هاي إزيكم يا أحلى موقع وأحدث مجلة شبابية.. أحب أقول لكم على طريقة عمل "الكانيلوني"، وعشان نعمل "الكانيلوني" لازم نعرف يعني إيه "كانيلوني"؟!! هو أكلة إيطالية ونوع من أنواع الكريب، والكريب هو عيش معمول بطريقة معيّنة ومكوّناته بسيطة أوي.. المقادير: كوب إلا ربع لبن. كوب دقيق منخول علشان الشوائب. بيضة و احدة. رشة ملح خفيفة. رشة فلفل أبيض "اختياري". صوص بشاميل خفيف. للحشو: شاورمة لحمة أو فراخ. الطريقة: 1- يتم وضع المكوّنات كلها في الخلاط، وتخلطيهم كويس أوي علشان ما يبقاش مكلكع. 2- بعد كده تكوني محضّرة طاسة تيفال صغيرة، وتحطي فيها ملعقة زيت صغيرة، وتبدئي تاخدي بالمغرفة أو الكبشة وتحاولي تحطي العجين على شكل دائرة على نار متوسطة، ولما تحسي إنه استوى شوية قلبيه على الناحية التانية. 3- كرري الخطوة اللي فاتت لحد ما يخلص العجين. 4- حضري الفرن وشغليه ربع ساعة وتجيبي صينية مستطيلة صغيرة وتاخدي واحدة كريب وتوزّعي عليها الشاورمة وتلفيها، وبعد كده تبدئي ترصيها في الصينية وهكذا، وبعدين ترشي صوص البشاميل على الصينية وتدخليها في الفرن لمدة ربع ساعة، ولو تحبي تحطي على الوش شوية موتزاريلا أو حتى تقطعي جبنة شيدر أو فلمنك أو حتى تبشري جبنة رومي. ويا رب تعجبكم زي ما بتعجب كل اللي بيدوقها، وبالهنا والشفا من صديقتكم "MIRO" في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي.. ويا ريت تجرّبوها فعلاً.. وفي انتظار آرائكم.. وكمان وصفاتكم الجامدة على لينك..