شفنا في الحلقة اللي فاتت إزاي نوزّع كريم الأساس والكونسيلر والبودرة السايبة على بشرتنا بطريقة صحيحة؛ علشان يعطونا في النهاية شكل طبيعي وجذاب... وفي حلقتنا النهارده هنعرف طريقة رسم العيون بخطوات مفصّلة، وهنعرف أنواع ماكياج العيون المختلفة... نصائح ع الماشي × الميك اب - أهم حاجة في الميك اب إننا نخلّص المراحل بتاعته بالترتيب، يعني تبدئي بتوزيع كريم الأساس، وبعد كده ترسمي عينيكي، وبعد كده توزّعي البلاشر أو أحمر الخدود؛ لأن الترتيب له دور كبير جدا في إن الميك اب يطلع بشكل كويّس.
- لازم يكون عندك الألوان الأساسية في الميك اب وخاصة ماكياج العيون، يعني مثلا لازم يكون عندك اللون الأوف وايت، والأسود، والرمادي، والبني بكل درجاته، والألوان الترابية؛ زي: الطوبي، والزيتي، والنبيتي. - قبل ما تبدئي في عمل ماكياج، لازم تكوني عارفة كويس أوي إنتي بتعمليه لأي وقت وهتروحي به فين، يعني مش معقول إنك تستخدمي آي شادو بيلمع أوي وإنتي نازلة الصبح؛ لأن ده بيكون مناسب أكتر للسهرات.
إضغط لمشاهدة الفيديو: ماكياج عيون بألوان ترابية النهارده هاعمل لكم ماكياج للعينين مناسب لفترة الصبح، وهنستخدم فيه ألوان ترابية شوية؛ علشان تليق مع كل ألوان البشرة، سواء كنتي فاتحة أو سمراء أو خمرية، ودي الخطوات بالتفصيل... 1- توزيع البودرة السايبة.. أول خطوة هتعمليها هي إنك توزّعي بودرة سايبة على المنطقة اللي تحت العين، علشان لو فيه آي شادو وقع تحت عينيكي يبقى سهل عليكي إنك تزيليه بعد كده. 2- توزيع الآي شادو.. بعد كده بتوزعي لون آي شادو فاتح على منطقة الجفن العلوي كله، وبتبدئي بعد كده تحددي الزاوية الخارجية للعين بلون آي شادو غامق، وفي الزاوية الداخلية بتوزعي لون فاتح؛ علشان يوسّع مساحة العين أكتر؛ لأنك لو حطيتي لون غامق على الزاوية الداخلية للعين بتخلي شكلها يبان أضيق. بعد ما تخلّصي توزيع الآي شادو بتدريجاته، بتزيلي البودرة السايبة اللي حطيتيها تحت العين باستخدام فرشاة البلاشر. 3- رسم العيون بالكحل.. بعد كده تبدئي ترسمي عينيكي بالكحل، فيه ناس كتير بتبعت تقول لي الكحل مش بيليق عليّ، لكن أنا عايزة أوضح إن الكحل بيليق على كل أشكال العيون؛ لأن إحنا ملامحنا شرقية، والملامح دي بيناسبها الكحل جدا، ولو إنتي مابتحبيش الكحل ممكن تحددي عينيكي بآي شادو أسود، لكن أنا باشوف إن الكحل بيدي نظرة عميقة للعين، وبيخلّي شكلها جذاب أكتر. بس لازم وإنتِ بترسمي عينيكي بالكحل، تراعي إنك نرسمي الخط قريب أوي من جفن العين، وتدمجيه مع الجفن والرموش علشان يدي شكل طبيعي أكتر، وبعد كده بترسمي الكحل جوه عينيكي. ومش لازم تقيّدي نفسك بالكحل الأسود يعني ممكن تستخدمي ألوان؛ زي: الزيتي والأزرق والأخضر؛ لأن الألوان دي بتدى شكل حلو للعين وبتفتح لون العين من جوه. 4- الماسكرا.. تعتبر الماسكرا من الحاجات المهمة جدا في ماكياج العيون، يعني ممكن تكتفي بالماسكرا بس على عينيكي، وهتديكي شكل حلو وطبيعي، بس أهم حاجة إنك تستخدمي ماسكرا نوعها كويس؛ علشان ماتضعفش الرموش وتوقّعها، وأهم حاجة كمان إنها ماتكونش ضدّ الميه؛ لأنها بتطلع بصعوبة حتى بمزيلات الماكياج، وطبعا أحلى لون ماسكرا هو الأسود أو البني الغامق، أما الماسكرا الملونة بيبقى ليها استخدامات خاصة جدا، وممكن تحطيها من على طرف الرموش؛ لكن أنا مش بافضّلها أوي لأنها بتدي شكل مصطنع، وأهم حاجة في الماكياج إنه يدي شكل حلو وطبيعي. والماسكرا فيه منها أنواع كتيرة؛ فيه النوع المكثّف اللي بيتقل الرموش، وفيه النوع اللي بيطول الرموش، والاختيار بيرجع لك على حسب شكل رموشك وعينيكي، يعني لو رموشك قصيرة يبقى تستعملي الماسكرا اللي بتطوّل الرموش، ولو رموشك خفيفة تستعملي الماسكرا المكثفة. ولما تيجي تحطي الماسكرا على رموشك، بتسندي إيدك على التسريحة أو على أي سطح ثابت قدامك، وبتبدئي توزعيها على رموشك وإنتي موجهة عينك لتحت. 5- تنظيف ورسم الحواجب.. آخر خطوة هنعملها في ماكياج العيون هي تنظيف الحواجب من البودرة والآي شادو الزيادة، وممكن لو فيها فراغات تمليها باستخدام البودرة الخاصة بالحواجب.
إضغط لمشاهدة الفيديو: اقرأ أيضا: * جمالك بالألوان مع جيلان.. ماكياجك من الألف للياء
وبكده نكون عملنا ماكياج طبيعي وهادي للعيون.. والماكياج ده مناسب لفترة الصبح أو بعد الظهر.. تابعونا في الحلقات اللي جاية علشان نكمل باقي خطوات الماكياج بالتفصيل.. سلام،،،
