أنا مش عارفة أبدأ منين؛ بس أنا حاسة إني مش عارفة آخد قرار صح أبداً. دلوقتي أنا واقعة في مشكلة.. أنا بحب واحد جداً إلى أبعد الحدود، وهو إنسان كويس جداً، وبيحبني برضه؛ بس حصل عنده ظروف في بيته ومش هيعرف ييجي يتقدم ليّ حالياً. وأنا جالي عريس، وده اللي كنت خايفة منه جداً.. هو جاهز من كله؛ عنده شقة وشغل وعربية.. وبالنسبة لأهلي تُحفة ولُقطة. طبعاً أنا قعدت معاه؛ بس مش استريحت معاه خالص؛ بس خايفة أكون ضيّعت من إيدي واحد كويس.. وباقول لنفسي إن الفرصة مش بتيجي إلا مرة واحدة بس. مش عاوزة أظلم التاني معايا علشان هيبقي حرام عليّ لأني بافكّر في التاني؛ بس أنا بجد اتكلمت معاه علشان أهلي مش يقولوا بارفض من غير سبب، ولأني عارفة إن ما فيش نصيب، ومش هنتجمّع تاني أنا واللي بحبه خالص؛ فقلت أدي لنفسي فرصة تانية؛ بس خايفة أظلم التاني معايا. يا ريت عاوزة حل منكم، وتقولوا أعمل إيه؛ مع العلم إني صليت استخارة؛ بس مش ظهر ليّ حاجة.. آسفة على الإطالة.