أنا عندي 18 سنة، وكنت بحب ابن صاحب بابا؛ بس طبعا ما قلتلهوش حاجة، وبعدها هو اللي جه قال لي إنه بيحبني، وكان متردد إنه يقول لي عشان ما أصدهوش. المهم بعد فترة قلت له أنا كمان إني بحبه، وكان كلامنا كله لما بييجوا عندنا، أو لما إحنا بنروح عندهم، واستمر الوضع كده حوالي سنة ونص، وبعدها عرفت من واحدة ما تعرفش إننا نعرف بعض أصلا إنه بيكلم واحدة تانية ما صدقتهاش؛ لأن ثقتي فيه ما كانش ليها حدود؛ بس قلت له وهو أنكر. بس اللي خلاني أرجع أفكر في الموضوع إنه كان متغير جدا معايا وما كانش بيكلمني يطمّن عليا زي ما كان بيعمل، وكانت حجته إننا في الدراسة وإحنا الاتنين مشغولين مع إنه قبل كده كان بيتصل في الدراسة عادي وبعدها اتصلت بيه عشان نحدد علاقتنا مع بعض وقلت له لو مش عايز إننا نكمل قل؛ بس هو سكت وما اتكلمش ولا قال آه ولا لأ؛ بس بعدها اتأكدت إنه بيكلم البنت دي فعلا. أنا والله مش باتمنى له حاجة وحشة وباتمنى له كل خير وسعادة؛ بس هو دلوقتي اتصل بيّ، وبيقول لي إنتي السبب إنتى اللي ما بقيتيش بتتصلي، وتعالى ننسى اللي فات ونكمل تاني؛ بس أنا مش عايزة أرجع له لأن اللي يخون مرة يخون ألف مرة؛ بس مش عارفة أقول له إيه من غير ما أجرحه. dolly