أحب أشكر كل من ساهم في نجاح وتميّز الموقع، وبجد محتاج أوي إنكم تساعدوني في مشكلتي.. أنا من 5 سنوات كنت حبيت وارتبطت ببنت عمتي، وانفصلنا سنة تقريباً؛ بس كنت بحبها جداً وهي كمان.. وكانت علاقتنا قوية جداً؛ وكان فيه بينا اتصال قوي (قُبلات ولمسات فقط)، بجد كنت باحس وأنا معاها إني مالك الدنيا، وهي كانت بتعمل المستحيل برضه علشان تشوفني. أنا كنت باشوفها مرة واحدة في السنة في إجازه الصيف؛ لأنها كانت عايشة بره، ولما جت تدرس في مصر، ناس كتير اتدخّلوا من العيلة وفرّقونا عن بعض.. سيبتها علشان المشاكل كِترت أوي؛ مع إني كنت بحبها. وحاولت أرجع لها؛ بس مالقيتش منها أي ردّ إيجابي؛ بالعكس أنا حسيت إنها ماصدّقت.. وبعد 3 شهور لقيتها اتخطبت لواحد، وإنها بتحبه.. وبعدين حصل بينهم مشاكل، وبقِت تيجي تحكي لي على اللي بيحصل معاها، وبتفضفض لي بأسرار، مامتها نفسها ماتعرفهاش ولا حد في العيلة. وبعد كام شهر فسخوا الخطوبة وسابته؛ بس أنا عارف إنها لسه بتحبه أو متعلقة بيه.. ورحت قلت لها أنا لسه بحبك، قالت لي: عارف إنت امتى حبتني بجد؟ لما أنا شيلتك من دماغي.. لكن الكلام بينّا عادي كأن مافيش حاجة حصلت وكأننا أصحاب كويسين مع بعض.. أنا مش عارف، هل ممكن الحب اللي كان بينّا يتحول لصداقة؟ أنا مش عارف أعمل إيه، مش قادر أبطّل تفكير فيها، مش عارف أنا بحبها لسه برغم كل اللي حصل؟ وهل دي حب عمري، ولازم أعمل المستحيل عشانها؟ ولا أنا مشدود ليها جنسياً؟ وإيه الفرق بين الحب والجنس؟