السلام عليكم ورحمة الله وبركاته كل عام وأنتم بخير. أرجوكم تساعدوني دي أول مرة أنا أستشيركم. أنا شاب عندي 21 سنة دخلت الكلية واتعرفت على بنت بصراحة الأول كانت المسألة إعجاب وبعد كده اتطورت لحب، وبقيت ما أقدرش أبعد عنها يوم وما شوفهاش أو أسمع صوتها. أنا عرفتها عن طريق شلة فيها أصحابها الباقيين، ولما عرفتها وحبتها كنت لما أبعد عنها شوية ألاقيها بتعمل حاجات غلط؛ يعني تقف مع شاب من الشلة دي وتكلمه، ولما أعاتبها كانت تقول: بيبقى نفسي تاخد بالك مني وتبص ليّ ومش بلاقي حاجة أخليك تكلمني بيها غير الطريقة دي. عدت ثلاث سنين حب على مشاكل على خناقات بس في الآخر كان كل واحد يرجع ويتأسف للتاني ويوعده إن ده مش هيحصل منه تاني، وكان الحب بيجمعنا في الآخر ويصفي نفوسنا ولا كأن حاجة حصلت. في أول علاقتي بيها برضه صرّحت لي إنها كانت مع بنت عمتها بيخرجوا وعرفت واحد صاحب اللي كانت قريبتها بتقابله وارتبطت بيه... وأنا ما كنش في دماغي الحكاية دي؛ لأن طبيعي لكل إنسان تجربة، وكمان لأنها كانت مراهقة وده ما إدنيش الحق إني أعاتبها غير إني قفلت الموضوع ونسيته. من أيام اكتشفت إنها كدبت عليّ في حاجات في العلاقة اللي فاتت دي، وإنه كان بيبعت لها رسايل على الموبايل وأنا معاها وحاجات تانية ولما واجهتها باللي حصل ده!! قالت لي: ما كنتش برد على الرسايل وما كنتش باقول لك عشان ما أجرحكش وخفت تبعد عني وأنا مش غلطانة.
أنا دلوقتي في غربة وسافرت عشانها، بس لما بافكر في الكدب ده كله والحاجات اللي عملتها إنها تكلم حد عشان تغيظني أو كده بتعب أوي وبازعل جدا بافكر ليه كدبت عليّ وليه كل ده حصل؟ أنا مش عارف أعمل إيه أسامحها ولا إيه؟ أرجوكم أفيدوني أنا بحبها أوي وهتعب لو نسيتها لأني مش هاقدر أنساها؟ محمد مصطفى
صعب جدا صديقي إن أي حد غيرك يحدد لك طريقة سلوكك وكيفية تصرفك مع واحدة أنت بتقول إنك بتحبها أوي وما تقدرش تستغني عنها! يعني لو قلت لك إن الظواهر بتقول إن البنت دي سهل إنها تتكلم مع غيرك بطريقة تستفز غيرتك ورجولتك يعني غير سوية في سلوكها عشان بتحاول تصلح الغلط بغلط؛ يعني بتحاول تشدك برجل غيرك.. فهل حبك سيقبل هذا الحكم عليها؟!! وإذا قلت لك إنه ما دام أنت استحملت إنها تستفز رجولتك عن طريق غيرتك وأنت سكت تبقى المسألة بسيطة وصح وبكره تتعود، وبعد الجواز برضه أول ما تلف وشك عنها ترجع لعادتها عشان تلفت نظرك.. فهل كرامتك ستقبل هذا الكلام؟!! المسألة خاصة بك وحدك، وخاصة بترتيب أولوياتك تجاه هذه الفتاة، بمعنى هل تنوي الارتباط الجدي بها كزوج وزوجة أمام الله، وأمام الناس؟؟ إذا كانت الإجابة نعم أحبها وأنوي الارتباط الشرعي بها.. ساعتها ستكون نصيحتي لك أن تجلس معها وتكلمها بالعقل والمنطق فيما تحب وفيما تكره من كلامها وسلوكها، وأن تأخذ عليها عهداً أن لا تتحدث مع غيرك بهذه الطريقة التي لا تغيظك وتشد اهتمامك قدر ما تنتقص من كرامتها وكرامتك، وتضعها في صورة المستهترة التي همها ضرب رجل برجل آخر. وإذا كان جواب سؤالك أنك بتحبها صحيح، لكن موضوع الارتباط فيه لسه كلام وأخذ وعطا.. ستكون نصيحتي أعط نفسك فرصة لتكتشف مكنونات هذه الفتاة وطريقة تعاملها مع الرجل كزوج عليها القوامة التي هي الطاعة والاحترام؛ بمعنى تعرف وتتأكد هل هذه هي الفتاة التي تستحق أن تشاركك في قلبك واسمك وبيتك وولادك ولا أهو حب وكل حب وأنت طيب يا راجل يا طيب. ناقش نفسك صديقي بموضوعية على أن تعرف أن الحب حاجة والزواج حاجة ثانية، وأن المثل اللي بيقول يعمل من الفسيخ شربات مثل كاذب؛ لأنه هيكون شربات بالاسم أما الطعم فهو فسيخ برضه حادق وريحته زفرة... الخ.