حسيت بوجع المظلومين واكتشفت إن الظلم بيقوِّى وتذكرت صمود أمى بجوار أبى بعد ساعات من إخلاء سبيل سلمى صباحى من مقر نيابة العجوزة، كتبت على صفحتها الشخصية بموقع التواصل الاجتماعى «فيسبوك» تدوينة بعنوان «السر» تحكى فيها تجربتها خلال الأيام السابقة. السر.. السر.. إنى حسيت إن ربنا بيحبنى أوى، ابتلانى ونصَفْنى.
السر.. إنى ذقت جزءا من الظلم اللى ذاقه أبويا.
السر.. إنى كنت باشوف صمود أمى أياما وشهورا لما كانوا بيعتقلوا أبويا.
السر.. إنى بعد 6 سنين جواز اكتشفت فى أشرف حاجات جديدة واتأكد شعورى إنه هدية ربنا لىّ..
السر.. إن المحامين العظماء حامد جبر ومحمد منيب «عمامى» اللى اتولدت وسطيهم وكبرت قدامهم دافعوا عنى بقلب الأب ولما رجعت البيت خدونى فى حضنهم وبكوا من فرحة رجوعى.
السر.. إن كل المحامين الكبار الأعزاء أصدقاء أبويا واللى بيعتبرونى زى بنتهم دافعوا عنى متطوعين وبقلب صادق جدا.
السر.. إن المحامى المحترم خالد أبو بكر ظهر فى حياتى فجأة ليلة التحقيق سمع قصتى وطلب منى أعمله توكيل عشان يقف جنبى تطوعا منه وما سابنيش لحظة..
السر.. إن صحابى الجدعان «بنات ورجالة» كانوا واقفين طول الأيام فى النيابة وقدام القسم بس عشان يحسسونى إنهم جنبى..
السر.. إنى اكتشفت عظمة حب الناس ودعواتهم الصادقة كانت بتوصلنى وأنا لوحدى فى الحجز.
السر.. إن ظباط قسم العجوزة كلهم باختلاف الرتب كانوا بيتعاملوا معايا «كإنسانة».
السر.. إن ملازم أول أصغر منى بكام سنة من القسم قاللى «لما كنت فى ثانوى كنت بتابعك فى برنامج شبابيك وأحس إنك أختى، أنا واثق إنك بريئة».
السر.. إن رئيس ووكلاء نيابة العجوزة فى منتهى الاحترام.
السر.. إن رئيس نيابة العجوزة رجل عنده ضمير مهنى حقيقى بعد تحقيقات استمرت 3 أيام وبعدما كتب مذكرة تفيد إنى مجنى علىّ ولست مدانة جه القرار بالحبس قال لى «أنا باعتذر لك».
السر.. إنى لما رجعت البيت كنت مشتاقة أوى لحضن «حلم» بنتى ولما حضنتها لقيتها اتعلمت جملة جديدة «وحشتينى يا ماما».
السر.. إنى عرفت قيمة سريرى.. وإنى بعد 5 أيام من غير نوم نمت لمدة 6 ساعات فيهم البركة ولما صحيت لقيت 654 ميسد كول و76 رسالة بيباركولى..
السر.. إنى لقيت اسمى «ستاتس» على الفيسبوك وأكتر من 30 مقال بأقلام كبار الكتاب عنى فى الجرايد وآلاف التويتات بتدعمنى..
السر.. إنى حسيت بوجع المظلومين.
السر.. إنى اكتشفت إن الظلم بيقوى.
السر.. فى سبحة «الطاهر» عمر طاهر.
السر.. فى الآية الكريمة «لا إله إلا أنت سبحانك إنى كنت من الظالمين» اللى كتبتها على جدران الحجز عشان أى حد يدخل الحجز ده يقراها.. سحر..
السر.. إنى لقيت الوقت اللى افتكرت فيه كل حاجة حلوة ربنا أكرمنى بيها فى حياتى ولقيت نفسى محظوظة جدا بالأهل والأصحاب والأحبة..
السر.. إنى افتكرت لما كان أبويا بيقعد معايا بالليل فى البلكونة أغنيلُه «حبيبتى من ضفايرها طل القمر» وهو يقرالى شعر من ديوان محمود درويش «لماذا تركت الحصان وحيدا» ودايما كانت تشغلنى جملة فى القصيدة دى عرفت معناها دلوأتى «مثلما كنت تحملنى يا أبى»..
ببساطة..
السر.. إنك تعرف تشوف «المنحة» المستخبية فى قلب «المحنة»..
أحمدك يا ربى يا حبيبى يا سندى.. وأشكر كل حد وقف معايا وردّ غيبتى ودعالى وساندنى..
