النهارده هنعمل ستيك اللحمة بالصوص الأبيض والمشروم على "سفرة دايمة" جرّبيه وابعتي لنا رأيك فيه.. ستيك اللحمة بالصوص الأبيض والمشروم المقادير: كوب مشروم 1⁄2 كيلو لحمة بقري مقطّعة شرائح ثمرة فلفل أخضر مقطّعة قطع صغيرة شرائح جبنة شيدر أو جبنة رومي ثمرة طماطم مقطّعة قطع صغيرة 2 ملعقة كبيرة زيت نباتي 2 ملعقة كبيرة زبدة ملح وفلفل مقادير الصوص: 4 ملعقة كبيرة دقيق أبيض 2 مكعب جبنة كيري أو نستو ملعقة صغيرة ثوم مفروم 2 كوب لبن ملح وفلفل زبدة الطريقة: 1- تبّلي اللحمة بالبصل والملح والفلفل، وسيبيها شوية لغاية ما تتشرّب من التتبيلة بتاعتها. 2- شوّحي اللحمة مع ملعقة زبدة وملعقة زيت في طاسة على النار من كل الجوانب لغاية ما تستوي. 3- هاتي طاسة تانية، وحطّي فيها باقي الزيت والزبدة، وشوّحي فيها المشروم وبعد ما يدخل في السوى ضيفي الفلفل الأخضر والطماطم، وقلّبيهم كلهم مع بعض لمدة 5 دقائق على النار. 4- لتحضير الصوص الأبيض، اضربي الدقيق واللبن والثوم والملح والفلفل الأبيض والجبنة مع بعض في الخلاط، لغاية ما تحسّي إن كل المكوّنات تجانست مع بعض، وممكن تزوّدي ميه لو احتجتي، وبعدين حطّي الخليط ده في حلة على نار متوسطة مع التقليب المستمر لغاية ما تحصلي على القوام اللي إنتي عايزاه. 5- اخلطي الصوص اللي عملتيه مع خليط المشروم والفلفل الأخضر والطماطم وقلّبيهم كلهم مع بعض كويس على نار هادية لمدة 10 دقائق. 6- وفي الآخر، حطّي الخليط ده على اللحمة في طبق التقديم، وممكن تقدّمي معاه مكرونة أو أرز أبيض. خلصت وصفتنا النهارده.. استنونا كل يوم مع وصفات جديدة.. سلام،،،