السلام عليكم ورحمة الله وبركاته.. أنا فتاة عندي 25 سنة، وحاصلة على معهد متوسّط، ارتبطت عاطفيا بقريب ليّ حاصل على شهادة عالية، متديّن وعلى خلق، كل الناس كانوا بيشكروا فيه، استمرّت علاقتنا 4 سنين، وكان كل ما يتقدّم ليّ حد كنت بارفض؛ رغم إنه كان بيقول لي وافقي؛ لأن ظروفه المادية كانت صعبة شوية، كنت بازعل أوي منه، بس كنت بالتمس له العذر. أنا كنت في مشاكل مع أهلي باستمرار، لغاية ما تقدّم لي واحد صاحب والدي، وماكانش فيه عيب حتى كان عامل عمرة، وغصبوا عليّ أقعد معاه، وفجأة لقيتهم بيقروا فَتْحتي، اتصدمت وعِشت يومين من أسوأ أيام حياتي، ويوم ما كنّا نازلين نشتري الدهب اتصل والد حبيبي، وقال لي إنهم عاوزين يتقدّموا لي، فرحت أوي وأخويا اتعاطف معايا، وأقنع والدي والحمد لله اتخطبت لحبيب عمري، بس ساعات كتير باحس إنه ندمان رغم إنه بيقول إنه بيحبّني، وباحس بده في خوفه عليّ، بس هو شخصية انتقادية، وأنا باحاول أعدّي علشان بحبّه وباموت فيه. المشكلة دلوقتي إنه هو عملي جدا، وأنا رومانسية لأبعد الحدود، ولمّا باكبت مشاعري وأحاول أعامله بمعاملته بيزعل، ولو لمته إنه بيتأخر عليّ في الاتصال أو إنه ييجي يشوفني برضه بيزعل، وبيقول لي إنتي مش بتقدّري ظروفي.. المشكلة إني تعبت ومابقتش عارفة أعمل معاه إيه؟ ولا أعامله إزاي؟ مع العلم إني باتعامل على طبيعتي ومش باعرف أبقى بوشّين.. تعبت مِن تهييف كلامي ومشاعري وانتقاده لشكلي ولبسي، أنا حاسة إني بابعد عنه شوية بشوية، حاسة إني مش قادرة أسعده، بافكر أسيبه يمكن ربنا يرزقه بواحدة تفهمه وتبقى زيه، حاسة إني أنانية ووحشة أوي. باتمنّى ربنا يغفر لي ذنوبي ويريّحني من الدنيا دي بجد.. نِفسي أوي أموت! أنا حاسّة إني في أزمة، وأزمتي في مشاعري، عارفة إني طوّلت أوي عليكم.. باعتذر، بس أرجوكم أفيدوني أسيبه ولا لأ، وأتعامل معاه إزاي؟ أرجوك.. اديني رأيك،،،