عزبة "نجع العربان" يقطنها ما يقرب من 1500 نسمة ، وهى تابعة للوحدة المحلية بالربيعة مركز دكرنس ،والموت يهددهم بين الحين والآخر بسبب تصدع منازلهم التى ضرب الصرف الصحى جدرانها وهناك بيوت سقطت بالفعل وأخرى فى انتظار السقوط ،ولا توجد مدارس ابتدائي لأبنائهم ويذهبون إلى الربيعة سيرا على الأقدام مسافة كيلو متر ..حتى المسجد الذى يصلون فيه أغلقته الأوقاف بالدقهلية. وخط المياه التى يشربون منها يمر بأراضيهم الزراعية. وبلهجة مريرة تقول نعيمة إبراهيم على 32 عاماً – ربة منزل -طريق العزبة تاعبنى جداً عيالنا بيروحوا المدرسة فى الربيعة بيمشوا مسافة 2 كيلو على رجليهم ،وفيه عزبة جنبنا اسمها أبو السيد الطلبة بيمشوا 3 كيلو وده طبعا بيخلينا نقعد عيالنا من مدارسهم ولذلك مستوى الطلاب عندنا ضعيف جدا بسبب ده ..غير مشكلة الصرف الصحى اللى هدم بيوتنا علينا ،وفيه ناس بتصرف فى الترعة اللى بيتروى منها الأراضى الزراعية .. ياريت يبقى لنا طريق نمشى عليه زى الناس اللى عايشة ،ويهتموا بالصرف الصحى ويتعمل لنا مدرسة إبتدائى تجمع العزب اللى حوالينا بدل ما احنا متبهدلين فى الجرى والبهدلة على الربيعة. ويضيف محمد عبد العال إسماعيل 54 عاماً – فلاح – مفيش عندنا صرف فى العزبة ،وبيجى لنا عربية النضح كل فترة ،مبيجوش باستمرار يمكن فيه أوقات مبيرضوش يدخلوا العزبة غير لما البيوت تغرق فى الصرف ،وساعتها بنضطر ننضح بنفسنا ،وفيه بيوت عندنا وقعت بسبب الصرف ،والمسئولين ولا حد سأل فينا ،ولا حد يعرف عننا حاجة ،ومفيش حد بسمع لنا من أساسه يمكن عشان احنا ناس ضعيفة .. كل المسئولين شغالين على البلد والقرى الكبيرة وسايبين الناس الغلابة اللى زينا مش معنى أننا عزبة وكتلة سكنية قليلة نتبهدل كده .. بقول للمسئولين ينظروا لنا نظرة اهتمام وعناية ويوصلوا لنا خط الصرف ويعملوا لنا طريق نمشى عليه ،والمياه الحلوة مبتجيش لنا غير فى الشتاء. وتلمم أشلاء حسرتها صابرين على حسن أنا بيتى وقع عليا من مياه الصرف الصحى ؛ علشان معندناش صرف ،وعربيات النضح مبتجيش لنا تنضح ،غير لما البلد بتعوم والمياه بتدخل بيوتنا .. يعنى فجأة لقينا البيت بيتهز وبعدها على طول وقع مبقناش لاحقين نشيل حتى حاجتنا ،ومعظم بيوت العزبة اللى الرطوبة أكلتها وفعلاً فيه بيوت هنا تانية آيلة للسقوط .. والمسئولين ولا هيسألوا علينا غير لما نموت مش بس بيوتنا تقع .. احنا هنا ريحتنا طلعت فى العزبة ، والزبالة كتمت المروى بتاع الرى ،علشان ما حدش بيجى ياخدها ، هنشتكى لمين يا أستاذة احنا شكوتنا لربنا سبحانة وتعالى .. احنا أحسن حد فينا فى الناس اللى واقفة دى اللى يبقى فى جيبه 10 جنيه ، هنصرف بيها على عيالنا ولا نجرى بيها على المسئولين .. حسبى الله ونعم الوكيل . وبسخرية شديدة يقول أحمد عبده ،ومحمد السيد سعيد احنا هنا عايشين على شمال السماء ومحدش سائل فينا على الرغم أن عزبة "نجع العربان" دى أنشأت قبل الربيعة إلا أنه لا يوجد بها صرف صحى ، وعلى فكرة محطة الصرف الصحى بالربيعة تبعد عن العزبة ب 750 متر فقط ،وبالرغم أن مواسير محطة الصرف تمر من داخل أراضينا ، يعنى الموضع ياسيادة المسئولين مش صعب ولا حاجة ،وده أبسط حق من حقوقنا .. أنتم منتظرين إيه لسه ،للأسف المحليات هتفضل زى ماهى عمرها ما هتتغير .. حتى جامع القرية أمرت الأوقاف بغلقه ،وعملنا أوراق وطلبات ولا حد سئل فينا .. وأتبرعنا بأرض وبدأنا نبنى جامع هنا ولكن ناقصه التشطيبات ،ومش قادرين نكمله لأن العزبة هنا ظروفها المادية وحشة جدا .. يعنى عشان نبنى الجامع ده للعزبة نصلى فيه كنا بنوفر من أكلنا اللى بنخزنه للسنة كلها جوال قمح ولا أرز وبنبيعه ونجمع حقه عشان نعمل المبنى اللى أنتم شايفينه ده ،وفى الآخر بدل ما الأوقاف تساعدنا فى تشطيباته ولا فى دماغهم .. والجامع اللى بنصلى فيه الأوقاف فقلته عشان كان آيل للسقوط واتقفل .. احنا على الحال ده بنجهز فى الجامع بقالنا 4 سنوات ،كل سنة بنكمل فيها حاجة على قد مابنقدر ، وفضل مقفول 12 سنة .. وفى مشكلة الطريق احنا مستعدين نوسع الطريق لو هنساهم بجزء من أراضينا بس يتعمل لنا المرافق العامة أقل شئ علشان نعرف نعيش زى الناس ،احنا اتبهدلنا جرى على المسئولين وآخر حاجة كانت مع رئيس مجلس المدينة ،ولكن للأسف كلها وعود فى الفاضى .. والكارثة الأكبر هنا فى العزبة "الكهرباء" عندنا هنا "محول نجع العربان" للكهرباء بالربيعة فى وسط البيوت ،وبيسبب لنا ضرراً كبيراً وخطورة على الأطفال ،أولادنا بيتحبسوا فى البيوت بسبب المحول وبنخاف نخرجهم لأن أكثر من مرة الأطفال حصل لهم مس كهربائى منه وهما بيلعبوا حواليه ،المحول شغال مباشر من الطيار العالى للمساكن ،وسبب لنا أكثر من حريق آخرهم أشتعل فى ثلاث بيوت ،والمطافئ رفضت النزول عشان الطريق بتاع العزبة ،واتصلنا بالجمالية هى اللى فصلت عننا الكهرباء ،وطلبنا من الشبكة تجيب لنا مفاتيح أتوماتيك تفصل الكهرباء أثناء حدوث حريق أو قفله ..قالوا لنا ده مش فى استطاعتنا ،والبرج بتاع الكهرباء نفسه متآكل ومحتاج لصيانة ممكن يقع فى أى وقت .. احنا أملنا فى ربنا كبير وفى محافظ الدقهلية الحالى.