كرات النار و الحجارة و زجاجات المولوتوف والغاز المسيل للدموع تملئ ميدان التحرير،في قلب عاصمة المعز،لم أجد أنا وصديقي أمامنا سوى سرداب قديم مهجور بجوار سور الجامعة الأمريكية والتي تحتل موقعاً هاماً في الميدان العتيق،دخلنه،وإذ بباب صغير غريب الشكل يلفت انتباهنا، فقررنا نشوف وراه إيه،فتحنا الباب ودخلنا. لفت نظرنا وجود صندوق عجيب يشع نور،فقمنا بفتحه،أنه يحتوى على خاتم قديم ولا خاتم سليمان،دعكت الخاتم على سبيل المزاح،فخرج عفريت وقال الكلمتين القدام إياهم..مش بتوع عفرتو طبعا:شوبيك لبيك عبدك وبين ايديك. بس العفريت كان عنده مشكلة وهي أننا أتنين،وهو موقع على تعهد مختوم بختم النسر وممضى من أتنين موظفين ميرى ملو هدومهم ومراتباتهم لا تقل عن 17 جنية مصري فقط لا غير بانه ينفذ طلبات آدمي واحد بس. فكر شوية سموه وبعدين فكر تاني ثم عاد يفكر ويفكر وأخيرا والحمد لله صاح: بصوا..م الأخر..ومن غير لف ولا دوران..أنا هنفذ طلبات واحد منكم بس..ويا تختاروا واحد منكم.. يا اختار أنا..قولتم إيه؟ فأجبناه بصوت واحد:اختار أنت. العفريت:اوكى .. يبقى كل واحد يقولي مبرراته وطلباته..وأنا اللي أقرر. فقلت:أنا عايز مبارك يتنحى..او يتخلى..مش فارقة..المهم انا مش هسيب الميدان إلا لما ده يحصل. _ ياه..هو لسه مبارك الريس..دا أنا طلعت لواحد من يجي 30 سنة و كان هو برضو الريس ساعتها..والله عندك حق..دا الكلام ده مبيحصلش عندنا احنا.. رغم إن عمرنا أضعاف عمركم..طب و الاخ عايز ايه؟ قال صديقي:بلاش وحيات أبوك الكلمة دى. _ كلمة ايه يا برنس! _ الأخ. _ آه .. فهمتك ..بس لخص وهات م الاخر. _ أنا كمان عايزه يمشي..بس بعد ما تنتهي فترته الرئاسية. _ طب ودي تخلص امتى؟ _ شهر سبتمبر اللي جاي. _ طب ما هو ماشي ماشي..ايه المشكلة في الكام شهر دول بقي؟بلاش تحكمات فاضيه..وشغل عيال..يا عم منك له. _ وليه نستنى؟ مش أنا عايزه يمشي..وهو كمان عايزه يمشي..يبقى يستنى ليه؟؟ وزى ما بيقولوا خير البر عاجله. _ والله الراجل دا بيتكلم كلام زى الفل..طب ايه رأيك يا ريس؟ _ أقولك يا عم الحاج..إحنا عايزين ننقذ البلد من الفوضى..لو مبارك مشي دلوقتي..فتحي سرور رئيس مجلس الشعب.. _ عارفه..دا كان وزير التعليم..ويما جنن ناس وجننى معاهم..دا ماله راخر. _ ها يمسك الحكم لمدة 60 يوم..و بعدين يبقى في انتخابات. _ طب ما يمسك.. هى هتيجى عليه. _ لأ أزاي..إحنا أصلا عايزين نحل مجلس الشعب ده لانه كله مزور..يبقى أزاي رئيسه يحكم مصر. _ دول شهرين .. يعنى مفيش مشكلة.. خليك كول. _ والنبي حتى ولو ليوم واحد؟ _ كلام جميل وكلام معقول..مش قادر أقول حاجة عنه..طيب ما يتنحى وتحلوا مجلس الشعب و تنتخبوا برلمان جديد..والحياة تبقى فله..ايه المعضلة يا خونا؟!! _ ما ينفعش. _ ليه يا عم المعترض..إيه البروبلم؟! _لازم نعدل الدستور الأول..ولو حلينا المجلس مش ها نعرف نعمل تعديلات دستورية. _ يبقى نعمل انتخابات مجلس شعب.. زى ما عم العفريت قال. _ ما هو لازم يكون في رئيس مع المجلس الجديد علشان الدستور يتعدل. _ مش لازم نعدله..وعمر سليمان يبقى الرئيس. _ يا سلام ..وهي دي بقى الديموقراطية ؟ عمر سليمان يبقى رئيس لمدة 6 سنوات من غير انتخابات حرة..معلش يا عم العفريت لو كان يقرب لك ولا حاجة. _ مفيش فايدة..أي حاجة..بس مبارك لازم يمشي. _ يعني لازم تكرر اللى حصل فى تونس بالنص..يا عم سعد زغلول أنت..ما تشغل الطاسة..وشوف مصلحتك فين. _أه..هو كده وخلاص. العفريت:بس..بس..دماغي وجعتني..يلعن ابو ده خاتم اتزنقت فيه..اسمعوا بقى انتوا الاتنين..انتوا الاتنين رأيكم صح..كل واحد شايف نص غير التاني بس..انتوا الاتنين صح..علشان كدة ها أقولكوا رأيي. _ قول. _ أنا اللي ها طلب منكم أمنية. _ أطلب. العفريت ولع سيجارة واخد نفسين واخرجهم بستمتاع غريب وبعدين قال: أنا هنصرف دلوقتي..اوكى..وأبوس أيديكم..تخبوا الخاتم المنيل ده فى حتة الدبان الأزرق ميعرفش طريقها..علشان مش عايز أي حد يستدعينى فى الفاضى والمليان..بجد مش عايز أشوف مصر.. بلدكم اللى انتم مش عارفين قميتها ضايعة..كفاية بغداد..ومن قبلها القدس..خبوني ابوس رجل اللى جبوكم..ولما ربنا يهديكم وتتفقوا..ابقوا طلعوني..وانا اخدمكوا واخدم ام الدنيا بعيوني..يلا بقي.. بلاش لكاعة..خبوني. وبعد تخلى مبارك عن السلطة على أساس انه ورثها من السيد الوالد وتولى المجلس الأعلى للقوات المسلحة برئاسة المشير طنطاوى زمام الأمور عادت المعضلة من جديد،أنا مش عايز حكم العسكر، وصديقى بيقول ما تسبهم لحد ما ننتخب رئيس جديد،وهنا بحثنا عن الخاتم ولكنه فص ملح وداب! زى ما دابت حاجات حلوة كتيييييييييييييييييييير. وائل مصباح عبد المحسن