دشن مجموعة من الشباب صفحة على موقع التواصل الاجتماعي "الفيس بوك" صباح أمس السبت، تحت عنوان "أنا الواحد في الميه يا مشير" بهدف التعبير عن انزعاجهم من تصريحات المشير حسين طنطاوي رئيس المجلس الأعلى للقوات المسلحة أن 99% من المصريين راضون عن أداء المجلس العسكري أثناء حضوره المشروع التكتيكي للذخيرة الحية "بدر 11" . وأعرب مؤسسو الصفحة عن رغبتهم في تسليم العسكري للسلطة قائلين: "لو عايزنا كلنا نبقى 100 % معاك ووراك نفذ طلبات الثورة وسلم السلطة واعمل انتخابات ووفر للناس الغلابة الأكل والعيش اللي مش لاقينه، عمرنا ماهنحس بالثورة غير لما الثورة هي اللي تحكم، الناس حست بتغيير بعد انقلاب 52 اللي تحول لثورة بعد انضمام الشعب لأن الثورة هي اللي حكمت مع إن التغيير كان ها يبقى أفضل لو سمعوا كلام الرئيس السابق محمد نجيب وهو أول رئيس لجمهورية مصر العربية كان عايز يعمل دستور ويسلمها لسلطة مدنية بس مجلس قيادة الثورة رفض وحدد له إقامة جبرية، اللي كان عايز يعمله من 60 سنة إحنا بنطالب بيه دلوقتي رحم الله الرئيس محمد نجيب" وأكد مؤسسو الصفحة على نزولهم يوم الجمعة 9 سبتمبر لميدان التحرير قائلين: " إحنا شباب بيحب البلد دى بس مش ممكن نغير حاجة من على الفيس بوك وهنا مجرد وسيلة فقط إننا نجمع نفسنا، عشان كده لازم ننزل لأرض الواقع والطريق عرفناه، أنا ها نزل يوم 9 سبتمبر وللأسف ها طالب بنفس مطالب يوم 25 يناير لأني ائتمنت المجلس على ثورتي وهو أول من خدعني وقالي 6 شهور وها سلم السلطة وماحصلش، في 12 ألف شخص أتحاكم عسكرياً اغلبهم نشطاء مش بلطجية لأن البلطجية لسه في الشارع، مافيش أمن مافيش حرية رأى مافيش كرامة على الحدود مافيش كرامه للمعتمرين في السعودية، اللي بيقول رأيه بيتحاكم عسكرياً، وكمان محتلين صينية ميدان التحرير في أسباب كتير لنزولنا يوم 9 سبتمبر، وآخرها إننا طلعنا واحد في الميه". وأكد أعضاء الصفحة البالغ عددهم حتى كتابة هذه السطور أكثر من 13 ألف عضو من خلال انضمامهم أن عدد الغير راضين عن أداء المجلس العسكري أكثر بكثير من نسبة ال1% من الشعب المصري، ومنهم ندى سالم التي قالت :" إحنا سمعنا موضوع ال99% ده آخر مرة أيام المخلوع، إيه الحكاية هو رجع تاني ولا إيه؟"، وأضاف أحمد صالح :"وأنا برفض نفس لغة النظام السابق بحماية نفسه بكذبة الأغلبية". وقال كريم عادل: "الاستخفاف بالشعب المصري والتقليل من قيمته وتصوير الثورة علي إنها مجرد فوره لبعض الشباب وتخويف الناس ليل نهار من المغامرة بطلب حريتهم والاعتراض علي الظلم كلها من سياسة المخلوع الإعلامية"، بينما قال محمد عامر:" لو 99% مؤيدين نعمل انتخابات ليه من أساس، ما هو لو عملنا انتخابات و حد كسب ب99% ها نقول مزورة، يبقي خلينا في ال99% اللي نعرفها و أهه اللي نعرفوا أحسن من إلي مانعرفوش، و أضحكي يا ثورة". وأضافت ياسمين عبد الحميد على نفس طريقة كلام الملحن عمرو مصطفي عن الثورة: " ال99 % بتاعة المشير دي كان يقصد بيها دعوة لعدم النزول يوم 9/9، قصدك تلاعبني بالأرقام، الله يجازي شيطانك يامشير .. طلعت اخبث من بيبسي"، بينما قال إسلام مؤنس: "إحنا مش ناكرين للجميل عارفين إن الجيش كان ليه دور في حماية ثورتنا مع بعض التحفظات لكن إحنا زهقنا من لغة الوصاية و معامله الشعب على انه دايما مش فاهم و مش عارف، وأحب أطمنكم كل الغلابة والناس اللي مش لاقين أكل والعشوائيات من ال1% وشوفوا دول قد إيه ؟!".