انا شخصيا أجهل من دابة في الانجليزي .. كبيري " يس .. ونو " ومعرفش حتى اكتبها غير بالطريقة دي .. بقولكم انا " ميح " .. معنديش لغة.. ده بس عشان محدش يفسّر العنوان غلط ، والاقي محامي بربع جنيه قام رافع عليا قضية بتهمة إهانة الرئيس .. والحقيقة عيال " البلاك بلوك " دوكهما ، عيال شاطرين أوي .. رغم إني في اى تجمع ليهم ، مشفتش منهم اكتر من 50 نفر ، انما عملوا صداع للرئيس مرسي ، وطول الليل قاعد يفكر في " البلاك لوك " يعمل معاهم إيه .. لمّا بقى ليله ونهاره " بلاك " وبس. ورغم انهم لحد دلوقتي معملوش حاجة تقلق النظام بجد ، إلا ان تصريحاتهم على الفيسبوك قلبت كيان الشرطة والحكومة والنظام وسيادة النائب العام الخصوصي بتاع مرسي .. فقالك لازم اجيب العيال دي من قفاها .. دول عايزين يحرقوا البلد ويوقعوا رئيسها .. " اللي جميله فوق راسي .. مش هو اللي خلاني نائب عام "..
وعبد الوهاب كان بيغني تراعيني قيراط اراعيك قيراطين .. وتشوفني بعين اشوفك باتنين .. دي حتى تبقى قلة أصل ان الاقي الرئيس في شدة واتخلى عنه .. الراجل خلص من صداع الالتراس بعد حكم الإعدام .. طلع له " البلاك بلوك " .. لدرجة انه اتعقد من " البلاك بيري " اللي معاه ، واشترى اى فون .. وكان بعت مندوب من الرياسة للبنان يشتري له يجي ب 100 الف دولار بدل وقمصان وكرافتات وبوكسرات وشرابات استك منه فيه .. فرمي كام بدلة " سودا " في الزبالة .. مع انه كان بيحب الاسود موت خاصة بعد مابقى رئيس عشان الاسود بيدّي وقار..
لكن بعد " البلاك بلوك " مبقاش طايق البدل السودا .. حتى لمّا كان بيصلي الجمعة وخرج يجري من غير الجزمة لامؤاخذة من هتافات الناس ومطاردتهم .. واحد من حراسه اللي كان حافي برضه ، رجع جري شايل جزمة الرئيس وقاله جزمة جنابك السودا يا فندم ، فشخط فيه وقاله : مش عايز جزم سودا تاني ونبّه على افراد الحراسة نفر نفر اللي حلاقيه لابس جزمة سودا حتبقى ليلة اللي خلفوا اهله اسود من قرن الخروب.
يانهار ازرق .. للدرجة دي اتعقد رئيسنا الهُمام من " البلاك بلوك " .. من شوية عيال منظمين .. كل اللي بيعملوه شوية تهديدات على الفيسبوك .. ولدرجة ان النائب العام بجلالة قدره بيهدّد الصحفيين والإعلاميين .. اللي حيروّج للجماعة دي .. حيتنفخ .. عايزين تتكلموا عنهم .. يبقى اشتموهم وجرّسوهم .. انما مجرد تناول ذكرهم ولو مجرد سرد الخبر عنهم .. لأ .. ناقصين احنا " البلاك بلوك " .. شوية شوية حلاقي وكلاء النيابة اللي عايزين يخلعوني واقفين على باب مكتبي بالقناع البلاك.. إما امشي أو نهاري يبقى اسود.
الله يكون في عون الريس مرسي .. ده لو جبل كان اتهد .. من ساعة يا حبة عيني مامسك الحكم والمصايب نازلة ترف على نافوخه .. بس زي ما بنقول :.. من أعمالكم سلط الله عليكم .. يعمل إعلان دستوري ، فالدنيا تقوم ولا تقعدش .. يعيّن نائب عام خصوصي ، يلاقي الهجوم عليه من كل ناحية .. يقول خطاب .. البورصة تقع .. يخلص من القطر اللي فرم 55 طفل وطفلة في الصعيد ، يموت 120 عسكري أمن مركزي في حادثة قطر برضه في البدرشين .. يروح يزور واحد في مستشفى المعادي كأنه من المصابين في حادثة القطر " كده وكده يعني " ..
يقوم وهو راجع يلاقي قطر تاني عند مزلقان أرض اللواء دهس تاكسي ومات يجي خمسة .. قالك اعدم 21 من المتهمين في بور سعيد عشان الالتراس يتهد ويسكت ، قام طلع له أهالي بور سعيد وفين يوجعك .. قالك افرض الطوارئ وحظر التجول .. قاموا عاملين مظاهراتهم من بداية ساعة الحظر .. قالك أنزّل الجيش في السويس يضبط المسائل ، قام الجيش عمل دوري في كرة القدم وبقى يلعب مع الأهالي من 12 بالليل للصبح ..
يخلص من الناس اللي في الزنقة اللي ببيخططوا لقلب نظام الحكم ، يطلع له " البلاك بلوك " .. وخد عندك بقى تريقة ملهاش حل على الفيسبوك وتويتر على مرسي واللي بيعمله .. اللي يقولك مرسي لغى حظر التجول لعدم الإقبال عليه .. واللي يقولك مبارك كان يقتل القتيل ويمشي في جنازته ، ومرسي يقتل القتيل ويقتل اللي يمشي في جنازته .. واللي يقولك مرسي قرر يلغي من الأيام يوم الجمعة عشان محدش يعمل مظاهرات .. يعني عايز اقول ان مفيش رئيس فيكي يا مصر كان مبعث سخرية واستهانة من ساعة عبد الناصر لحد مبارك نال اللي ناله مرسي في 7 شهور .. وده مش لأننا شعب قليل الأدب ومش متربي .. لكن لأن مرسي هو اللي عمل في نفسه كده.. بعدم كياسته.. عدم حكمته وحنكته.. استهتاره بمشاعر الناس واستهانته بيها .. عنفه غير المبرر مع المعترضين خلق له عنف أكبر .. سحب من الثورة انبل ما فيها .. وهى السلمية .. بيقولوا مع مرسي وجماعته مينفعش سلمية .. وهما اللي بدأوا .. والبادي أظلم .
سمعت امبارح مداخلة من واحد في بور سعيد قال كلمة لخّصت القضية وجابها م الأخر .. هو - يقصد مرسي - مش سامعنا .. وعشان كده احنا مش شايفينه .. وكوني مش شايفك .. يبقى انت مفيش .. وكونك مفيش .. يبقى ايه لزمتك .. ومادام مالكش لازمة .. يبقى عمرك ماحتحل ازمة .. وبناء عليه يبقى لازم تمشي .. وخدها مني .. حتقعد شهر .. شهرين.. تلاتة بالكتير .. برضه حتمشي .. فعلينا بإيه اللي حيموتوا .. وعليك بإيه البهدلة وقلة القيمة.