ألف رحمة ونور عليك يا عم حافظ إبراهيم .. ياللي كتبت قصيدة خالدة كنا نظن أنها ستعيش ابد الدهر بكل شموخها وقوتها ومعانيها .. .. قصيدتك العبقرية " مصر تتحدث عن نفسها " .. أصبحت الآن بعد حكم الإخوان المرساوي " مصر تتحسر على نفسها " .. هذا أبلغ عنوان الآن يعكس ما وصلت إليه حبيبتنا من مهانة وانكسار وقهر .. ومسخرة ونطاعة وقلة أدب ووساخة تحت حكم مرسي وإخوانه .. الاستعمار الجديد .. ايوه حاقولها وأعيدها مليون مرة .. الاستعمار الجديد .. لوالانجليز مثلا يجوا يحتلوك وينهبوك ويذلوك ويبيعوا ويشتروا فيك .. عادي .. هو الاستعمار كده .. واذا مكنش كده ميبقاش استعمار .. تقاومهم بقى وتقف قصادهم لحد ما يغوروا في ستين مصيبة تاخدهم وتاخد اللي جابوهم.
إنما الاستعمار الجديد ابو دقن " عيرة " أشد خطرا من الاستعمار التقليدي اللي بيقولها في وشك وفي قفاك : أيوه أنا جي احتل أرضك .. ولو مش عاجبك قاومني ووريني شطارتك .. الاستعمار الجديد استعمار للأسف " مننا فينا " .. ناس زينا .. ولاد نفس البلد .. مصريين .. - او هكذا يدّعون - عاملين نفسهم خايفين ع البلد .. والبلد هى أخر حاجة ممكن يفكروا فيها .. طظ في البلد وفي أهل البلد .. ناس شعارهم نموت نموت " مش وتحيا مصر " .. لأ .. ويحيا المشروع الإخواني .. أما مصر فتغور في ستين داهية .. مصر إيه وهباب إيه .. يا خي بلا نيلة .. دي مجرد مكان على الخريطة .. حتة ارض ضمن أراض ممتدة من المحيط إلى الخليج .. نعمل ما وسعنا الجهد لنشر القيم والمبادئ التي وصانا بها " مش الرسول الكريم صلى الله عليه وسلم " .. لا وصانا بها الإمام الأعظم " مش آبي حنيفة النعمان " .. ولكن .. أبونا وشيخنا ومُلهمنا حسن البنا.
استعمار ابن ستين كلب .. لأنه كده وكده .. يعني يستعمرك ويقولك ده انا واحد منك .. ده انا ابنك .. أخوك .. انتوا اهلي وحبايبي .. ولازم كلنا نحب بعض ونبوس بعض .. وبعدين يفقعك كل زومبة وزومبة .. ويشوفك حتعمل ايه .. او يشوف أخرك إيه .. قلت كلمتين مزنوقين في حلقك وخلاص ارتحت ونمت واشتريت دماغك .. يبقى خد الزومبة التانية .. ونشوف رد الفعل .. بتوع جبهة الإنقاذ حيقولوا كلمتين ماسخين ويتشالوا ويتحطوا يومين .. ماشي .. لحد كده .,. كل ده مقدور عليه .. خد بقى التالتة .. وهكذا .. كل ما واحدة تعدي ورد الفعل ع التانية يقل يبقى التالتة والرابعة مفيش كلب حيفتح بقه .. يبقى ايه المشكلة ؟ .. انا لا مؤاخذة عايز " ... " وانت البعيد وسخ ومعندكش مشكلة .. خلاص انت راضي وانا راضي .. مالك انا ومالنا يا قاضي.
أه وبمناسبة القاضي بقى .. وشوية الإخوان اللي نزلوا امبارح عشان تطهير القضاء .. عايز أقول كلمة .. القضاة هما اللي عملوا في نفسهم كده .. هما اللي عايزين يتركبوا .. انضربوا على قفاهم من مرسي بالإعلان الدستوري .. وراح ضارب النائب العام بالشلوت وجاب لهم نائب عام تاني .. ومشي معاهم بنفس سياسته مع الشعب .. الزومبة الأولى ونشوف رد الفعل .. ايه .. شوية هياجان وشوية كلام ميجبش تمنه .. إديهم التانية والتالتة .. إعدمهم العافية .. يالا يا " زند " يا بتاع نادي القضاة ورينا حتعمل إيه .. اذا كنا جبنا اللي اتخن منك تحت رجلينا .. اذا كان قضاة الاستقلال في 2005 .. كانوا نسوان متنكرين في ملابس رجالة .. واللي انتوا بقى مكنتوش تعرفوه انهم إخوان من الجماعة .. احمد مكي اللي كنتوا فاكرينه راجل خليناه وزير للعدل .. والغرياني اللي كان عامل فيها سبع البرمبة ، خليناه يسلق الدستور في ليلة واحدة .. وكله عدّى عليكم .. ورضيتوا .. زعلانين ليه بقى من مظاهرة امبارح؟
انتوا من جواكم ضيّعتوا هيبتكم .. شوية قراطيس منكم يسموا نفسهم قضاة من أجل مصر .. وشوية عيال منكم في ايديهم حكم محكمة وبدل ما يجبروا النائب العام على تنفيذه .. قال ايه بيناشدوه انه يتكرّم ويتلطّف ويعود لمنصة القضاء .. طيب اقسم بالله لو انا منه وشايف بعيني " العلوقية " دي .. ما انا ماشي .. واحد " دكر " في محكمة الاسماعيلية ماسك قضية اقتحام السجون وبضميره الصاحي عايز يجيب أخرها .. وبدل ما تقفوا جنبه .. قال إيه بتحاربوه وتهددوه في أكل عيشه وحياته .. نهاية القول بالنسبة لكم اللي بيشيل قربة مخرومة بتخر على دماغه ودماغ اللي خلفوه .. بس المشكلة مش ان انتم شوية.. سامحوني " ... " .. المشكلة ان احنا كشعب اللي بندفع التمن .. بس على رأى المثل : لا تعايرني ولا أعايرك .. الهم طايلني وطيالك .. ما انتوا كمان من الشعب .. والكل ساكت .. يلبس كل خازوق وخازوق ويصرخ ويقول أى .. لحد ماهو بنفسه يوحشه الخازوق ويسأل عليه ويروح لحد عنده برجليه.
احنا بقى ولاد مصر؟ .. يعني مصر لمّا تتحدث عن نفسها حتجيب سيرتنا ولا تداري وشها مننا ؟ .. احنا اللي اسمنا ولادها وسايبنها للحرامية ولاد الكلب ينهشوا فيها وفي لحمها بلا رحمة وبيعزموا ناس من هنا ومن هناك عشان يجوا هما كمان وياكلوا لمّا يشبعوا ويمصمصوا عضمها ويلموه في ورقة جرنال ويرموه في الزبالة.
كل ده ومش عايزينها تتحسر على نفسها ؟ بس اللي انتوا مش عارفينه انها مش بتتحسر عشان الإخوان ركبوا ودلدلوا رجليهم .. لأ .. هى بتتحسر وجالها مليون " نقطة " يمكن تقضي عليها ، لانها خلّفت شوية عيال " ... " ، وكانت فاكرة نفسها جابت رجالة!!