السلام عليكم ورحمة الله وبركاته أنا الحمد لله ربنا أعطاني نعمة الجمال ولكن أعترف أن هناك من هم أجمل مني.. لي صديقة تشبهني في الشكل إلى حد ما، وكثيرا كان ما يعتقد الناس أننا أختين وتوأم أيضا.. والمشكلة عندي هي المعاكسات لي ولها والله حاجة تضايق جدا جدا وألفاظ ما أدراكم بها، مع العلم إن إحنا لسه في أولى ثانوي، ولكن أنا أعترف إننا لما نتعاكس ماحدش بيرد، لكن هناك ألفاظ تخدش الحياء بطريقة رهيبة والناس يكونوا موجودين ومحدش يتحرك من مكانه. مافيش غير مرة واحدة شاب شهم أنقذنا من إيد إنسان ماعندوش أخلاق كان ماشي ورايا أنا وهي. أريد أن أسأل سؤال.. لما يثير الشباب عندما يرون أختهم بتتعاكس قدامهم ولما يلاقوا بنت تتعاكس ولا كأنهم شايفين؟ عاوزة أقول لك إني بقيت أخاف أمشي لوحدي وأخاف أمشي في منطقة فيها مجموعة شباب بالرغم وربنا يعلم إني محجبة ومحترمة جدا والحمد لله ملابسي واسعة وطويلة يعني ملابسي ماتلفتش النظر.. آسفة على الإطالة ولكن أرجو الرد.
noraaaam
أعرف صديقتي شعورك وشعور صديقتك تجاه معاكسات الشباب وكلامهم اللي المقصود منه يتعرفوا ويصاحبوا. وأعرف كمان إنك بتتضايقي من بعض الكلام لكن كمان بتنبسطي من بعضه، وخصوصا لو كان التعليق من الشاب ظريف يعبر عن جمالك ودلالك من غير ما يخدش حياءك. وإذا حاولنا أن نعرف من أين تبدأ المشكلة وكيف يمكننا حلها لا بد وأن نعرف إجابة هذا السؤال: هل الفرخة الأول ولا البيضة الأول؟؟!! ولو سألتك وقلت يا ترى الشباب بيقولوا الكلام اللي بتسمعيه لكل البنات في الشارع؟ وهل كل بنت لها ودان تسمع كلام الشباب وتنبسط أو حتى تزعل؟؟ وعلى فكرة مجرد رد الفعل بالغضب أو السرور هذا هو مطلب الشاب؛ يعني هو ده الرد اللي محتاجه الشاب إنه يلفت نظر الفتاة بكلام حلو، فتبتسم ويسهل التعارف أو تزعل ويجري وراها يحاول يعتذر أو يفسّر وتبقى محبة بعد عداوة. يعني صديقتي لو كنت ماشية في طريقك وسمعت كلب بيهوهو كنتي تزعلي؟ ولا تفرحي؟ ولا تكملي مشوارك ولا كأنك سامعاه؟ طب نفترض إنه فعلا كلب مش شاب ولما هوهو ابتسمت ونظرت له؟ مش هيجري ويهز ديله ويمسح وجهه في ملابسك عشان تدلليه! أو كشرت وغضبت مش هيجري عليك ويهوهو أكتر لحد ما تلتقطي طوبة من الأرض وتقذفيه بها فيعود لحال سبيله!! وتفتكري لو لم يحظ أبدا باهتمامك يعني أنت ولا كأنك حتى لو ترك مكانه ومشي وراك يهوهو وأنت ولا كأنك كان هيكرر؟! ولا كان هيعرف إنك نوع من البنات محترم هدفه من الشارع الطريق اللي تحت رجله وعينه على الأمان بعيد عن السيارات والمطبات، وودانه مقفولة وخلي اللي يهوهو يهوهو. المشكلة صديقتي: أنك وصديقتك في سن صغيرة جدا ولم يمض وقت كبير على سن الطفولة والمراهقة، وكلام الشباب ونظراتهم له مكان قي قلوبكم وودانكم وعيونكم، وكل ما عجبكم الكلام ورأى الشباب ذلك من حركاتكم وضحكاتكم أو ابتساماتكم كلما تشجعوا وتمادوا في المعاكسة. واسمحي لي أن أفسر لك شيئا: أنا واثقة منك ومن أخلاقك وأخلاق صاحبتك، ولكن هل كل البنات في الشارع أخلاقهم مثل أخلاقك ولا فيه بنات نزلت مخصوص بلبس وحركات عشان تتعاكس وتصاحب.. طب الشباب يعرفوا الفرق بينك وبين البنات التانية ازاي؟ طبعا بكلام المعاكسة والبنت صاحبة الدين والأخلاق تسمع وكأنها لم تسمع، عينها على الأرض وهدفها مشوارها الذي نزلت من أجله، أما الإعجاب حبة والزعل حبة يخلي الشباب مايعرفش الفرق بين البنت الحلوة في أخلاقها من الوحشة في أخلاقها. خلاصة قولي: يا ترى المشكلة في اهتمامكم واستماعكم للكلام وتفاعلكم معه بأي شكل، مما يدعو الشباب للزيادة في المعاكسة حتى الاضطرار للجوء للمارة ليحموكم ويساعدوكم؟! ولا المشكلة في الشباب وكلامهم في الهوا يؤثر في اللي عاوزه تتأثر ولا يؤثر في اللي همها طريقها ومشوارها. حددي صديقتي هل المشكلة منك ومن اهتمامك باللي بيقوله الشباب، ولا في الشباب اللي مش عارف اللي نازلة تتعاكس من المحترمة اللي مش بتحب المعاكسة؟!
