عقد مجلس برلمان المصطبة جلسته الأسبوعية لمناقشة موضوع مطروح على الساحة الإعلامية. الرئيس: حضرات الأعضاء تابعتم موضوع مهم مطروح على الساحة الاعلامية في القنوات الفضائية ملك رجال الأعمال وفي الصحف الخاصة ومتطرق لقضايا دينية ومطلوب رأيكم. العضو الفلفوس: هذا الموضوع شائك والكلام فيه لازم يكون موزون وبحساب ويكون كلام متخصصين أما ما نسمعه ونشاهده فهو إما إشغال الناس بحاجات لا لزوم لها أو شوشرة على حاجات تانية. العضو النمرود: أنا شايف إن الكلام في موضوع من غير متخصصين فهو مقصود وبدل ما يتكلموا في موضيع اصلاح البلد يقوموا يشوشروا كأن الحكومة مش يهمها غير قلع الحجاب وكشف الرأس وعمل تظاهرات ضد الحجاب وأنا شيف إن ده مقصود. العضو زعيط: أنا مش عارف تعبانين ليه من واحدة مغطية شعرها طيب مايشوفوا قضايا الحياة من لقمة العيش للعلاج للسكن للمواصلات بدل الكلام في حاجة من شاء فليغطي رأسه ومن شاء فليغطي رأسه ومن شاء فليكشفها وكل واحد حر في نفسه. العضو بهلول: والله الجماعة اللي بتتكلم في الحاجات دي عاوزين يشغلوا الناس عن السعي لإنجاح البلد في المشاريع اللي بتعملها الحكومة اللي حاتخلق دولة جديدة وأنا شايف إن أصحاب القنوات دي مش مستريحين من النهضة الجبارة اللي بتحصل في البلد. العضو النمرود: دول ناس شايفين رئيس الدولة كل شهر بيزور بلد أجنبي علشان مشروعات تنقل الدولة لدولة جديدة خالص ومع ذلك يناقشوا الطرحة وشعر الرأس للستات مكشوف أو غير مكشوف أحسن. العضو معيط: يا عم الحكاية بقت سداح مداح شوفوا اعلانات التليفزيونات واللي فيها من عريانين خالص وشوفوا مسلسلاتنا واللي فيها من قلة أدب وكلام على المكشوف مع الحركات وشوفوا الحوارات اللي تبعدنا عن حياتنا وغيره وغيره كأننا مش في بلد عربي مسلمين ونصارى وربنا يحفظ أولادنا من الأرياف والمراكز. العضو نطاط الحيط: آخر الكلام فيه ناس بيعملوا حزب علماني في بلد كرمها الله في عهد موسى اليهودي وعيسى النصراني ومحمد خاتم الأنبياء أبو المسلمين وبعد ده كله يقولوا حزب علماني يبقى ده معناته إيه الحدق يفهم. الفلاح الفصيح