وغازل صورة للحلم اللي كان منقوش وانا ماشوفتوش لان عمايا يمنعني وكان مغشوش بيتخبى عن العالم ويسكني لأني أعمى ومعرفتوش كلامي معنى للحاصل ولو واصل لساني البوح هاقول دا التاني ... معرفهوش انا لما كنت بلاقي بسمة فوق شفايفي كنت بافرح واديهالك كنت عيل لما بارسم صورة للبت اللي باعشقها كنت بافرح لما بارسمها ف جمالك كنت لما بشوف جبينك فوق بدليلك جبيني كنت لما بلاقي فيكي الضيق بوسعلك قليبي تسكنيني كنت لما ازعل بخبي وشي لحسن تزعلى وتغيب عن الشفة ابتسامتك كنت لما بلاقي جرحك أجري وازرع دمي في شريان غلاوتك كنت لما العب بكورتي والقي همك بيناديني العن الكورة وسنينها واجري احققلك نداكي كنت كل حياتي يا سمرا فدكي كنت لما الصورة تبقى اسود في اسود كنت من شيبتي الضعيفة بارسمك بيضة وكحيلة كنت بارضي عشان عيونك ابقى منسي وانسى احلامي القليلة كنت لجل عيونك انت ارضى اعيش مذلول لقرشي كنت باهرب من عيالي عشان مفيش وبخبي وشي قوم لما تضحك يوم شفايفك تطلعي ضاحكة عليا لما حراسك يدوسوا مايلاقوش غيري مطية لما كل كلابك السعرانة تنهش ماتلاقيش غير لحم ضعفي ليه لما ادور عن عنيكي مش بلاقيكي ف صفي ملعون أبو اللي يخون دموع اللي فرحله ف فرحته وبكا ف بكاه ملعون يا ناس اللي يبيع أرضه وسماه ملعون شراعك لما يحدفني في عرض البحر ملقاش النجاة ملعونة كل الامنيات اللي عشانها رميت سنيني ملعونة كل الاغنيات اللي تغنيلك حنيني وعشان كده انا رايح اقولك من النهاردة مافيش بكا راح تغرقي وهاعيش انا فوق الجبل معصوم من الموج اللي راح ياكل شبابك راح يسيبك جيفة مدفونة ف ترابك واما تغرق يوم سفينتك لازم اضحك انت علمتيني اضحك انت علمتيني اخون فبلاش زعل اللي اهون يا مصر في نظرة عينيه لازم يهون