بعد صدور حكم البراءة علي الطاغوت راعي الفساد ومدمر الحياة السياسية في مصر.. وهو عنوان عريض للفساد في الأرض. ناس قالت يا وكستنا.. وناس تانية قالت هيلا هيلا يا فرحتنا. اللي اتوكسوا منهم نوعين أهل الشهدا.. والنوع الثاني المصريين الغلابة والجعانين كلهم ما عدا النخبة وطاجن الحكم. نيجي لأهل الشهدا حيث تجددت الجراح لتنزف مرة ثانية واندفعت الدموع من العيون علي كل اللي راحوا فطيس.. وغرقت المخدات والملايات بدموع الأرامل والثكالي في لون دم الشهيد. العيال مسكت صورة أبوهم وإلا إخواتهم وهات يا عياط وصويت زي أمهم وجدتهم ما بتعيط وبتصوت علي خيبتهم وحظهم الموكوس وإهمال الحكومة السنية وعدم رعايتها وكذلك غياب الأب أو الزوج أو الابن والجوع وضيق ذات اليد وشماتة الإخوان المجرمين في السيسي. أصل الحكومة كل واحد فينا بيقبض الحد الأقصي وطظ في ولاد الشهدا وبتوع المعاشات اللي بيشحتوا.. وطظ في الشعب كله.. أولاد الجارية السودة.. أصل الحمد لله حكومة محلب بتجري في الشوارع تبحث عن العدالة الاجتماعية.. ونتيجة تكدس الزبالة.. وزحمة المرور وتعدد موتوسيكلات البلطجية مش لاقيين لا عدالة ولا زفت. أما المصريين الغلابة والجعانين.. والله مميزين من خلقتهم تجدهم مكشرين وفاتحين بقهم من العطش والجوع.. مطحونين وموكوسين تجدهم تايهين في الأسعار المولعة نار ومش عارفين يشتروا طبخة علي بعضها ولا حتي زجاجة بيبسي. رئيس الحكومة السنية صريح جداً وصادق.. أي والله.. فقال: «إن وزارة الزراعة الفساد فيها للركب».. بيقلد حارس ونوبتجي الفساد زكريا عزمي اللي قاعد في بيتهم بيصرف في اللي سرقه.. والنبي صادق وصريح.. يا حلاوة يا ولاد.. وهل باقي الوزارات ممتازة جداً؟.. يا راجل ده الفساد فيها غطس العيون. والله العظيم عندك حق.. فأنت خبرة من لجنة السياسات.. أنت راجل جدع ومهاراتك لا تصلح إلا في الإشراف علي بناء فيلات وقصور أهل النخبة والفاسدين.. أصدقاء المبارك البرىء.. الجرىء الذي مازال يحكم مصر مع حبايبه حتي الآن من تحت الترابيزة.. وهأ هأ سلملي علي المترو. رئيس الحكومة السنية عنده وزراء مطلعين عين أبوالشعب التعبان.. ولا بيعملوا حاجة في حاجة.. مثلاً بتاع التعليم خارب التعليم وسنينه.. هل تصليح سقف ولا بوابة عايز دولارات وميزانيات؟.. العيل اللي بيموت من وقوع السور أو تفتح راسه من وقوع الباب الحديد عليها.. أو يتكعبل في بلاعة مفتوحة ويروح في الوبا والمجاري.. وسيادته نايم في العسل نوم.. المديرين والمدرسين كلهم في الباي باي.. المهم لحاليح الدروس الخصوصية.. يا معالي وزير «التكية والتأليب» شوفوا الفرق أيام طه حسين كان اسمه وزير «التربية والتعليم».. الله يرحمك يا طه حسين. والوزير التاني بتاع الصحة ولا مؤاخذة، شغال سفر علي ودنه ولسه راجع من الهند.. كان بيزور مزارع جوز الهند.. عمل اتفاق هايل لاسترداد حاوية كبيرة من زيت جوز الهند للحقن في الوريد ليموت الشعب المصري ويرتاح.. كل ده وسايب المستشفيات خربانة والقطط والعرس والفئران في كل مكان، أما الصراصير فحدث ولا حرج.. مزارع مزارع يا رموش العين.. من غرفة المطبخ حتي العناية المركزة بالقشطة والعسل.. واللي قاعد علي بابها بيقول إخصائي تخدير.. نازل حقن جرعات زيادة في المريض.. وبعدها يكفن ويصرح بالدفن عدل. لا تلاقي حتة قطن وإلا رباط شاش.. تجد ممرضات «نص كم» قاعدين يقشروا الخضار و2 كيلو بلطي.. والصغيرين شوية عمالين يدوروا علي عريس لقطة يلمهم.. والدكاترة حدث ولا حرج كلهم امتياز مع مرتبة الشرف السفلي بيتعلموا في العيانين.. أما الدكاترة القدامي تايهين في جمع الفلوس من عياداتهم الخاصة اللي شغالة 24 ساعة علي ودنه، والشعب الغلبان غرقان في السرطان والفشل الكلوي وفيروس c.. منك لله يا وزير الصحة.. لما أنزل أدور علي دوا الضغط.. مش عارف بقي بكام! جرعة النهاردة أنا حاسس إنها دوختكم ورفعت لكم السكر والضغط، حنكمل المرة الجاية باقي مصايب وزراء الحكومة السنية.. أصلي شايف محلب بيجري في الشارع عايز يلحق الشركة إياها قبل الموظفين ما تزوع. الحكم ده فكرني بفيلم «الزوجة الثانية» لصلاح أبوسيف.. لما البارودي العظيم قالهم «أنتوا زعلانين ليه.. المأذون بتاعنا وورق الدفتر بتاعنا والورق إياه ورقنا».. وسلملي علي شموخ.. هيه هيه هيه.. ونزاهة الهوليلا اللي فيها مصر. المنسق العام لحزب الوفد