ما علينا.. أنا بس متضايق.. على طريقة أصالة وتامر حسنى.. لأن الوشوش هيه هيه.. واللى جوه القلب مبقاش زى زمان.. وزمان واتساقًا مع الأغنية.. طول العمر العسكر.. عسكر بس الناس.. الناس.. كت -كانت- ناس»! هل هى أزمة إنك طول العمر تدور على ناس.. وخلاص.. مش عايز ملايكة ع الأرض.. ربنا هياخدنى ليهم أكيد.. بس كمان مش عايز شياطين -ربنا يبعدنى عنهم يا ريت- أنا بس نفسى فى بنى آدميين.. حبة ملايكة.. مش شياطين.. من ده.. على ده.. هو أنا بطلب حاجة زيادة؟! قلبى متعب.. ورأسى منهك.. ولدىَّ كلام كتير.. مش عارف أقوله إزاى.. تخيل لما تبقى كل شغلتك إنك تقول.. وفجأة تعجز عن القوالة! مسألة صعبة.. والأصعب منها إنك تقول غير اللى نفسك تقوله.. لا يحفزنى صلاح جاهين.. عمنا طبعًا.. بس بحاول أصبر نفسى برباعية منه بتقول: «يوم قلت آه.. سمعونى قالوا فسد.. ده كان جدع قلبه حديد وانحسد.. رديت أنا ع اللايمين وقلت آه.. لو تعرفوا معنى زئير الأسد».. وآه.. يأتينى صوت إسماعيل البلبيسى متألمًا.. أنا م البداية يا غربة بتحمل.. وخلاص كفاية صعب إن أنا أكمل.. طريق.. يوصل لقلب مناه.. خد عمرى بين لياليه وتاه.. وآه!! عدم اللامؤاخذة.. بقيت مش شايف.. شوفت إيه أخرت الفلسفة.. مش شايف.. وأكيد على طريق شيرين عبد الوهاب.. أنا مش هافضل كده على طول.. مش هاستنى العمر يعدى.. أنا هاتكلم لازم أقول.. قد ما هاخد.. قد ما هادى.. مش كبرياء، لكن بصلح كل شىء فيا انكسر.. ما هو م الغباء إنك تعيش زى الملاك بين البشر يعنى براجع نفسى.. واللى زمان أنا عيشته لغيرى.. أنا دلوقتى هاعيشه لنفسى!! الحمد لله.. المقال خلص.. وإنت ذنبك إيه.. قارئ وصديق اشترى الجريدة.. ولم يجد منى ما ينبغى قوله.. عدم اللامؤاخذة.. هو أنا مجنون.. أقول كل اللى نفسى فيه!! إيه اللى اتكسر.. فص اللولى ولا المرمر.. وساح يا بداح.. ساح يا بداح يا سؤال جراح!