استأنف مجلس برلمان المصطبة جلساته في مضيفة الحاج عادل عبيد بوادى النطرون وكل الحاضرين ناس بسطاء يعملون في الزراعة بأيديهم وكلامهم نابع من القلب من غير تزويق ولا فلسفة. الفلاح الفصيح: حضرات الأصدقاء أنا عاوز أعرف وجهة نظركم في اللي بيحصل في البلد اليومين دول. العضو الفلفوس: والله يا أستاذ اللي بيحصل كله كلام في كلام ولغاية دلوقتى مفيش حاجة علي الطبيعة وخلاص عودونا علي الوعود وخلاص وده اللي بنشوفه. العضو زعيط: ليه الفلافيس بتوع التليفزيون ما يروحوش على أرض الواقع ويشرحوا للغلابة المشاريع اللي بتعملها الدولة. العضو معيط: أنا عاوز واحد يطلع ويقول لنا فيه كام محطة تليفزيونية في مصر وكام بتصرف في السنة وإيه الفايدة اللي إحنا بنشوفها إحنا الكادحين الغلابة. العضو نطاط الحيط: يا جماعة المحطات دى فوق مستواكم ولها أغراض تانية لأنها تدافع عن مصالح أصحابها ومفيش مانع في السكة يعملوا حاجة تفرحكم. العضو النمرود: طيب حسب كلامك كده يا فالح لغاية فين حايفضلوا يطلبوا ويزمروا ويدافعوا عن مصالحهم. العضو الغلبان: والله الرئيس والحكومة فى وادى والجماعة دول فى وادى تانى والراجل وحكومته دايماً يقولوا ويعملوا كل حاجة حلوة بس يا خسارة مفيش حواليهم غير الشعب الطيب. العضو بهلول: خلاص القطر قام من محطته ومفيش حد يقدر يقف قدامه لأن سواقين القطر هم أبناء الشعب اللي زينا وإحنا الأغلبية وعارفين إن القطر له مشاريع في كل محطة يعني محافظة فلازم ولابد إننا نستمر في حماية القطر لغاية ما يوصل المحطة الأخيرة وهى «عمار مصر». الرئيس: نشكركم علي مجلسكم ونتمنى لكم التوفيق. الفلاح الفصيح