أنا متجوزة بقالي سنة، اتعرفنا على بعض في الجامعة من 3 سنين، عرفنا بعض كويس وقررنا نتجوز، لكن كان فيه مشاكل في الجواز مع أهلي، لأن والدتي ووالدي منفصلين من 7 سنوات، وكانوا بيعاندوا مع بعض على حسابي، فأنا قررت إننا نتجوز من ورا أهلي، وأهلي عرفوا بعد 4 شهور. المهم جوزي كان كويس أوي معايا في الأول، وبعدين بدأ يتغير، يبقى كويس شوية وشوية يبقى زي الزفت، بس بصراحة أنا تعبت، هو دايما متعصب مني، وبيهزقني وبيذلني بأهلي، ودايما يشبهني بأمي علشان أمي تصرفاتها سيئة وعملت حاجات حرام كتير، بس أنا عمري ما كنت زيها، لحد ما بقيت خايفة يضيع مني أو يتجوز عليّ أو يكرهني. هو مد إيده عليّ وشتمني وسكتّ، وحماتي بتتكلم معاه كتير وتقول له كده غلط، لكن هو مقتنع إنه بيربيني من جديد، وعلشان كده دايما بيعلق على أي حاجة في البيت لما يبقى متضايق مني، وأنا بدأت أحس إن حبه ليّ بيقل، أنا قلت له إني رخّصت نفسي معاه، ومابقاش عايز يخرج معايا أو يكلمني أو يطّمن عليّ طول ما هو بره البيت، ده غير إن كل ما بنخرج مع بعض لازم نتخانق، وكل شوية يقول لي أنا مش عارف إنتي هتربي عيالنا إزاي.. إنتي عنيدة ومابتسمعيش الكلام، وأنا مابعملش ده خالص. هو عمره ما بيسمع مني، حتى لما بنتخانق ونتصالح مش عايز يسمع مني إيه اللي زعلني، أو يفهم أنا مالي، هو يعاتب وخلاص، ولما أتكلم يتخانق تاني، وأنا بقيت أكتم جوايا لحد ما تعبت. أنا ماليش حد غيره وعايزاه يفضل جنبي، وكمان إحنا لسه ماخلفناش علشان إحنا لسه بندرس، وهو أكبر مني بأربع سنوات، يعني دماغه أكبر مني، أتمنى الرد علشان أنا مابقتش مستحملة.
rose
صديقتنا العزيزة.. الحقيقة إنك عندك أكتر من مشكلة مع جوزك مش مشكلة واحدة، فكون إنكم وصلتم للمرحلة اللي بيمد فيها إيده عليكي، ده معناه إن حاجة وحشة جدا وشرخ كبير حصل في علاقتكم. مشكلة تانية.. إزاي ترجّعي الشوق والمودة والرحمة اللي المفروض يكونوا بين أي زوجين، مشكلة تالتة.. هي إحساسك بالنقص قدامه وبتفوقه عليكي، هو الراجل وهو دماغه كبيرة، وهو بيربيكي، وهو.. وهو.. وهو.. وفين إنتي ودورك في العلاقة دي؟! يا صديقتي هو مش أبوكي، هو جوزك، شريكك، مش رئيسك في الشغل أو سيد وإنتي جارية، تعالي نفكر واحدة واحدة إزاي يكون ليكي دور في حياته زي ما هو بيلعب كل الأدوار في حياتك كده. أنا مؤمنة إن أي مشكلة بين شخصين لازم يكون الطرفين مسئولين عنها بشكل من الأشكال، يعني لو هو ضربك يبقى إنتي غلطانة زي ما هو غلطان، وأي حياة زوجية بتكون زي رسم القلب كده زجزاج، فوق وتحت، لأننا بشر وحاجات كتير بتأثر علينا زي الظروف المادية، وحتى الهرمونات وحالة جسمنا الداخلية ممكن تأثر علينا، فلازم تعرفي إن دايما فيه مشاكل، بس مهمتنا إننا نخفف حدّتها ونقلل من آثارها السلبية. وجهة نظري إنك لازم تهتمي أكتر بشكلك وبحالتك النفسية وتكوني حلوة في عين نفسك الأول عشان تكوني حلوة في عينه، استعملي عطر حلو، ورتبي بيتك، ووجبات كويسة في مواعيد رجوعه، البسي هدوم بيحبها، وحاولي تكوني في حالة تلامس معاه طول ما إنتم سوا.. يعني تحطي إيدك على إيده، تلعبي في شعره، تحطي راسك على كتفه، تحضنيه وإنتم نايمين، الحاجات دي بتقرب كتير، ولو حسيتي بصد منه في الأول ما تتاخديش، ده جوزك، ابعدي وارجعي تاني وتاني، قربي منه بشكل أو بآخر لغاية ما تتعودوا على القرب خصوصا القرب الجسدي، والرجالة كمان بيحبوا الكلام الحلو زي الستات، اتعلمي تغازليه وتدلعيه لو فعلا عايزة ترجّعي الحب بتاع زمان. توقفي تماما عن الكلام عن مشاكل الماضي ومشكلة أهلك، ولو تقدري وقفي إحساسك بيها، قولي لنفسك أنا بنت النهاردة، والمهم أنا مين، مش أنا بنت مين، وحتى لو أمك كانت وحشة فمافيش حد ملاك، دي برضه أمك، ومش هتقدري تغيريها، بس تقدري تبعدي شبح ماضيها عن حياتك بإنك ما تتكلميش عنها أو تطلبي منه مايجيبش سيرتها في خناقتكم، لأنها ببساطة مالهاش دعوة بحياتكم. في البداية بما إنك ذكرتي إن زوجك عصبي فالأفضل معاه إنك تتبعي طريقة "المقاومة الصامتة" أو "الغضب الصامت" وبكده هتسلمي من كلام زي إنك عنيدة ومش بتسمعي الكلام، جربي فترة تسكتي وتسمعي كلامه وتحاولي تفهمي المشكلة فين فعلا، ممكن جدا يكون مضغوط من الشغل أو مخنوق من حاجات تانية، وسبحان الله يعني ربنا خلقنا زي السفنجة علشان نمتص غضب بعض ونحتوي بعض. لاحظي إن في فترة شهرية الستات فيها بيكونوا مجانين، مكتئبين ومخنوقين، ممكن جدا بدون سبب وده بسبب الدورة والهرمونات، أحيانا حتى بنتخانق وإحنا مش عارفين بنتخانق ليه! لو راقبتي نفسك خلال الفترات دي هتقدري تفهمي جسمك وتحسني من حالتك، أو حتى تفهمي إنتي ليه كده في الأيام دي بالذات. اسمعي جوزك قبل ما تتكلمي، وقربي منه دايما، احتمي فيه وخليه صديق، وخلي أوقاتكم سوا أحسن وقت في اليوم كله.. وبكده تستعيدي اهتمامه وحبه.