ايه رأيك في خطاب السيسي امبارح؟ .. ع الصبح كده في الجرنال قابلني زميل لي وهو اخواني قلبا وقالبا ويكره السيسي كأنه جوز امه .. وراح سألني السؤال ده .. فقلت له : خطاب متّزن ومحذّر .. وبيقول لنا اللي أوله شرط أخره نور .. فراح سألني : سمعته وهو بيقول انه قال لمرسي يطرح نفسه في استفتاء .. لو الشعب اختاره تاني .. يفضل والكل يسكت .. واذا الشعب رفضه يرحل والكل يسكت ؟ .. قلت له : ايوه سمعته .. بس ياريت كان مرسي سمع كلامه .. قام قاللي : كويس اوي .. افرض بقى مرسي استجاب لكلام السيسي ونجح كمان مرة في الاستفتاء .. ازاى ياسيسي تسيب واحد خاين وعميل وكان حيبيع البلد حسب كلامكم ، يبقى ، رئيس للمرة التانية ؟!!
.. قلت له : سؤال وجيه .. وقبل ان أكمل قام ضحك ضحكة صفرا من ضحكات مرسي واخوانه كأنه زنقني في " خانة اليك " .. فابتسمت بهدوء وقلت : اصبر عليا شوية ، لسه مكملتش كلامي .. بقولك سؤال وجيه .. بس لامؤاخذة غبي .. فانقلبت ضحكته الصفرا الى تكشيرة سودا وقاللي : طيب يابو الفهيم انت .. ازاى يبقى السؤال وجيه وفي نفس الوقت غبي ؟ ..
قلت له : يعني ممكن نسأل صحيح ازاى نسيب رئيس ابن ستين في سبعين وفيه كل العبر يستمر في حكم البلد .. بس الغباء في السؤال : وهل السيسي كان يملك كوزير دفاع انه يشيل مرسي وهو رئيس جمهورية والقائد الأعلى للقوات المسلحة ؟ .. رد : يا سلام .. ماهو شاله وخطفه وحدد اقامته .. ودلوقتي بيتحاكم.. قلت له : ده حصل بعد 33 مليون مصري ما نزلوا وملوا ميادين مصر ..
يعني بقى فيه شرعية للإجراءات اللي مزّعله حضرتك .. وبعدين .. لو كان السيسي انقلب على مرسي من غير ثورة شعبية .. كانت دول العالم وقفت ضده على اعتبار ان جنابه – اقصد مرسي – نجح بصناديق الانتخابات .. اذا كانت الدنيا قامت ولم تقعد وقالوا عن اللي حصل انقلاب رغم جموع الشعب المصري والمشهد اللي " يخزأ " العين في كل ميادين مصر .. اشحال بقى لو كان انقلاب حقيقي وصريح من الجيش ..؟
قام قاللي : بس انت ماجاوبتش ع السؤال .. ازاى كان حيسيبه يحكم تاني اذا نجح وهو عارف انه خاين وجاسوس وبيتخابر مع دول اجنبية؟ .. قمت رديت : طيب وهو سابه .. ماهو " عكشه " وجره من قفاه ورماه وحدّد إقامته .. وبعدين عايز اقولك حاجة .. حركة " تمرد " لما بدأت كانت بتنادي بانتخابات رئاسية مبكرة .. صح ولا غلط ؟ .. صح طبعا .. انما كان ممكن ده يحصل ، لو الافندي بتاعكم قرا المشهد كويس وقبل ما الناس تنزل الشارع كان وافق على الانتخابات المبكرة ..
وكان حيسقط وياخد على قفاه لما يقول يابس .. انما فضل مطنش واطرش واعمي .. وساب الناس تنزل .. والشوارع تتملي عن اخرها .. هنا بقى الأمر يختلف .. انا طلبت منك بذوق وشياكة تعمل اللي انا عايزه ونشوف رأى الشارع ايه .. قمت انت عاندت وركبت دماغك .. وسيبتني انزل .. عشان مستهين بيا ومش متصور – لأنك غبي – اني ممكن انسفك لو حبيت .. ومادام سيبتني انزل ومسمعتش الكلام من الأول .. يبقى مفيش انتخابات رئاسية مبكرة بروح امك .. فيه خلع وعزل وقلة قيمة ، انت اللي اخترتها لنفسك مش حد تاني.
وفي الحالة دي بقى نقدر نتحاسب صح .. خلاص لا بقيت رئيس ولا قائد أعلى للقوات المسلحة .. والشعب خلعك والجيش وقف مع الشعب لأنه عارف كل الوساخات اللي كانت بتحصل .. بس عايز غطاء شرعي للقومة عليك وتأديبك.
قام رد وكأنه مسك عليا مسكة: حلو اوي .. طيب ليه متقولش ان حركة تمرد دي .. كانت بالاتفاق مع جهة ما .. عشان اللي حصل يحصل؟
قلت : اهو ده سؤال وجيه بجد ومش غبي .. لكن .. تقصد ايه بجهة ما .. جهة داخلية ولا خارجية؟
رد : خارجية ايه .. داخلية طبعا .. وبالتحديد الجيش .. انزلوا انتوا بس وانا وراكم .؟
قلت : طيب وايه يعني .. ما اللواء صدقي صبحي رئيس الأركان قالها في ابو ظبي وع الهوا .. لو الشعب المصري نزل وعايزنا .. في اقل من الثانية حنكون في الشارع .. يعني مجبتش التايهة انت .. باينة للأعمى.
رد : يبقى انقلاب مدبر ومتخطط له بعناية.
قلت : بصراحة .. هو انقلاب .. بس لأول مرة في تاريخ العالم .. شعب ينقلب على النظام .. الشعب ده بقى .. الناس العاديين .. والشرطة والجيش والإعلام .. والقضاء .. ده انقلاب المفروض يدرسوه في الكتب للعيال في المدارس.
قال : اديك قلتها .. كل مؤسسات الدولة ضد النظام بتاع مرسي .. كنت عايزه يحكم ازاى .. وكله بيلعب ضدي؟
قلت : لانك غبي .. مخلتش ليك صاحب ينفعك وقت الشدة .. غير اهلك وعشيرتك .. وبعدين اسأل نفسك السؤال نفسه .. احكم ازاى شعب بكل طوائفه مش قابلة تبص في وشي .. هو انا لما يكون ضدي الف واحد مثلا .. وكلهم متفقين على حاجة واحدة وهى ان انا زفت .. اقوم اغالط نفسي واقول هما غلطانين وانا " حتة سكرة " .. ده اسمه تخلف عقلي وقلة ادراك وجلد تخين لا بيحس .. وعنين " عمشة " مش بتشوف.
قال : وحترجعوا تاني للحكم العسكري؟
قلت : وكان سي مرسي الرئيس المدني عمل لنا ايه؟
رد : وحتعملوا ايه لو السيسي بقى فرعون ؟
قلت : زي ماعملنا مع مبارك ومرسي ..
قال : انت بتحلم
قلت : لا .. مش انا اللي بحلم .. انت اللي لسه نايم من 30 يونيو .. وشكلك كده مش ناوي تصحى وتغسل وشك .. وتنزل الشارع وتشوف .. الدنيا اتغيرت ولا لسه زي ماهى؟!!