسميش الأشياء بمسمياتها الحقيقية.. هي دي المشكلة يا معلم.. لازم تصارح نفسك يا شندي إنك ما حبيتش.. وإنك ما تعرفش حاجة لسه عن الحب.. ولازم تعرف يا «شندي» إن ليلة الحب علي المنتديات دي مجرد لعب وقتل لوقت الفراغ.. مش أكتر.. إنت محتاج تصارح نفسك يا شندي. ما رميتلهاش الدبلة ليه يا مندو؟! كان نفسي أول مرة أبعتلك فيها أبقي في مود ضرب شمساوي لذيذ باختصار يا ريس أنا إنضربت بحبها من تانية إلي ستة كلية وخطبتها من سنة! شاب قروي مهما كان شكلي وأسلوبي ميقولش كده! وبنت مجنونة سامحتها علي جنونها اللي قبلي! مع كل التنفيض لشخصيتك اللي انا عارفاها يا محمد أنا رايحة اقضي النيو بيير في شرم راجعة الفجر إن شاء الله! عيطت! بتعيط ليه؟ عيني اطرفت! مالك بس؟ وفي نفسي قولت الساعة 12 هقلع الدبلة! متقولي ياعم خالد أنا غلطت في إيه؟ mando - أنت بتفكر في إيه ياعم «ماندو»؟! وبتعيط ليه؟! وبتسأل في إيه؟! كان المفروض مع نطقها لحرف «الميم» الأخراني في كلمة «شرم».. تكون الدبلة علي الأرض (مش حتي في إيدها).. وتضحك جامد.. وتبصلها من فوق لتحت.. وتسيبها وتمشي.. (مش تعيط).. ولو فضلت تكلمك طول العمر.. ماتردش علي تليفوناتها.. وتعتبرها ما اتولدتش أصلاً.. عرفت بقي أنت غلطت في إيه يا «ماندو»! الجديان والأبيض والأسود أنا اسمي هاجر ومن مواليد برج الجدي وعيد ميلادي في شهر واحد.. في المقالة اللي فاتت قلت إن مواليد الجدي يا أبيض يا أسود ممكن تكون دي الحقيقة وممكن تكون لأ.. بس أنا رأيي أن أحسن حاجة الاعتدال ولاأبيض ولا أسود فما أحلي الأمور الوسط بس أحياناً الاختيار مش بيدينا ولكن ليس باليد حيلة وربنا يستر.. شكراً.. أختك الصغيرة هاجر بس مش الصغيرة أوي يعني peace هاجر - إزيك يا «هاجر» ياللي مانتيش صغيرة أوي.. الأول كل سنة وانتي طيبة بمناسبة عيد ميلادك اللي في يناير.. وبالنسبة لحكاية الأبيض والأسود عند الجديان أنا كان قصدي يا «هاجر» إن الجديان لما بيحبوا بيحبوا لآخر نقطة في دمهم.. بس أول ما يحسوا إنه فيه عَوَء أو إن اللي بيحبوه ما يستاهلش.. في ثانية بيسقطوه من حساباتهم تماماً.. دا كان قصدي.. إنهم بمعني أصح بيستحملوا.. بيستحملوا.. بيستحملوا.. بس ساعة ما بيقفشوا.. ما أقولكيش يا هاجر.. أنتي «جدي».. وعارفة!
