أنا عندي واحدة صاحبتي باموت فيها وكنت باحسّها كل حياتي، وإن أنا كل حياتها، عمرنا ما اختلفنا ولا زعلنا من بعض، كنا أكتر من الإخوات، كنا بنعرف عن بعض كل حاجة، اتعرفت على واحد على الشات وقابلها، زعقت معاها وعيّطت قدامها انهارت؛ لأنها صغّرت من نفسها مع واحد، حتى رفض إنه يصارحها بحبه، ماكانش بيقول لها، كل اللي بيعمله اهتمام زايد علشان يوقّعها فيه. أنا نفسي تحب وترتبط بس مش كده لأنه ولا أخد خطوة إنه يتقدم لها، وهو مخلّص وشغال ومستواه المادي كويس، وبعدها قالت لي مابقاش بيننا حاجة ولا بيكلمني، صدّقتها واكتشفت بعدها إنها لسه على علاقة بيه من خلال مسجات هي بتبعتها له فيها "بحبك" و"وحشتني". قلت لها من بعيد عن واحدة صاحبتنا أنتيمتها كذبت عليها ولا قالت لي، وسألتها مرة صريحة قالت لي لا ماباكلمهوش نهائي، هي تتصل وأنا أردّ عليها وكلامنا عادي جدا إحنا ماكنّاش بنسيب بعض طول النهار دلوقتي تقريبا بنتكلم كل 4 أيام، مابقيناش بنروح لبعض واحنا كنا عند بعض طول النهار. ماسألتش نفسها إيه تغيري ده من ناحيتها ولا هو ده اللي هي عاوزاه، وأنا مش قادرة أصارحها باللي عرفته، مش قادرة أواجهها ومش عارفة هتقول إيه، وأنا هاقول لها إيه، أنا خايفة تحس إن خطوبتي هي اللي شاغلاني عنها، أو ده سبب بعدي عنها، وتكون زعلانة من جواها، وخايفة تكون مش عاوزاني، ومش فارقة معاها، وخايفة يكون الولد ده بيضحك عليها، بس مش عارفة أعمل إيه.. دلوني أرجوكم. ahla.pt صديقتي... هل تدركين معنى الصداقة وحقوقها عليكِ؟ من كلامك على صديقتك من الواضح إنها مش صديقة عادية بالنسبة لك وإنك كنتِ معاها على طول، وإنها كانت بتحكي لك كل حاجة عن حياتها.. وشيء طبيعي إن أي شخص منا معرض للخطأ، وهي فعلا أساءت الاختيار، خاصة إن هذه الطريقة في التعارف على الأشخاص من خلال الإنترنت خطأ وأنا ضدها بأي شكل من الأشكال. وكان يجب عليكِ عزيزتي إنك تتحدثي معها في البداية بلطف، وإنك تفهّيمها إن التعارف بالطريقة دي بيقلل جداً من البنت، وتقنعيها من غير ما تتخانقي معاها. وفي نهاية رسالتك إنتي بتقولي إنك اتخطبتي، وفي نفس الوقت أكيد اتشغلتي عنها، وأنا مش ضدك، ولكن عليك التفكير فيها، وإنك كنتِ أقرب حد ليها، وفجأة وبطبيعة الحياة الدنيا أخدتك عنها شوية. يجب عليك التحدث معها أكثر من مرة وبهدوء، وقربي منها تاني ده حق صديقتك عليك، إنك تكوني جنبها ومعاها لكن بُعدك عنها ده وبدون أي أسباب خطأ جدا. لازم تكوني معاها حتى لو هي مش مقتنعة برأيك لازم تفضلي تتكلمي معاها، وتفهّميها إن العلاقات اللي بتكون بالطريقة دي مش بتستمر. وإن الشخص ده لو فعلاً عايزاها لازم يكلّم أهلها، وخاصة إن ظروفه كويسة، وفي الغالب العلاقات اللي بتكون من النوع ده مش بتنتهي نهاية سعيدة. صديقتي.. كلمي صاحبتك تاني وفهّميها إنك مش زعلانة منها وإنك بس خايفة عليها وتتمني لها الخير، وفهّميها إنك هتكوني معاها على طول وعايزاكي تعرفي إن الخناق معاها مش هيحل المشكلة بالعكس. اتكلمي معاها إن الولد ده ممكن يكون بيضحك عليها وممكن يؤذيها وإنك مالكيش أي مصلحة إن الموضوع ينتهي، لكن إنتي خايفة عليها وعلى مستقبلها، ولازم تعرف إن الولد ده لو عايزها بجد لازم يتكلم مع أهلها، والموضوع يكون رسمي، غير كده يبقى بيضحك عليها، وصدقيني الحل مش إنك تسيبيها لوحدها لكن كلامك معاها هيجيب نتيجة إن شاء الله وعلى الأقل وجودك جنبها في مصلحتها ولو إنتي فعلاً بتحبيها وبتراعي حقوق الصداقة لازم تقفي جنبها. وأتمنى من الله أن يوفقها للخير إن شاء الله.
