كل سنة وإنت طيب رمضان ع الأبواب.. هلّت الروايح.. يا ترى ده عمر جاي ولا ده عمر رايح.. المهم.. السنة دي هنصوم.. حسب البيان والمرسوم.. ولّا حد نظره حلو.. هيشوف الهلال.. عموماً.. أنا اشتريت أنبوبة بوتاجاز استبن.. وفوانيس صيني للعيال ومراتي شاطرة مدبرة.. مخللة لمون وزتون.. وشايلة شوية حاجات في شوال.. ودفعنا قسط المدرسة.. فاضل الكهرباء والصيانة والزبال.. شوف.. أول يومين نفطر زفر.. ما هو كل سنة وإنت طيب.. ده برضه احتفال.. ونكمل بعد كده بالفوازير.. والمسلسلات.. وأكيد الدوري العام شغال.. وتتقضي بإذن الله وتبقى زي الفل ويمشي الحال.. وأهو يوم نفطر عند حماتي ويوم إحنا وحماتي نفطر عند عمي كمال.. على فكرة بيتنا القديم جاله قرار إزالة تفتكر هيتزال.. يا عم ده جدك اللي بناه.. ولو كان خايب.. كان راح في الزلزال.. إنما أنا عندي سؤال.. هو إحنا داخلين على رمضان.. ولا دي حرب وقتال.. ما هو لو العيش في الفرن.. والزيت عند البقال.. والغاز مش زي ما سمعنا.. واتكتب واتقال.. والدروس الخصوصية جدعنة.. لله وللوطن.. واللحمة بريال.. كنا فكّرنا في حاجات أهم.. وعرفنا مصر راحت فين.. وارتاح البال.. لَا احْسَن بجد بجد.. غيابها طال.. كل سنة وإنتم طيّبين.. عن المصري اليوم بتاريخ 4 أغسطس 2010