عيد الأم مناسبة بنستناها من السنة للسنة.. مع إننا المفروض نحتفل بيه كل يوم.. بس ممكن نعبر عن حبنا لأمهاتنا يوم واحد في السنة يعوضها عن اللي بتشوفه مننا كل يوم.. ويوم عيد الأم بيتميز بهديته اللي بنقعد نفكر فيها كتير وكتير.. علشان كده إحنا النهاردة مش هنقترح الهدية.. بس هنقولكم على الحاجات اللي لازم نراعيها وإحنا بنشتري الهدية.. القيمة المعنوية للهدية: لازم نعرف إن الأم مش بتبص للهدية من منظور مادي.. يعني مش بتفكر في الهدية دي بكام وكلفتك قد إيه بقدر ما بتفرح إنك فكرت فيها وافتكرتها حتى لو بهدية بسيطة. طبيعة الأم: أكيد كل أم زوقها بيختلف عن غيرها.. وفي حاجات بتحبها وحاجات لاء.. فمثلا الأم الرومانسية هتفرح أوي ببوكيه ورد أو برفيوم.. في حين بقى أن الأم العملية هتفضل أن الهدية تكون كتاب أو رواية في مجال هي مهتمة بيه.. أما ست البيت اللي بتحب الطبخ فممكن تكون الهدية آلة معينة تساعدها في دا زي الكّبة أو خلاط جديد. احتياجات الأم: لازم نراعي أوي وإحنا بنختار الهدية أنها تكون مفيدة لأمهاتنا، فلازم ندور عن الحاجة اللي نقصاها واللي تكون هي محتاجاها.. مش مجرد أننا نقدم لها هدية وخلاص.. يعني مثلا لو هي دايما بتشتكي من الموبايل بتاعها فممكن نجيب لها واحد جديد، ولو عندها فممكن نقدم لها Cover ليه، ولو بقالها فترة نفسها في حاجة معينة حتى لو بسيطة ممكن نقدمها لها في اليوم ده. هدية الولد مختلفة عن هدية البنت: مشتري الهدية هو اللي بيتحكم فيها بدرجة كبيرة أوي، فمثلا هنلاقي أن البنات غالبا بيفضلوا يشتروا الملابس أو الاكسسورات لأمهاتهم لأن عندهم خبرة في ده ومش هيتعبوا كتير.. أما الولد فهنلاقي أنه بيفضل يشتري مثلا برفيوم أو ورد. تكلفة الهدية: وإحنا بنختار الهدية لازم نعرف أن في حاجة تانية بتتحكم في اختيارتنا غير طبيعة الأم وإحتياجاتها.. وهي طبعا "الفلوس"، ولازم نعرف أن "الهدية مش بتمنها.. الهدية بقيمتها"، لكن ده مايمعنش أن لو معاك فلوس فلازم تجيب هدية قيّمة، زي مثلا أسورة دهب، أو تابلت، أما لو مش معاك فلوس فممكن تجيب هدية رمزية، ولازم تبقى عارف أن ده مش بيقلل من قيمة هديتك لأن برده أمك هتفرح إنك افتكرتها. الجانب الأنثوي: زي ما إحنا عارفين أن الأم قبل ما تكون أم كانت بنت بتحب تحس دايما إنها طفلة وإنها ماكبرتش في السن، وإنها بتحب تهتم بمظهرها، حتى لو هي مش موضّحة ده، فممكن نقدم لها في عيد الأم ميك أب أو اكسسوارات جنب الهدية، لأن ده هيحسسها أن سنها لسة صغير وأنها ممكن تستخدم الحاجات دي.. حتى لو ماعملتش بيها حاجة. شكل الهدية وطريقة تقديمها: لازم نهتم أوي بشكل الهدية.. لأن الهدية حتى لو حلوة جدا وقدمناها في شنطة عادية مثلا ده هيقلل منها أوي، لكن لو الهدية بسيطة وشكلها لطيف ومتغلفة كويس وفي شنطة هدايا ومعاها وردة وكارت مثلا دي هتديها معنى أجمل بكتير أوي. وكمان ماتنساش وأنت بتقدم الهدية تقول لمامتك كلام حلو، زي مثلا "ربنا يخليكي ليا"، "أنتي أجمل أم في الدنيا"، مش تديها الهدية وخلاص.. وبكده يكون خلص موضوعنا أتمنى يكون عجبكم وكل سنة وكلنا طيبين..
