النهارده هنقدّم لك طريقة عمل أومليت السبانخ بالجبنة، لكل أم بتدوّر على وصفات لذيذة وشهية تقدّمها لأطفالها على الفطار، يلّا بينا على المطبخ نشوف الطريقة مع بعض... أومليت السبانخ بالجنبة المقادير: * 4 بيضات * 2 ملعقة كبيرة لبن * 2 كوب أوراق سبانخ مقطّعة قطع صغيرة * ثمرة فلفل أحمر مقطّعة قطع صغيرة * 1⁄4 كوب جبنة شيدر مبشورة * 1⁄4 ملعقة فلفل أحمر حار * ملعقة صغيرة ثوم مفروم * ملعقة كبيرة زبدة * ملح وفلفل أسود الطريقة: 1- اخفقي البيض كويس مع الملح والفلفل الأسود والأحمر الحار والثوم واللبن. 2- سيّحي الزبدة على نار هادية، وضيفي عليها البيض وسيبيه على النار لمدة 5 دقائق. 3- بعد كده ضيف عليه السبانخ والجبنة وقطع الفلفل الأحمر الحار، وسيبيهم على النار لمدة 5 دقائق أو لغاية ما تلاقي إن البيض استوى والجبنة دابت.. وبألف هنا وشفا. وبكده تكون خلصت وصفتنا النهارده.. يا ريت تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،