بنات كتير بعتوا لنا يسألوا عن مشكلات في بشرتهم وإزاي ممكن يعالجوها.. وإمتى ممكن يلجأوا لأخصائي جلدية، وعلشان نردّ على كل أسئلتكم معانا النهارده في حلقة "أبيض وألوان مع ريهام"، طبيبة الأمراض الجلدية والتجميل د. هديل جهاد، واللي هتكلمنا عن البوتوكس والحقن بالفيلر، وإمتى نبدأ نستخدم العلاجات دي.. وإزاي نحافظ على بشرتنا في سن مبكرة.تابعونا،،، إيه هو البوتوكس البوتوكس هو مادة بتستخدم في حقن العضلات المسببة للتجاعيد والكرمشة، وبعد ما يتم حقن هذه العضلات بالبوتوكس بيساعدها على الارتخاء، وبتخلي الوجه مستريح أكتر ومافيش أثر للتجاعيد، وده بنستخدمه لحقن المنطقة العليا فقط في الوجه يعني عند منطقة الجبهة والمنطقة بين الحاجبين وجانب العين وتحت العين، لكن مابيستخدمش في منطقة الخدود أو الفم، وكمان الرقبة ممكن يستخدم لحالات معينة لكن مش كل الحالات. وهو علاج غير دائم، وبيستمر مفعوله في الفترة بين 4 : 6 شهور، وبيتحقن كل فترة. إمتى نبدأ نستخدم البوتوكس كعلاج وبالنسبة للبنات اللي بتسأل إمتى ممكن نبدأ نحقن بوتوكس؛ فأنا شايفة إنه كل ما كان بدري كل ما يبقى أفضل؛ لأن لو تعبيرات الوش جامدة شوية ممكن مع الوقت بتحفر في الجلد نفسه وبتسيب أثر، حتى بعد ما يتم حقنها بالبوتوكس بتحتاج علاج تاني علشان الحفر أو الخطوط دي تتشد، فوقت ما نبدأ نحس إن تعبيرات وشنا هتسيب علامة يبقى لازم نحقنها بالبوتوكس. الآثار الجانبية للبوتوكس طبعا زي أي علاج تاني البوتوكس بيكون له آثار جانبية، ولكن ده بيتوقف على الدكتور المعالج ومدى خبرته وكفاءته في الحقن؛ لأن حقن البوتوكس بيكون له مقاسات معينة ومقدار معين، يعني مثلا لو أتحقن في عين زيادة عن العين التانية ممكن يخلي حاجب مرفوع عن التاني وهكذا، لكن الشيء المطمئن إن مفعوله بيستمر 4 شهور فقط، وبعدين هيرجع تاني عادي بعد ما تخلص المدة دي. كمان كتير من البنات بتخاف من حقن البوتوكس؛ لأنها بتحس إن ده هيخلي تعبيرات الوش ثابتة كأنها لابسة ماسك، وده طبعا زي ما قلنا إننا ماينفعش نحقن به كل منطقة في الوش واللي ممكن لما تتحقن يبقى شكلها ونتيجتها غير مقبولة زي مثلا المنطقة تحت الحاجب أو عند الفم؛ لأن دي مابتخليش فيه حرية في التعبير بالحاجب أو في الابتسامة، كمان بعد فترة العضلات دي بتضعف ومش بينفع معاها بوتوكس أو غيره.
إيه هو الفيلر بالنسبة للفيلر فده بنستخدمه للتجاعيد اللي في الخدود، وده عبارة عن تعبئة للجلد، وكانت في الأول التعبئة دي بمادة الكولاجين لكن بعد كده بقت بمادة الهايلرونيك أسيد؛ ودي أكتر مادة آمنة حاليا، بتستخدم علشان نملأ الكسرات اللي جنب الشفايف والخدود واللي ممكن تخلي شكلنا أكبر في السن، لكن بعد ما نعمل الفيلر بيخلي الوش صافي ومشدود، وبيستمر مفعوله فترة طويلة، وكل مدة بيزيد مفعوله أكتر. نفس المادة دي بنستخدمها لحقن الشفايف، وطبعا لازم ناخد بالنا إننا مانزودش أوي في حقن الشفايف؛ لأن بيبقى شكلها غريب ومش مقبولة نهائي، يعني مثلا الممثلات الغربيات دايما بيستخدموا الحقن ده ولكن بشكل صحيح؛ لأن حقن الشفايف بيستخدم علشان يوصل الشفايف لنسب معقولة وطبيعية، وأحيانا فيه بنات بتكون عندها شفة أكبر من التانية أو بتكون رفيعة جدا، لدرجة إنها بتكون مش باينة، وفي الحالات دي بنحقنها فيلر علشان يخلي شكلها أحلى وفي نفس الوقت طبيعية. نتيجة الفيلر بتظهر تقريبا في نفس اليوم، وهي آمنة جدا، والشيء الجيد في الموضوع ده هو إنه مافيهوش جراحة أو تخدير، ولو حصل أي حاجة غير متوقعة بتكون تحت السيطرة، إلا في حالة إنه حدثت حساسية مفاجأة ودي حاجة مانقدرش نتوقعها قبلها، ودي من الآثار الجانبية لحقن الفيلر بالإضافة لمدى حساسية الطبيب ومدى قدرته على ملاحظة العيب اللي في الوش والنسب اللي الوش هيحتاجها علشان يبقى متجانس تماما، ودي بتحتاج موهبة للدكتور بالإضافة للدراسة والخبرة. فيه خطأ شائع إن الخدود السفلية أو اللي عند منطقة الذقن وحولها ممكن نحقنها علشان تبقى منفوخة، وده طبعا شيء غير صحيح؛ لأن الخدود بتتحقن عند منطقة عظمة الخد أو المثلث اللي بيكون تحت العين فقط، لكن لو الخدود اتحقنت من تحت هتخلي الشكل غير طبيعي زي الشخص اللي بيُعالج بالكورتيزون اللي بيسبب انتفاخ الوجه كله.
