**عارفين يعنى ايه سحب الجنسية من الشخص .. يعنى بيبقى شخص اسمه .. بدون !! ويعيش تايه .. ضايع .. لاأهل ..ولاوطن .. ولاحتى شخصية اعتبارية .. لاجواز سفر ولاجنسية .. مطارد فى كل الدول .. وأسهل حاجة التخلص منه بقتله أو سجنه .. مين يرضى بكدة ؟؟ يرحمكم الله ؟؟ **سؤال رفيع كده .. هيه الناس اللى بتعملى اشارة بصورة او مقال .. دى حاجة كويسة يعنى والا ايه نظامكم .. طيب أعمل ايه أنا فى الاشارة دى .. أقف .. والا أهدى السرعة والا أعدى .. أفيدونا أفادكم الله .. المخالفات على ودنه اليومين دول . **هذا وقد قال الشاعر المكتئب .. تعرف تمشى .. يعنى يادوب أنا أغمض عينى وافتحها .. ملقكش فى وشى .. انت قاتلنى وبتعزينى .. أحسن لك تمشى … ههههههههه… ياعم الشاعر غزها بمطوة واخلص. **بيشتكى لناظر المحطة .. يافندم أنا مستنى القطر بتاع الساعة تلاتة ولسة مجاش والساعة دلوقتى خمسة .. قاله تصدق انت راجل كداب .. ماهو قطر الساعة تلاتة قدامك أهه وجاى راكب فى قطر الساعة خمسة … ناس فهمها قليل صحيح. **الاعلان بيقولك .. الضريبة المضافة .. احسبها براحتك .. تلاقيها فى مصلحتك .. طب ليه ياعم المصلحجى .. علشان دى لاتطبق الا على اللى مكسبه اكتر من نص مليون جنيه ياعم الفكيك .. طيب ماهوه اللى بيكسب كدة من علية القوم بيضيفوا الضريبة المضافة على الغلابة من تحت القوم .. يبقى اللى لبست فى مصلحته مين بالضبط .. بالتأكيد لبست فى نص مصلحتك بالضبط ياعم الواسع انت. **بيقولى .. عاوز ايه من قانون الأحوال الشخصية .. قلتله ..أطلب مساواة الرجل بالمرأة . **تقعدوا معاهم .. تضحكوا معاهم .. عمرنا ماهننسي شهدائنا اللى اندفنوا أحياء فى رمال سيناء .. ولاعمرنا هننسي منظر جنودنا الأسرى والدبابة الصهيونية بتدهسم وهو أحياء بلارحمة .. أقولك حاجة عمرنا ماهننسي مدرسة بحر البقر والتلامذة مقتولين على كتبهم واللى انضربت من طائرة صهيونية برضه .. وهعلم اولادى وأولاد أولادى .. ان اليهود أعدائكم مدى الحياة وان عاجلا أو أجلا سنقضى عليهم .. انتم تطبعوا معاهم زى مانتم عاوزين .. وكل ماتطبعوا معاهم أكتر كل ماكرهنا ليهم بيزيد أكتر .. وهية كلمة واحدة بنوجهها .. للنتن ياهو .. اذهب الى الجحيم !! **حبس توفيق عكاشة سنة مع الشغل .. نهائي .. بتهمة تزوير شهادة الدكتوراه .. اللى قدمها بأوراق ترشحه لمجلس الشعب . بالشفا. **أنا مش فاهم .. لغاية امتى كل فرق الدورى لما تلاعب الأهلى أو الزمالك تفضل تدافع بكل اللعيبة .. هاجموهم ياجدعان هتلاقوا هنا اخرامى .. وهناك اخراميين **الانتماء وحب الوطن .. مش بتحية العلم .. ولا بالاكراه .. الانتماء والحب بييجى لوحده .. لما الوطن يحبنا الأول .. لما الناس تبقى مش عاوزة تطفش منه وتسيبه .. لما الناس تعيش عيشة كريمة .. ومحدش يبات جعان .. لما الناس الطيبة تبطل تاكل من الزبالة .. ولما الناس الزبالة تبطل تاكل من لحم الغلابة .. وقتها بس هنقول تحيا مصر.. ومصر هية أمى .. ونيلها هوه دمى .. غير كدة .. هنقول .. خدنى معاك على بلد المحبوب .. اللى هتدينى كل ده .. ومن غير مااطلب .. والا ايه ؟؟ **لو كنت مكان الموظفين بتوع مكتب تسوية المنازعات الأسرية .. كنت طلبت من الطرفين احضار اسطوانة فرحهم معاهم .. وأفتح فرحهم قدامهم .. وأقول للزوجة مش انتى دى اللى بترقص ولافيفى عبده ومولعة الفرح .. وللزوج .. وده مش انت اللى بيرفعوك فى الهوا وبترقص من الفرحة .. ياريتك وقعت على جذور رقبتك ياشيخ .. قوم يامعتوه منك ليها .. شغلوا شريط فرحكم فى شقتكم واقفلوا على نفسكم وتعالولى الاسبوع اللى جاى .. ومتفتحوش لأمك ولا لأمها الباب .. ومتخلوش حد يدخل فى مشاكلكم وحلوها بنفسكم اتحل وسطك منك ليها .. !!!!