بقلم رانيا مسعود بقلم : رانيا مسعود لما نتكلم عن شخص بيلبس جلابية و عمة و شال و بلغة بنقول عليه بلدي و لما بيكون فيي بني آدم مش لابس مودرن و ع الموضة بنقول عليه:بيئة و لما واحد غبي بيتكلم عن حاجة بنقول:يخرب بيت مجانية التعليم و لما حد بيتصرف غلط بنقول:هي دي مصر و لما بنطالب بمواقف رجولية بتلاقي الرجالة بنفسهم بيقولولك:الرجالة ماتت في الحرب و لما تكون ابن سمكري أو ابن بقال أو نجار أو حداد أو ميكانيكي أو بواب أو طرابيشي أو طرشجي أو موظف حكومة غلبان:تبقى فقير و دقة و بيئة واطية و لما بنحب نشتغل كويس و نلبس و نعيش كويس:بنهاجر بره مصر و نقول مفيش عيشة في البلد دي و لما حد بيبقى ابنه رايح الجامعة بيجيب له عربية:على أساس إن المواصلات فيها ناس إخيييييييييي و بيئة و بلدي و سوفاج و لما بنرطم بلغة غير لغتنا بنبقى ولاد ناس و لما بنلبس مقطع و نوقف شعرنا و نصييف مع الناس الكول بنبقى ولاد ناس و لما بنتكلم عربي مكسر وداخل فيه ييجي خمسميت كلمة أمريكاني على ألماني على طلياني بنبقى ولاد ناس و لما بناكل حاجة كل منها الغربيون و ننسى الفول و الطعمية و البصارة و العدس و الكشري و المحشي و الطبيخ بنبقى ولاد ناس لما تسكن في المعادي أو في المهندسين أو في جاردن سيتي أو في مدينة نصر أو في الزمالك بتبقى ابن ناس لما تتعلم في مدرسة إنجيلية راهبات أمريكية إنجليزية بريطانية مهلبية بابا قال نعد المية بتبقى ابن ناس المصيبة بقى لما تطرح المواضيع دي كلها بتبقى معقد و حاقد على ولاد الناس و عندك عقد و كلاكيع و كتكم نيلة مليتوا البلد طيب لما تعرف إن تسعة و تسعين في المية من المناطق اللي بيسكنها الناس في مصر عشوائيات و حواري و بيوت مساكن شعبية و واحد في المية بس بيوت و منازل و فلل في أحياء راقية و لما تعرف إن واحد أو اتنين تلاتة في المية من نسبة المتعلمين في مصر تعليم أجنبي و الباقي حكومي و لما تعرف إن في مصر دكاترة و مهندسين ملقحين ع القهاوي و مش لاقيين شغل و لو لقوه بياخدوا ملاليم ميكفوش عيش و ملح و لما تعرف إن اللي اتخرج من تعليم مجاني أو تعليم أجنبي لازم و حتماً و لا بد يكون أخد دروس كتييييير خصوصية في ثانوية عامة و زقوه عشان يدخل الجامعة و بيقعدوا الكل مع بعض على بنش واحد في كلية واحدة و يتنيلوا كلهم يتخرجوا برضو و ميلاقوش شغل لما تعرف إن لولا الكناس لولا الميكانيكي لولا الحداد لولا المنجد لولا بتاع الفول لما كان الدكتور و لا المهندس و لا المدير العام و لا المبرمج و لا صاحب المصنع يا جماعة محتاجين وقفة مع النفس بس مش بتاعة الإعلانات إياها إحنا كنا بلد زراعية الفلاح مصدر خيرنا و رزقنا بيلبس جلابية و طاقية مراته بتغطي وشها من الغرب و لما علم ابنه بقى دكتور و فنان و عالم و مدرس لما انفتحنا و عملنا ثورة صناعية و أممنا القنال و فتحنا فرص إنتاج محلي كان العامل على المكنة و الموظف الغلبان و الكناس اللي بينضف عشان دول كلهم يشتغلوا لازم كمان نعرف لما كنا كلنا بنركب مواصلات كانت حوادثنا أقل كنا بنشارك بعض و بنتراحم و بنقعد الست الحامل و الراجل المسن مكنش في زحمة و كانت الشوارع بتمشي مكنتش الست بتطلع الأتوبيس عشان تقف و واحد قاعد مستعبط لازم كمان نعرف إن المعادي و مدينة نصر و مصر الجديدة و الزمالك دي أحياء غالية اللي ساكنين فيها دلوقتِ الأجانب عشان معاهم فلوس و المصريين اللي ساكنينها سكنوها زمان لما كانت صحراء جرداء كان المتر فيها أقل من بريزة فضة من اللي اتلغوا دول إن اللي شالك و كبرك و عملك كان واحد لابس جلابية بيروح يصلي بيها يوم الجمعة إن اللي كبرك كان رغيف وقفت اشتريته من فرنة و تمنه كان قرش و خمسة إن الفول كان و مازال الطبق الرسمي للغلبان و الغني ع الفطار إن السبانخ المطبوخة و البامية و الملوخية و البطاطس أم دمعة و المحشي كرنب و بتنجان و ورق عنب أطعم من البيتزا و الكرواسون و الباتيه و اللحمة بالماشروم و عليها صوص و فوقيها مايونيز و تحتيها كاتشاب و مسطردة إن الحواري و الشوارع في المناطق الشعبية كانت الناس فيها بتحب بعضها و بتتلم و بتحافظ ع العيلة و بتسأل عن بعضها و محدش كان بيبص لحد في رزقه و الفرح كان عندي و عندك و الحزن كان الناس بتتقاسمه إن كلمة بلدي تعني بلدي و عشرتي و أهلي و ناسي إن كلمة ولاد ناس هي للناس كلها إننا أسنان مشط متساوية إن ربنا جعلنا فوق بعض درجات عشان نحتاج لبعض و نكمل بعض مش يعاير غنينا فقيرنا إن ريحة العرق اللي بنشمها من الناس في الأتوبيس في الزحمة هي عرق الغلب و الكد و العمل اللي حقنا نفخر بيه و نباهي مش نتكسف و نشجع الناس ع الكسل إن اللي بيلبس مقطع و بيشرب سيجارة في الجامعة و بيسقط بنطلونه و بيلبس ع الموضة هو شخص تافه أهبل مستهلك زيه زي التور دا حتى التور بيشتغل أما الفرفور مامته و باباه جايبينله عربية و هيشغلوا عنده ناس يبين عليهم عقد النقص اللي عنده لا زم نفوق و نعرف مين اللي عنده عقدة نقص و مين اللي معندوش مين اللي ولاد ناس و مين اللي ولاد إييييييييييييييييييه.......
