سجال ادم وحواء بين الشاعر خالد الكردي والشاعرة ميرفت حموده

انا تاج العفاف ليكي
انا النعمه اللي ف ايديكي
انا مخلوقه من ضلعي
ف وقت الضعف اقويكي
الشاعرة ميرفت حموده
خلقني ربي من ضلعك
لاجل ما اكون وطن دافي
وابقي حضن واغزل لك
توب الفرح علي اكتافي
الشاعر خالد الكردي
وليه تبقي كده ناكره
وتنسي تقولي مش فاكره
ياحوا فوقي من وهمك
وقولي يارب ليك شاكره
الشاعرة ميرفت حموده
لا انا عمري نكرت جميل
ولا حتي نسيت فضله
لكني تعبت م التحميل
نسيت الفرح تاه شكله
الشاعر خالد الكردي
وجودك مني مش منك
ومش هاقبل عشان انك
سكن والراحه ف الدنيا
اعيش شايل كده همك
الشاعرة ميرفت حموده
خلقني ربي تكريم ليك
تعيش ليا واعيش انا ليك
تشيل همي واشيل همك
دي شركة نجاحها عبء عليك
الشاعر خالد الكردي
اكون لك اسم ع الهامش
وعايش بس مش عايش
رجولتي مش ف ضرب الوش
ولا حلمي رصاص طايش
الشاعرة ميرفت حموده
عرفت انا اسمي من قبلك
ولا ينقصني اعيش عهدك
رجولتك انت تعرفها
لكن عندي تشوف حدك
الشاعر خالد الكردي
هترضي تكوني ف الشركه
ويبقي حبي ده التركه
وهتشاركيني ع المره
وع الحلوه وبالبركه
الشاعرة ميرفت حموده
ده يوم ماقبلت اروح عندك
حلمت اعيش بمملكتك
لقتني جارية شايلة الهم
واخر حاجة في قصيدتك
الشاعر خالد الكردي
اكون لك ضهر يحميكي
سواد النني ف عينيكي
اكون الشمس والضله
ويرضي ربنا عليكي
الشاعرة ميرفت حموده
تكون ضهري اكون سندك
تكون شمسي اكون قمرك
هترعاني اعيش ضلك
ويرضي ربي يوم عنك
حوا وادم