والله العظيم .. وانا صادق في يميني .. اني بكيت غصب عني وانا بتفرج ع التليفزيون الصبح ومصر بلدي منّورة بضيوفها وأهلها .. ولحد اللحظة دي وانا شايف السيسي بيستقبل ضيوف مصر .. من زمان اوي مشفتش المنظر ده .. البلد فرحانة ومنوّرة كأننا بجد في يوم العيد .. صحيح حصل ان مصر استضافت قمم عربية كتير وجانا ملوك وأمراء ورؤساء كتير .. لكن شكلهم النهارده مختلف .. حلوين اوي وفرحانين اوي وسعداء اوي ومتشرفين اوي انهم في مصرعندنا .. وفي حضننا. طيب اقولكم حاجة غريبة حصلت النهارده وانا جي الجورنال .. كان فيه لجنة مرور في الشارع .. وانا والحمد لله سليم وماشي سليم .. بس بيني وبينكم محبش اللجان عشان العطلة .. ومش دايما بشوف الوشوش مبتسمة .. بل احيانا متجهمة .. لكن النهارده ملازم اول هنا في الكويت وقّفني وقبل مايطلب مني الرخصة ولا استمارة العربية ، لقيته بيقوللي مبروك عليكم ، وانشالله الفرحة تدوم على طول .. فقلت له : مبروك علينا السيسي ؟ .. فرد ردا أبكاني وقال : لا .. مبروك عليكم مصر .. رجعت تاني ليكم .. ومعاكم راجل كلنا بنحبه عن جد .. خلوا بالكم من مصر .. أمنا كلنا! هو قال كده .. وانا دموعي نزلت .. ونزلت م العربية وحضنته ، فلاحظ دموعي فضحك وقاللي : كلكم كده يامصريين .. دموعكم قريبة .. الله يحفظ لكم مصر .. ام الدنيا الغالية .. وبعدين وانا بشكره على مشاعره الطيبة ناولته الرخصة فضحك وقال من غير مايبص فيها : طريق السلامة .. وسلم لي على مصر. دخلت مكتبي في الجريدة .. وقعدت اتفرج في التليفزيون .. والسيسي ماشي ماشية عسكرية " واخد عليها " وبعدين الدنيا كلها بتبارك له وتوصّيه على مصر .. مصر غالية علينا اوي .. حطها في عينك ياسيسي. انا مسمعتش طبعا .. بس على الاقل تلاتة او اربعة قالوا كده .. خصوصا امراء الدول العربية .. قالها قبل كده امير الكويت ليحيى الجمل .. خلوا بالكم من أمنا .. لو تعرفون يعني ايه مصر عندنا .. لعرفتم قيمتها وانتوا ولادها. الناس كلها النهارده مش بتحتفل بالسيسي .. انما بتحتفل بمصر .. وهى راجعة تاني راسها في السما وحضنها يساع الكل .. تشيل فوق راسها اللي بيحبوها .. ومتنساش ابدا اللي جرحوها واهانوها. واحد مصري وزميلي سألني سؤال غريب : الاحتفال ده اتكلف كام؟ .. فقلت له : معرفش .. فرد بتهكم : اتكلف ملايين يامحترم .. مش الغلابة كانوا اولى بالفلوس دي؟ قلت له : فاكر زمان – وانا وانت من بيئات متوسطة – لما نكون عازمين ناس جايين يهنونا في فرحنا .. ممكن جدا نستلف عشان نقوم بالواجب .. كانت امي تاخد طقم الصيني من جارتنا .. وجارتنا التانية تعمل صينية بسبوسة وتجيبها لنا .. والبواب يمسح العمارة ويخليها تبرق من النضافة عشان اللي جايين عندنا يعرفوا أد ايه مجيتهم دي غالية علينا وليها تمن .. يوم استثنائي يا اخي عشان مصر .. يتصرف اللي يتصرف .. العالم كله النهارده بيتفرج عليك .. وكل وكالات وفضائيات الدنيا بتنقل ع الهوا .. عايزهم يشوفوا مصر شكلها ايه ؟ .. مش لازم تبقى مزهزهة ونورها يغطي ع الكل .. ولا انت ميهمكش منظر بلدك لمّا تلبس احسن ماعندها وهى بتستقبل ضيوفها؟ قام قاللي : هو انت شايفها كده؟ قلت له : انا مش شايفها غير كده .. وشايف كلامك ده خايب ومالوش لازمة .. وكمان منتش فاهم احنا كسبنا ايه النهارده. فرد : طيب نوّرني انت يافهّيم ياعاقل ياكبير. فقلت متجاهلا تهكمه : انت عارف يعني ايه ملوك وامراء ورؤساء العالم عندك النهارده في مصر .. يعني الكل بيعترف بيك وبثورتك وخريطة الطريق بتاعتك .. يعني صفعة شديدة لأمريكا وبعض دول اوربا اللي لسه بتقول على اللي حصل انقلاب .. النهارده حُسم الامر باعتراف دولي عربي وعالمي. صاحبنا " بلّم " .. وقال لي : وده يستاهل الملايين اللي اتصرفت؟ قلت ويستاهل اكتر .. بس عند اللي بيفهم .. فرد غاضبا : قصدك اني حمار فقلت : لا .. خالص .. انا قصدي اللي ميفرحش النهارده بمصر يبقى مش مصري .. افرح يا اخي .. بقالنا كتير اوي مفرحناش!!