(تابع ما نشر في العمود السابق) فالشخص اللي حصلت معاه المشكلة قالي شوفت هاتعيط أهو، قولتله أعيط ليه أنا ما عملتش حاجة وبعدين إيه اللي يخليني أعيط، فرد وقال للظابط اللي ماسكني وماشي معايا إحنا نطلع علي قسم أول مدينة نصر، قولتله أنا معملتش حاجة عشان أروح القسم أساساً والموضوع ما يستحقش، قالي ماشي معايا، قالي بتزق ظابط مباحث قولتله أنا أصلا ما أعرفش إنه ظابط مباحث وبعدين حتي لو ظابط أو أي شخص تاني مالوش حق إنه يمد إيده عليا أبداً، رد عليا وقال هو فعلا مالوش حق إنه يمد إيده وبعدين قولت للشخص اللي كان معايا إحنا رايحين فين قاللي رايحين للباشا يشوف هانعمل فيك إيه قولتله أنا واحد قاطع تذكرة عشان أدخل أتفرج عالماتش، قالي لا إنسي الماتش إحنا نحطك في البوكس ونشوف هانعمل إيه، قولتله هاتحطني في البوكس إزاي يعني وعشان إيه وبأي تهمة، رد وقالي لا دي شغلتنا بقي ما تشغلش بالك.. طلب مني الضابط البطاقة (وكل دا وإحنا في الطريق) إديته البطاقة وبص فيها وقالي من عين شمس إنت عارف يا ابني مين اللي نزلك من العربية دا، قولتله مين سعادتك، قالي دا مساعد أول وزير الداخلية، قولتله طيب أنا أعمله إيه هو أنا اللي نزلته من العربية وبعدين هو نزل من الجنة يعني، رد عليا وقالي إنت باين عليك لمض وبتاع مشاكل، قولتله كل دا عشان مسيبتش حقي، قالي إحنا نروح للباشا وهو يتصرف معاك، ورحنا للباشا وكان لابس بدلة وهو جسمه ضخم وشبه حضرتك بس بشنب وقالهم ماله دا قالو له يا فندم الواد دا عمال يزعقلنا جوا وزق فلان ومش عاجبه حد، قولتله يا فندم مفيش أي حاجة من الكلام دا حصلت حضرتك تسمع اللي حصل بقي ( عقدة الأجهزة الأمنية الأبدية... طول ما أنا بكلم الكبير كان الظابط ورايا عمال يقولي نزل إيدك وإنت بتكلم الباشا ) وكررها أكتر من مرة وأنا بكلم الكبير وحكيتله اللي حصل بالظبط لأني مش ممكن أكدب وأنا قدام شخص بالمركز والحجم دا ووسط حاشيته .. وللواقعة المؤسفة بقية.