إضغط لمشاهدة الفيديو: إمتى نقدر نستخدم البوتوكس والفيلر طبعا مش مجرد ما نبدأ ندخل في الثلاثينات نلجأ للعلاجات دي على طول، ولكن فيه مراحل تانية ممكن نمر بها؛ وهي مرحلة العناية بالبشرة؛ بمعنى إننا نستخدم لبشرتنا الحاجات اللي بتكون محتاجاها زي مثلا: الصن بلوك: وده من غيره هيكون البوتوكس والفيلر عديم النفع؛ لأن الجلد هيكون محروق ونسبة التجاعيد كبيرة جدا مانقدرش نتحكم فيها، وعلشان كده مهم إننا نستخدم الصن بلوك؛ بحيث إننا لما نلجأ للعلاج بالبوتوكس أو الفيلر تكون البشرة مستعدة وجاهزة ومستجيبة للعلاج. والصن بلوك اللي بانصح بيه هو "ماط فورميلا" وهو مخصوص للبشرة الدهنية؛ لأنه مابيحتويش على أي دهون أو زيوت ويبيقى لونه شفاف، وده بيتحط بعد ما نغسل وشّنا قبل ما نحط أي ماكياج، ولو هتحطي كريم مرطب يبقى تحطي الكريم الأول وبعدين الصن بلوك، يعني تحاولي تخليه آخر طبقة كريم على الوش؛ لأنه بيعمل حماية ووقاية للبشرة. والهدف من الصن بلوك مش إنه يحمي من أشعة الشمس الجامدة في الصيف؛ لكن الهدف هو الوقاية من الأشعة فوق البنفسجية الناتجة من الشمس سواء في الصيف أو الشتاء؛ لأن الأشعة دي بتدمر خلايا البشرة شكلا ووظيفيا، والأشعة دي بتحول خلايا الجلد وتسرطنها، وعلشان كده سرطان الجلد منتشر جدا في أوروبا رغم إن الشمس فيها مش قوية، ولكنها بتحتوي على الأشعة فوق البنفسجية بنسبة كبيرة، يمكن الأشعة دي مش موجودة عندنا بنسبة عالية ومش بتسبب سرطان الجلد، ولكنها بتأثر على الملامح وتغير شكل الجلد. كريم بديل البوتوكس: الكريم التاني اللي ممكن نستخدمه قبل ما نبدأ علاج البوتوكس والفيلر هو كريم بديل للبوتوكس؛ لأنه بيعمل نفس التأثير وهو إنه بيرخي العضلات المسببة للتجاعيد، ولكن طبعا حقن البوتوكس بيكون تأثيره أكبر وأسرع وبيعمل شلل للعضلات، ولكن الكريم بنستعمله في مرحلة مبكرة شوية علشان يريح العضلات، يعني مثلا لو بنت في العشرينات وتعبيرات وشها جامدة تقدر تستخدم الكريم عادي، وده هيأخر السن اللي ممكن تحتاج فيه لحقن البوتوكس. كريم تقشير: كمان بنات كتير بتشتكي دايما إن وشها لونه مش موحد أو إنه فيه نمش أو فيه مناطق غامقة، والحالات دي بنستخدم لها كريمات مقشرة، وهنبقى نتناول موضوع التقشير ودرجاته وأنواعه في حلقات قادمة، ولكن الكريمات المقشرة دي أبسط حاجة نقدر نستخدمها، وهو يعتبر مقشر لطيف للبشرة بيستخدم يوميا علشان يخلص البشرة من البُقع، وبيعمل تجديد دايما لخلايا البشرة، ويعمل على إزالة للخلايا الميتة أو المحروقة ويطلع خلايا جديدة، وهو آمن جدا في الاستخدام. مقوي أظافر: من المشكلات الشائعة أيضا للبنات هو موضوع الأظافر وإنها مابتطولش أو إنها بتتكسر، ودي من المشكلات اللي بتضايق كتير من البنات، وبتضطر إنها تقص أظافرها علشان تتفادى المشكلات دي، وعلشان نعالجها لازم نستخدم مقوي أظافر، وده غير المنتجات اللي بتستخدم لتجميل الأظافر أو المادة الملمعة اللي بندهنها على الأظافر، ولكن ده كريم بنحطه على رأس الأظافر أو منطقة التقاء الأظافر مع الجلد؛ والمنطقة دي هي المسئولة عن إنتاج الأظافر، والكريم ده بيستخدم علشان يقويهم ويطلع أظافر صحية وأقوى مع الاستمرار في الاستخدام. من الحاجات المهمة اللي بأنصح البنات بيها هو إننا مانملّش إن العلاج ممكن يطوّل؛ لأن خلايا البشرة بتتغير بالسنين والعلاج بيحتاج شهور، فلازم نستمر في العلاج لحد ما يجيب النتيجة اللي إحنا عايزينها، يعني مش ننتظر إن النتيجة تبان بشكل فوري وسريع. إضغط لمشاهدة الفيديو:
خلصت حلقتنا النهارده استنونا في حلقات جديدة وابعتوا لنا كل أسئلتكم وطلباتكم في كل ما يخص الصحة والجمال سلام،،،
