والده الشهيد محمد راشد ..... الاخوان ايديهم اتلوثت بالدم كما فعل النظام السابق . قالت والدة الشهيد محمد احمد التميمى ان ابنها استشهد وهو عنده 24 سنة وكان حاصل على بكالوريوس حاسب الى وهو من الشباب اللى استشهدوا فى جمعه الغضب يوم 28 يناير لانه اخد خرطش فى الخد الايمن ادت الى الوفاة فى شارع الثلاثينى والغورى بحى العرب بوسط مدينة بورسعيد.
وبرغم ان كل الشهود شهدوا على ان الضابط اللى ضربه كان قاصد يضربه ضربة موت الا ان الضابط ده اخد براءه فى القضيه وعلشان كده نزلنا يوم صدور الحكم مع شباب 6 ابريل علشان الناس تشوف صورة محمد والشباب اخدونا لغاية مقر جماعة الاخوان المسلمين واقسم بالله انى اتفاجئت ان ده مقر الاخوان ويومها الاخوان قالوا ان احنا ضربنا وخربنا واقسم بالله ان احنا ما عملنا حاجه بس ده عادى لانهم طول عمرهم كدابين ومنافقين وبيرموا الناس بالتهم وانا محروقه علشان دم محمد اللى راح.
واكدت على ان والد محمد التميمى لن يهدأ حتى يأخذ بالثأر من اللى قتله وده اللى اكده انه لو شاف ضابط الامن المركزى اللى قتل ابنه هو اللى هيقتله بيده.
وشددت ام الشهيد التميمى على اننا اتوكسنا زياده بعد قيام ثورة 25 يناير ومش حاسيين باى تغير وكل اللى حصل ان الشباب الثوار نجحوا فقط فى خلع راس نظام ظالم وفاسد بس باقى مطالب الثورة لم تنفذ برغم ان احنا اخترنا محمد مرسى علشان راجل عارف ربنا بس الاخوان دول انانيين ما بيحوبوش الا نفسهم وبرغم ان انا ليا اتنين اخوات ملتحين بس هما اساؤا لكل واحد لابس جلابية ومربى دقنه.
كما اكدت والدة الشهيد التميمى على ان شعارها فى احياء الذكرى الثانية لثورة 25 يناير هو القصاص ولا شئ غير القصاص لانه هو بداية التغيير الحقيقى...
وهذا ما اكدته علية ايضا ام الشهيد محمد راشد درويش الذى كان سنه وقت الاستشهاد 23سنة وكان طالب بكلية الاداب جامعه طنطا قسم انجليزى الذى اصيب باكثر من 150 طلقة رش خرطوش اصابت الوجه والراس والظهر ادت الى الوفاه فورا واضافت ان الثورة نجحت بالفعل بفضل دماء ابنائنا بس مكملتش اهدفها وعلشان كده الثورة مستمرة لانها ادت الى اعادة الوعى الوطنى للشعب كما فعل الشيخ محمد عبده عندما جاهد لاعادة الوعى القومى للشعب.
واشارت الى ان الضابط اللى قتل ابنها لسه متحكمش عليه وهو فى مرحلة النقض بس انا نفسى فى القصاص العادل اللى يبرد نارى.
واضافت الى ان احنا شعبنا طيب وصبور لدرجة فقدان حقوقه وهو نفسة اللى ادى الى انكسار النظام الفاسد وان الشعب استطاع فى النهايه ان يقول كلمة لأ.
واوضحت والده الشهيد محمد راشد على ان الاخوان ايديهم اتلوثت بالدم كما فعل النظام السابق وكل لما نكلمهم يقولوا لنا بقالنا 7 شهور بس ومحمد مرسى يول انا لسه جاى.
وقالت ام الشهيد انى كان نفسى اروح القاهرة علشان نحى الذكرى الثانية للثورة بس انا حاسة ان بورسعيد محتاجه ان يكون بها زخم علشان كده انا هفضل فى بورسعيد علشان انا حاسه ان افضل للبلد انى ابقى فيها.
واكدت على ان شعار الذكرى الثانية للثورة نفس شعارات الثورة نفسها وهى عيش بكرامه حريه للجميع وعداله اجتماعيه توفير العدل لكل ابناء الوطن.
