نضارة وجمال البشرة من أكثر الحاجات اللي بتشغل تفكير كل البنات، وخصوصاً إن البشرة النضرة والصحية بتعكس جمال وحيوية وشباب الوجه، من غير ما نحتاج إننا نستخدم مستحضرات تجميل كثيرة علشان نداري عيوب البشرة.. وخصوصاً إن في الصيف والحر الشديد اللي إحنا فيه، الجسم بيفقد كمية كبيرة من المية، وده بيخلي البشرة بتكون باهتة وشكلها جاف وغير نضرة.. بالإضافة إلى إن كثير مننا بيحصل له اضطراب في مواعيد نومه، وبنلاقي نفسنا بنسهر، وطبعاً الناس اللي بتشتغل بتضطر إنها تصحى من بدري علشان تروح الشغل، وده طبعاً بيزود مشاكل البشرة اللي ممكن نتعرض لها.. ودلوقتي هنعرف إزاي نتجنب مشاكل البشرة من خلال تنظيمنا لعاداتنا اليومية.. النوم فترات كافية.. لبشرة شباب على طول النوم لفترة كافية من 7 ل9 ساعات خلال اليوم، بيكون له مفعول كبير في الحفاظ على شباب البشرة، لإن أثناء فترة النوم الجسم بيتخلّص من السموم اللي بتأثر على نضارة وصحة البشرة، بالإضافة إلى أن النوم بيزود من قدرة خلايا الجلد على التجدد، وبالتالي النوم بيحافظ على جمال ونضارة وصحة وشباب البشرة، وكمان بيقلل من فرصة ظهور الهالات السوداء حول العينين. التفاح.. من أكثر الفواكه المفيدة للبشرة فيتامين (أ).. لمقاومة جفاف البشرة فيتامين (أ) من الفيتامينات المهمة والمفيدة جداً للحفاظ على نضارة ونعومة البشرة؛ لإنه بيقاوم إصابتها بالجفاف وبيساعد على تجديد خلايا البشرة، ومن ضمن الأغذية اللي بتحتوي على نسبة كبيرة من فيتامين (أ) الخس والبقدونس والسبانخ والجزر ومنتجات الألبان والكبدة والبيض. شرب الماء.. للتقليل من انتفاخ العينين طبعاً كلنا عارفين إن شرب المية والسوائل، حاجة ضرورية للحفاظ على نضارة البشرة، لكن للأسف كثير منا مش بيركز على شرب المية. وده طبعاً بيسبب مشاكل كثيرة للجسم والبشرة، وبيرفع نسبة الأملاح في الجسم وده بيكون سبب لانتفاخ المنطقة تحت العينين، علشان كده لازم نهتم بشرب المية والعصاير الطبيعية بكميات كبيرة. الفاكهة الطازجة.. لصحة بشرتك مفيش شك إن كلنا بنفضّل أكل الحلويات اللذيذة، لكن مش لازم ننسى الفاكهة الطازة لإن لها فوايد كبيرة جداً وبتحافظ على صحة البشرة وعلى تألقها وحيويتها، وبينصح خبراء التغذية دايماً بضرورة الحصول على ثمرتين فاكهة على الأقل يومياً، ومن أكثر الفواكه المفيدة للبشرة هي المشمش والتفاح والفراولة والشمام. ودلوقتي هقدم لكم مجموعة من الماسكات الطبيعية 100%، لعلاج بعض مشاكل البشرة...
دقيق الشوفان له فوائد كثيرة جداً للبشرة والجسم ماسك الشوفان.. لنظافة البشرة دقيق الشوفان له فوائد كثيرة جداً للبشرة والجسم، وبيدخل في ماسكات كثيرة، والماسك اللي هنقول عليه دلوقتي بيستخدم لتنظيف البشرة وإزالة الشوائب والترسبات.. المكونات: * ملعقة كبيرة شوفان * ملعقة كبيرة عصير خيار الطريقة: اخلطي الشوفان مع عصير الخيار للحصول على عجينة متماسكة، وبعد كده افردي العجينة على بشرتك وسيبيها لمدة 15 دقيقة، وبعد كده اشطفي وشك بمية باردة. ماسك البيض.. لترطيب البشرة الجافة المكونات: * صفار بيضة * ملعقتين زيت زيتون * ملعقة دقيق * ملعقتين لبن الطريقة: اخلطي المكونات دي كلها مع بعضها، وبعد كده حطيها على وشك وسيبيها لمدة ربع ساعة، وبعدين اغسلي وشك بالماء الدافئ أكثر من مرة. ماسك البطاطس.. لتفتيح البشرة المكونات: * ثمرة بطاطس * لبن الطريقة: 1- اسلقي البطاطس واهرسيها، وبعد كده اخلطيها مع اللبن في الخلاط لغاية ما تبقى ناعمة. 2- افردي الخليط على وشك، وسيبيه لمدة نصف ساعة لغاية ما ينشف على بشرتك. 3- بعد كده اغسلي وشك بالماء الدافئ ثم بالماء البارد.
حطي شرائح الخيار على المنطقة حول العينين وسيبيها لمدة 20 دقيقة الخيار.. للتخلص من الهالات السوداء من المعروف أن الخيار له فوائد صحية كثيرة، لإنه بيعتبر قابض لمسام البشرة، وبيعمل على تفتيح البشرة والتخلص من الهالات السوداء تحت العينين، وللتخلص من الهالات السوداء، حطي شرائح الخيار على المنطقة حول العينين وسيبيها لمدة 20 دقيقة وبتكرري الطريقة دي كل يوم بالليل قبل ما تنامي. وده كمان ماسك بالخيار بيساعد على تفتيح البشرة ومنطقة الهالات السوداء... المكونات: * نصف كوب خيار مبشور * بياض بيضة * ملعقتين لبن الطريقة: بنخلط المكونات كويس مع بعضها، وبنفرد الخليط على بشرتنا ونسيبه لمدة 20 دقيقة وبعد كده نشطف وشنا بمية فاترة. زيت الزيتون.. لترطيب الشفايف الشفايف من أكثر الحاجات اللي ممكن تتأثر بدرجات الحرارة العالية ونقص كمية المية في الجسم أثناء الصيام، علشان كده لازم نهتم بترطيبها كل يوم باستخدام زبدة الكاكاو أو البلسم الخاص بالشفايف. وممكن تستخدمي زيت الزيتون في ترطيب شفايفك بإنك تدهنيهم بكمية صغيرة من زيت الزيتون الدافئ، ويا ريت لو تكرري الموضوع ده كل يوم قبل ما تنامي. الليمون والجلسرين.. لتشققات القدمين لو كنتي بتشتكي من جفاف وتشقق في القدمين، ممكن تعملي الطريقة دي وهي إنك تحطي قدمك في مية دافية فيها كمية من الملح، وسيبيهم في المية لغاية ما تحسي إن الجلد بقى طري، وبعد كده افركي الكعبين بالحجر، وبعدين نشفيهم كويس، وادهنيهم بخليط من الليمون والجلسرين بكميات متساوية. ولغاية هنا يكون خلص عددنا النهارده... وفي انتظار تعليقاتكم... إلى اللقاء،،،
