النهارده هنقدّم لك وصفة لذيذة أوي ممكن تقدّميها لأفراد أسرتك على العشاء، تعالي ندخل المطبخ مع بعض ونشوف هنعمل وصفتنا إزاي.. تارت بحشو الفلفل الملوّن والجبنة الموتزاريلا مقادير عجينة التارت: 2 كوب دقيق 2 صفار بيض ملعقة كبيرة سكر 1⁄2 كوب زيت زيتون كوب ميه مقادير حشو التارت: 3 ثمرة فلفل ألوان (أخضر وأحمر وأصفر) مقطّعة مكعبات صغيرة ثمرة بصل كبيرة مقطّعة مكعبات صغيرة ثمرة طماطم مقطّعة مكعبات صغيرة 1⁄2 فنجان صلصة طماطم 1⁄2 كوب جبنة موتزاريلا ملعقة كبيرة زيت زيتون ملعقة صغيرة زعتر ملح وفلفل أسود الطريقة: 1- اخفقي صفار البيض في طبق كبير، وبعد كده ضيفي عليه زيت الزيتون مع الاستمرار في الخفق، واخلطي الدقيق مع السكر كويس. 2- ضيفي صفار البيض والزيت على الدقيق والسكر واعجنيهم مع بعض كويس، مع إضافة الماء تدريجيا؛ وده علشان تحصلي على عجينة متجانسة. 3- افردي العجينة بالنشّابة على رخامة المطبخ، مع مراعاة رش الرخامة بشوية دقيق علشان العجينة ماتلزقش منك. 4- قطّعي العجينة في أحجام قوالب التارت اللي عندك، مع مراعاة دهن القوالب بشوية زيت أو زبدة علشان العجينة ماتلزقش في القالب. 5- سخّني الفرن على درجة حرارة متوسطة، ورصّي القوالب في صاج، ودخّليه الفرن لمدة نصف ساعة أو لغاية ما تحصلي على اللون الدهبي. 6- طلّعي قوالب التارت من الفرن، وادهنيها بصلصة الطماطم، واخلطي باقي مقادير الحشو مع بعض كويس، وحطّيهم داخل التارت، ودخّليهم الفرن لمدة 10 دقائق، وبعد كده طلّعيهم وقدّميهم.. وبألف هنا وشفا. وبكده تكون خلصت وصفتنا النهارده.. ماتنسيش تجرّبيها وتبعتي تقولي لنا على النتيجة.. سلاااااااااااام،،،