.. فأما آخر أخبار الأستاذ سيد جارنا فهو أنشغاله هذه الأيام لشوشته وإنهماكه التام في إنهاء الإجراءات والترتيبات اللازمة لإطلاق مشروع «جائزة كبري» تحمل اسمه وتخلد سيرته العطرة التي كتبت فعلا بحروف من نور المصابيح الموفرة للطاقة في سجل تاريخ عمارتنا وشارعنا والشوارع المحيطة !! وحسب سيد جارنا نفسه فأن "جائزة سيد" الكبري هذه سوف يمنحها (يبدو أنه منحها فعلا) لمن يراهم كتابا وأعلاميون ومبدعون بارزون في كل التلفزيونات والمجالات ، من السياسة والفن والأدب إلي شئون مياه النيل والمجاري ، فضلا عن الكورة والملاعب و.."وليد" أبنه طبعا والسيدة أمه (أم وليد). ويعتقد الأستاذ سيد أن لا مشكلة البتة في تدبير التمويل المالي الكافي وزيادة لتغطية نفقات مشروع جائزته الطموح بعدما وفقه المولي تعالي وعثر علي زبون مغفل أشتري بالفعل سيارته ال 128 الهلكانة. هذا هو خلاصة ما فهمته من جاري العزيز عندما أقتحم أمس الأول سكينتي وهدوء سري وهاتفني من محمول البواب أعمالا لمبدأ "الحرب خدعة" وأبلغني أنه سيشرفني بالزيارة في شقتي بعد دقيقة واحدة ، لكنه نكص بوعده وخالف عهده وقفز إلي حضني قبل أن تمر نصف هذه المدة .. وبعد السلامات والتحيات والسؤال عن الصحة والأولاد ، وألف مليون "أزي حضرتك" ، وعدد مماثل من "الحمد لله كويس" ، ثم "أزي مزاجك" .."عال ، نحمد ربنا" ، قعد سيد علي الكنبة وأنا مازلت واقفا شارد الزهن مهيض الجناح ودخل في الموضوع مباشرة دون أن ينسي دعوتي للراحة والقعاد علي أساس أن "البيت بيتي" فلم أشأ إيثارا للسلامة أن أصحح معلوماته وأذكره بإن "البيت بيتك" أتلغي خلاص وأضحي "مصر أنهاردة" ممتازة زي ما أنت شايف كدة. المهم .. دخل سيد في الموضوع بسؤال تمهيدي باغتني به فجأة قائلا : أيه رأي حضرتك في ظاهرة الجوائز المتزايدة والمنتشرة هذه الأيام .. مش سيادتك معايا برضه أنها ظاهرة إيجابية ؟ ولا سيادتك أيه بالضبط ؟ الحقيقة أنا أيه بالضبط ، ومع ذلك ياسيدي الف مبروك .. مبروك علي أيه ؟! يبدو أنك فزت بأحدي هذه الجوائز .. حقيقي ألف مبروك ويجعلها قدم السعد عليك وعلي الأسرة الكريمة .. يا أستاذ (فلان) أنا لم أفز بأية جائزة ، ومش ده الموضوع اللي باكلم...... غريبة .. أنت علي كدة من القلة القليلة المندسة في هذا البلد التي لم تحصل بعد علي جوائز ، ما يؤكد أنها ، جميعا تعاني مثل الدعم من العمي الحيثي بدليل أنها غير قادرة حتي الآن علي الوصول لكل مستحقيها وانت علي رأسهم أكيد يا أستاذ سيد . ربنا يكرمك ويخليهم لك ، كلك زوق وعهد الله ، بس الحقيقة سيادتك لمست بذكاء أهم حيثيات الفكرة اللي أنا جاي أكلمك فيها دلوقتي.. فكرة أيه ؟ عايز ترفع قضية ؟ .. أنا معاك تماما .. لأ لأ .. قضية أيه ؟ المواطن مننا لازم يكون إيجابي ومش كل حاجة يطلب أو يستني الحكومة تعملهاله.. فعلا الحكومة مالهاش أي لزمة في الدنيا أصلا.. بغض النظر .. أنا قصدي زي ماقلت لسيادتك أن موضة الجوائز اللي شغالة حلاوة دلوقتي في البلد ، وبغض النظر .. تاني ..؟! أيوه .. وبغض النظر عن بعض السلبيات فأن هذه الموضة تمثل ظاهرة إيجابية جدا لأنها بتحفز بتحفز ؟! نعم بتحفز المواطنين خصوصا الشباب علي الشعور بالانتماء وبتحسسهم أن مصر مش نسياهم .. أيوه .. رغم مشاغلها وأعباءها العائلية الكتير. لهذا لابد نتعامل مع الموضوع طبقا لنظرية نصف الكوب المملوء اللي أكيد حضرتك عارفها.. أتعرفت عليها ، بس الحقيقة ما استعملتهاش قبل كدة.. أنا بقي استعملتها ، وفكرت وقلت في عقل بالي : يعني لو الواد أبني .. أبني "وليد" ما أنت عارفه .. أيوه عارف "وليد" أبنك اللي أخد شهادة "الدبلوم" بالعافية ، ولعب في الموبيلات شوية مع "تامر" أبن الحاج محمود ، ثم هجرها إلي اللعب في مسلسلات رمضان التي سرعان ما أقلع عنها هي الأخري طامحا أن يكون إعلامي تلفزيوني كبير لكنه للأسف طموح لم يتحقق بسبب تعذر الاتصال بمباحث التموين .. الله يفتح عليك .. أهو "وليد" ده بقي لو خد جايزة من الجوايز اللي رايحة جاية دي ، ح تفرق معاه جامد جدا . طيب ما ترشحه لجائزة "نوبل".. لأ "نوبل" دي سويدي ، أحنا عايزين حاجة مصري عشان الواد يحس أن البلد بتقدره .. وده اللي خلاني آخد قرار بأني أعمل أنا جائزة كبري وأعملها حفلة كبري برضه أوزعها فيها.. توزعها علي "وليد" ؟! "وليد" وأمه اللي ربته وأنشأته وجعلته فخر لمصر كما تري حضرتك .. طيب ، وأم سيادتك فين..؟! أولا أمي الله يرحمها ماتت خلاص ، وثانيا لابد أن أراعي توفير عناصر المصداقية للجائزة بحيث لاتتهم من البداية بأنها جائزة عائلية .. أنت عارف أن كلام الناس كتير وأعداء النجاح أكتر.. عندك حق ، بس كيف وفرت "عناصر المصداقية" ؟ ومن أين لك بتمويل هذه الجائزة وحفلها الكبير؟ بالنسبة لعناصر المصداقية مفيش أي مشكلة خالص البتة ، يعني أنا أقدر أقولك دلوقتي وأحنا قاعدين أسماء ألف واحد علي الأقل من الناس الكبيرة التي لها حيثية في البلد واللي ممكن أحشر الواد "وليد" أبني وأمه وسطهم من غير ما حد يشعر ، أما حكاية التمويل فهذه والحمد لله تم تدبيرها من وسع بعد ما بعت العربية ، وبعدين الحكاية كلها كلام فارغ .. حفلة في أي نادي من النوادي أو في "صوان" في الشارع ، وشوية معازيم محترمين زي حضرتك كده ، ونوزع الجائزة .. والجائزة نفسها عبارة عن أيه ؟! زي كل الجوائز .. عشرين تلاتين طبق نحاس وكل سنة وأنت طيب.. وأنت طيب .. بس رأيي من باب التجديد خلي جائزتك حِلل وصواني "بايركس" أحسن.
