أنا فتاة عندي 23 سنة، عملت حاجات غلط كتير قبل كده؛ زي مثلا إني أكلم أولاد، أو أتعرف عليهم، أو أقابلهم في أماكن عامة، أو تليفونات بس مجرد كلام مش أكتر من كده، بس مرة أتعرفت على دكتور من خلال الإنترنت، وأتكلمت معاه علشان أسأله في مشكلة جلدية عندي. أنا نيتي كانت كويسة؛ بس هو استغلني، وكلمني كلام مش كويس، وطلب إني أعمل في نفسي حاجة مش كويسة، وأنا ماكنتش فاهمة هو بيطلب مني إيه؛ كنت متخيلة إن دي حاجة تبع التشخيص أو المرض، ولما فهمت نواياه السيئة نصحته إنه مايعملش كده، وإن كده غلط، وأنا بنت محترمة وكويسة.
وبطلت أكلمه خالص، وكل الأولاد اللي كان ليّ بيهم صلة قطعت علاقتي معاهم؛ لأني كنت بحب واحد، وكنت مرتبطة بيه، وكنت باكلمهم وأنا معاه؛ بس لما أخدنا قرار الخطوبة وأتخطبت له قليت أوي في تعارفي على أي ولد؛ بس ممكن أكون مامنعتش خالص.
بس بعد الخطوبة بحوالي 6 شهور فعلا قطعت علاقتي بأي حد، وأي حاجة ييجي منها حاجة غلط؛ علشان كنت بحبه، ونفسي أتجوزه، وكنت عايزاه يثق فيّ.
بس مع الأسف هو ماكانش عنده ثقة فيّ، وكان دايما مقلق مني؛ حتى بعد ما تبت وحلفت له إني ماليش كلام مع حد، وإني مش عايزة غيره.
المهم قبل زواجنا بستة شهور دخل على حساب فيسبوك القديم بتاعي اللي كنت قفلته، وشاف كل الحاجات اللي فيه، وطبعا سمعني كلام سيئ جدا جدا؛ لدرجة إنه أتهمني بالزنا وإني مش بنت.
ودلوقتي خطوبتنا انتهت.. أنا نفسيتي مدمرة، أنا فعلا كنت إنسانة عملت أخطاء كتير؛ بس أنا والله محترمة، وبنت ناس محترمين، وكنت لما باغلط باندم وباتوب إلى الله، وهو متخيل إن أنا بنت من بنات الشوارع والكباريهات.
أكمل حياتي إزاي؟ والظلم اللي وقع عليه مني وكلامه ليّ؟ وإزاي أتوب إلى الله، وأطلب منه تعالى إنه يغفر لي، ومادفعش تمن أخطاء عملتها طول حياتي؟؟ أرجوكم ساعدوني. katk00taa