بعد ما تعذر النوم في الحر الفظيييع ده وأصبح حصيلتي منه 4 ساعات بس من مجموع 48 ساعة لقيت نفسي فجأة بأخد شاور الساعة 7 الصبح وبسأل نفسي أمال الساعة 3 المفروض الواحد يعمل أيه بس مش لقيت إجابة برضه ، المهم خرجت ونمت ع السرير في محاولة يائسة أني أنام بقي بعد إنتعاش سفن دش اللي خدته بس أبداً مفيش فايدة لقتني مبحلقة في السقف وبفكر في حاجات كتييييييير أسئلة بلا إجابات وأفكار كده مش عارف جت لي منين قولت أيه ده بسم الله الرحمن الرحيم هو الحر بيعمل كده في البني أدمين طيب وبعدين هقعد أفكر مع نفسي كده ودماغي توجعني من كتر الأسئلة قومت قولت لااااااااا أنا أدخل أعمل نوت وإن شالله مع عن حد حوش بقي يالا ونتشارك الأسئلة والأفكار التهييسية الحارة دي .......... = أول سؤال بيطاردني من كام يوم وطرحته هنا بالفعل هو ليييييه الدنيا قايمة ومش قاعدة من موقف البابا شنودة من قانون الزواج الثاني هو إحنا يعني كمسلمين لو طلع قانون يمنع تعدد الأزواج مثلاً مش هنقوم الدنيا ومش نقعدها ونقول قرارات مدنية مخالفة للشريعة ؟؟؟؟؟؟؟؟؟؟؟؟؟ = بس الأغرب واللي شاغل بالي برضه من فترة لييييييييه الحكومة فجأة بقت مهتمة قووووووي بموضوع ختان البنات ده وليه الضجة الإعلامية المصاحبة لقرار منع ختان الإناث هو خلاص مصر خلصت كل مشاكلها ومش فاضل إلا مشكلة الجهاز التناسلي أييييييه يا حكومة هو أنت بتفكري في أيه بالظبط ؟؟؟؟؟؟؟؟؟؟؟؟؟؟ = بعد ما لاحظت بشكل مبالغ فيه كمية البنات اللي ع الكورنيش من لابسي الزي الإسلامي وبعد ما تعاملت مع أكثر من بنت من مدعي الإلتزام وهما ولله الحمد أبعد ما يكونوا عنه لقيت نفسي بقول هي البنات اليومين دول بيلبسوا الإسدال أو النقاب عشان ملتزمين والا عشان يخبوا وراه قبحهم الداخلي أو الخارجي ؟؟؟؟؟؟؟؟؟؟؟؟؟؟ = بعد التصريحات الغريبة التي أعقبت مقتل الشاب خالد سعيد من قبل الحكومة لازم نسأل الحكومة سؤال مهم جداً هو حق الحياة للناس المحترمة اللي ماشية جنب الحيط بس والا الحقوق سواء للصالح أو الطالح ويا خوفي بقي من الإجابة اللي هتتقال كده مصر المفروض مش يعيش فيها غير 25 % بس مش عارفه ليه افتكرت سرحان عبد البصير وهو بيقول للقاضي لو كل واحد عزل عشان تحتيه رقاصة مصر كلها هتبات في الشارع = المصريين هما الشعب الوحيد اللي بيجيد استخدام المخلفات ازايز العصير والبيبسي يملاهم ميه ويشرب فيهم والهدوم القديمة والملايات يستخدمهم في التنظيف حتى جرادل البويا وما شابه بيعملوها سلة مهملات وأكياس المخدات القديمة بتتحول بقدرة قادر لأكياس لحفظ المشابك وشوك الستاير بس اللي مستغرباله قووووي ليه الجرايد المستعمله مصيرها دايماً تنظيف الأسطح الزجاجية مع أنهم بيستعملوا معاها أغلي أنواع المنظفات للدرجة دي الكلام رخييييييص في نظرهم ومش مقتنعين بيه أصلاً ؟؟؟؟؟؟؟؟؟ = في الحر الفظييييييييع ده اكتشفت أن الحاجة التي تنقصنا هي الشفافية = أين اختفي أيمن نور مؤخراً ولماذا أصبح البرادعي هو البطل الأوحد فجأة واخباره لا تنقطع بمناسبة وبدون مناسبة هما المصريين خلاص أدمنوا فكرة الزعيم والبطل الأوحد مع أن التاريخ بيقول أن الملك فاروق لما حب يتبني فكرة أمير المؤمنين فشل وسقطت الملكية والنحاس لما تخلي عن فكرة حكم المجموعة وحب يستبد برأية وأختلف مع مكرم عبيد فشل هو الأخر فشل زريع مع أن أبهي عصور الحكم في مصر هي حكم الوفد رغم الاحتلال وده لأنهم كانوا بيحكموا كجماعة وليس فرد أوحد بس واضح أن مفيش حد بيقرا تاريخ أصلاً ؟؟؟؟؟؟؟ = لو رشح البرادعي ذو ال67 عاماً للرئاسة تفتكروا ممكن أختاره ؟؟؟؟؟؟؟؟؟؟ = هو الشعب المصري رافض جمال مبارك عشان هو ابن مبارك بس والا عشان هيكون مرشح الحزب الحاكم الحالي والا أيه بالظبط ؟؟؟؟؟؟؟ = جربنا التأميم الشركات خسرت جربنا الإنفتاح والخصخصة الشعب شحت والبلد بقت لرجال الأعمال بس طيب أيه النظام الاقتصادي اللي ممكن ينفعنا طيب ؟؟؟؟؟؟؟ = كل ما أقوم أحط راسي تحت الحنفية الاقي نفسي بسأل سؤال واحد بس ليه الناس خدوا الآية الكريمة " سبحان الذي سخر لنا هذا وما كنا له مقرنين " دعاء ركوب الدابة أو المواصلات بس المفروض نقولها مع كل حاجة سخرها ربنا لخدمتنا والا أنا غلطانة ؟؟؟؟؟؟؟؟؟؟؟ = هو ليه البابا شنودة مش عايز ممثل الإنجيليين يحضر اللجنة المشكلة لمناقشة القانون الجديد للأحوال الشخصية ؟؟؟؟؟؟؟ = هي القنوات الفضائية استعدت بدري كده ليه بمسلسلات رمضان ؟؟؟؟؟؟؟ دي حرفنة بقي والا مستعجلين علي تعطيل الناس وضياع الشهر اللي بيجي كل سنة مرة في تفاهات بعيداً عن العمل الصالح ؟؟؟؟؟؟؟؟ كنا زمان بنتعلم إن الإعلامي لازم يكون محايد ولا يفصح عن وجهة نظرة إلا في مواقف معينة لكن اليوم أصبح الإعلامي يتفنن في الصراخ والولولة وشحن الناس والتدخل حتى في حوار الضيوف ومحاولة مهاجمتهم هم شخصياً ؟؟؟؟؟؟؟؟ بعد ما توجة الفنانيين لتقديم البرامج وعمل الإعلانات تفتكروا الموديلز والإعلاميين ممكن يعملوا أيه بقي يمثلوا بدالهم والا أييييييييه ؟؟؟؟؟؟؟؟ = هو الفيس ليه فجأة قلب لصفحة وفيات وبقي مليان صور شهداء وفيديوهات تعذيب ؟؟؟؟؟؟؟ = وبعد كل الأسئلة الغريبة دي في سؤال واحد باقي ولازم تجاوبوني عليه بصراحة هو تهييس النت ده ممكن أطلع منه بحاجة مفيدة ؟؟؟؟؟؟؟؟؟؟