قالت الإعلامية هالة سرحان إنها سامحت الفنان رامز جلال، مقدم برنامج "رامز واكل الجو"، عبر شاشة "إم بي سي مصر"، بعد أن أوقعها ضحية مقلب الطائرة في حلقة الأمس من برنامجه. وأضافت هالة، عبر تغريدات متتالية على "تويتر"، أنها وعلى الرغم من تعرضها للموت وللخطر خلال مقلب طائرة رامز جلال إلا أنها سامحته على ما فعل معها لأن رامز "معجون بخفة الدم المصرية". وكتبت هالة سرحان تسرد مقالب رامز جلال منذ بدايته عبر حسابها الرسمي، "رامز اخترع المقالب، أول مرة عملها معايا في برامجي مرة هدية فيها إيد مقطوعة بدمها، وكان يومها هايجيب لي سكتة قلبية، ومرة بومب بيفرقع، بس كله كوم والنهارده كوم، صحيح طول عمرك ابن شقي وعفريت، بس مش هاتهمد إلا لما تفطس لك واحد فينا طلعت روحي بس روحي طلعت رياضية قلبي يا مصيبتي". وتابعت تتحدث عن مقلب "الطائرة" بعد تعرضها لخلل فني: "بجد يا جماعة في لحظة الذعر الحقيقي الواحد يقرأ قرآن ويتشاهد ويسلم أمره لله بس باب الطيارة لما اتفتح أنا دمي نشف بأمانة واللي طلع عليه sit down، رامز ضحك عليّ بس بصراحة عنده قدرة على التنكر وسرعة بديهة ما شاء الله، حبك الموضوع في الطيارة سألت مين الراجل ده قالوا مستثمر، استغربت شوية". واختتمت "سرحان" تغريداتها: "مسامحاك يا رامز، ماشي أنا كنت عايزة أعاقبك عقاب الأمهات المصرية زي ما مشاهد وصف رد فعلي التلقائي (الشبشب) بس صعبت عليّ أنت الابن الشقي دمك شربات، الحق مع كل شقاوة رامز هو مشاغب يحمل لنا الضحكة والابتسامة ويسرق معنا لحظات فرحة مرحة وعنده قدرة على الابتكار والتنكر والتجديد معجون بخفة دم مصرية".
