أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ماتتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.. على سفرة النهارده هيكون موجود عصير كوكتيل وسلطة الكاليماري والجمبري وشوربة السمك وسمك ماكريل في الفرن وبقلاوة بالمهلبية، وعلى السحور هنقدّم لك مشروم بالجزر والذرة..
عصير كوكتيل عصير كوكتيل المقادير: ثمرة تفاح أصفر 1⁄4 كيلو فراولة 2 ثمرة خوخ 2 ثمرة موز ثمرة كيوي 3 كوب عصير برتقال كوب لبن سكر الطريقة: 1- قشّري الفاكهة وقطّعيها مكعبات صغيرة واضربيهم مع باقي المكونات في الخلاط، وبعد كده صفّي العصير وشيليه في الثلاجة لغاية ما يبرد، وعند التقديم صبّيها في الكاسات مع الثلج وزيّنيهم بشرائح التفاح.
سلطة الكاليماري والجمبري سلطة الكاليماري والجمبري المقادير: 1⁄4 كيلو كاليماري مسلوق 1⁄4 كيلو جمبري دون قشر ومسلوق 1⁄2 ثمرة فلفل أحمر مقطّع شرائح طولية 1⁄2 ثمرة فلفل أخضر مقطّع شرائح طولية كوب كابوتشا مقطّع شرائح رفيعة 1⁄2 كوب كزبرة خضراء مفرومة بصلة متوسطة مقطّعة حلقات 1⁄4 كوب مايونيز كوب زبادي ملح وفلفل الطريقة: 1- اسلقي الكاليماري والجمبري وسيبيهم يبردوا، وقطّعي الكاليماري شرائح. 2- اخلطي كل المكونات مع بعضها وقلّبيهم كويس، وبعد كده اغرفي السلطة في طبق التقديم.
شوربة السمك شوربة السمك المقادير: 1⁄2 كيلو سمك فيليه مقطع مكعبات 2 عود كرّات مقطّع شرائح صغيرة رأس بصلة خضراء صغيرة مقطّعة شرائح 1⁄4 معلقة صغيرة فلفل أحمر مطحون 3 ملعقة كبيرة صلصة طماطم ملعقة كبيرة زيت زيتون كوب بقدونس مفروم كوب عصير طماطم 2 فص ثوم مفروم ملح وفلفل زنجبيل الطريقة: 1- شوّحي الكرّات والثوم والبصل الأخضر في الزيت على نار متوسطة مع التقليب لمدة 3 دقايق، لغاية ما تحسي إنهم استووا. 2- بعد كده ضيفي الطماطم وصلصلة الطماطم والفلفل الأحمر والملح والفلفل والزنجبيل، وسيبيهم على النار لغاية ما يغلووا، وبعد كده وطّي النار، وسيبيهم على نار هادية لمدة 15 دقيقة. 3- بعد كده ضيفي السمك، وقلّبيهم بالراحة لغاية ما تحسّي إن السمك استوى، وبعد كده ضيفي البقدونس وقلّبي الشوربة كويس على النار، وبعد كده قدّميها.
سمك ماكريل في الفرن سمك ماكريل في الفرن المقادير: كيلو سمك ماكريل 2 ثمرة طماطم مبشورة ثمرة فلفل حامي أو بارد مقطّع قطع صغيرة 2 ملعقة كبيرة زنجبيل طازج مفروم 2 ملعقة كبيرة صلصة طماطم 2 ملعقة كزبرة خضراء مفرومة حزمة كرفس مفرومة 4 فص ثوم مفروم ملعقة صغيرة كمون ملعقة صغيرة زعتر ملعقة كبيرة خل 1⁄2 كوب زيت الطريقة: 1- نظّفي السمك كويس جدا وشيلي منه الرأس، وافتحيه من البطن، واغسليه كويس. 2- اخلطي باقي المكونات كلها مع بعض، وتبّلي بكمية منها السمك من جوة، ورصّيه في صينية الفرن، وحطّي على الوش باقي كمية التتبيلة وكمية صغيرة من الزيت، ودخّلي الصينية في الفرن لمدة من 30 : 45 دقيقة أو لغاية ما السمك يستوي، وبعد كده طلّعيه ورصّيه في طبق التقديم وحطّي عليه الصوص بتاعه، وزيّني الطبق بشرائح الليمون.
بقلاوة بالمهلبية بقلاوة بالمهلبية المقادير: علبة جلاش 2 كوب لبن 1⁄2 كوب نشا كوب زبدة سايحة فانيليا الطريقة: 1- لتحضير المهلبية، اخلطي اللبن مع النشا ودوّبيهم مع بعض وضيفي عليهم الفانيليا، وحطّيهم على نار هادية مع التقليب المستمر، لغاية ما الخليط يتقل معاكي، وبعد كده اطفي عليه النار وسيبيه يبرد. 2- افردي نصف كمية الجلاش في الصينية وبين كل ورقتين ادهني طبقة خفيفة من الزبدة، وبعد كده حطّي المهلبية الباردة على الجلاش، بس راعي إنها ما توصلش للأطراف علشان ما تتحرقش منك. 3- رصّي باقي كمية الجلاش فوق المهلبية وما تنسيش تدهني الزبدة بين كل ورقتين جلاش، وبعد كده قطّعي الجزء العلوي من الجلاش بالطريقة اللي تحبّيها بس ما توصليش بالسكينة لحد المهلبية علشان ما تطلعش لبره وتتحرق، وبعد كده ادهني وش الجلاش بباقي كمية الزبدة، ودخّلي الصينية في الفرن وسيبيها لمدة 30 دقيقة أو لغاية ما وش الجلاش يحمر. 4- طلعي الصينية من الفرن وصبّي عليها الشربات البارد. 5- لتحضير الشربات، اخلطي كوب سكر مع كوب ميه وعصير نصف ليمونة، وحطّيهم على النار لغاية ما الخليط يغلي وبعد كده قللي درجة الحرارة وسيبيه لغاية ما الشربات يعقد، وبعد كده ارفعيه من على النار وحطّي عليه الفانيليا وسيبيه يبرد.
مشروم بالجزر والذرة للسحور.. مشروم بالجزر والذرة المقادير: 3 كوب مشروم كوب جزر مبشور علبة ذرة مسلوقة 1⁄2 كوب فلفل أحمر حلو مقطّع شرائح ملعقة كبيرة زيت سمسم أو زيتون 2 ملعقة كبيرة عصير ليمون 3 فص ثوم مفروم بصلة مقطّعة الطريقة: 1- اخلطي زيت الزيتون أو السمسم مع الثوم وعصير الليمون والملح. 2- اخلطي باقي المكونات في طبق كبير وضيفي عليهم الصوص اللي جهّزتيه، وقلّبيهم كويس مع بعض، وبعد كده حطّي السلطة في الثلاجة وقدّميها باردة. وبكده خلصت عزومة النهارده.. مستنيين تجرّبي وتقولي لنا إيه رأيك.. واستنينا بكرة إن شاء الله مع عزومة جديدة.. نتمنى لكم صوما مقبولا وإفطارا شهيا بمشيئة الله.. سلام،،،
