عدى النهار.. والليل وراه.. وخلصت فايزة أحمد قولها عن ست الحبايب. بياعين الهدايا قفلوا وروحوا.. وبتوع الورد والفل رشوا الميه وطفوا النور.. والشارع بقى كحل.. بقالهم أسبوع وليلتين عمل من غير نوم.. أصل المحلات في مصر للأسف سهرانة صباحي من غير داع. خلاص.. خلاويص.. اليوم خلص.. اتلمت الزينات.. وقبض الساحر.. ونام الأراجوز.. وشالوا صندوق الدنيا.. الكل روح.. وبتاع التاتو ضحك على العيال.. وصوت وابور النور اختفى.. وقفلوا الديجيهات.. وخلص الرقص والفوريهات. وزعوا كل الورد.. وشربوا الكانز.. وكلوا كل الجاتوهات واتخطفت التورتات.. وقبضت العمال وجرشت العربيات وكل الموتوسيكلات. ياروحي.. نامت الأطفال.. كل طفل في حضن أمه.. يا نني عين أمك.. بعدما إداها هديتها اللي دفع ثمنها أبوه غصب عنه.. أبوه الغلبان من غير ما حد يقوله كل سنة وأنت طيب يا شقيان ما هو عيد الأم وياريته عيد الأسرة كمان. استر يا رب.. كل أم زانقة جوزها تعاتبه بحنية على هدايا الأولاد اللي مش قوي.. ونص نص كده. بدأت أقلع هدومي.. رن التليفون الأرضي.. قلت آه!! حماتي «عدى الليلة على خير يارب». هو ده اللي قدر عليه جوزك المنيل.. يا بختك الأسود يا بنتي.. ستين نيلة على ذوقه اللي يلطش. وآدي حماتي كملت اليوم والليلة هتعدي نكد زي كل سنة.. خرج لينام في الصالة.. وقفت وقالت له إنت مزعل أمي ليه يا راجل؟!.. هيه أمك أحسن من أمي.. مستخسر فيها هدية كويسة؟ آه يا ستي.. ياروح قلبي.. والله أنا اتنيلت وجبت الهديتين زي بعض.. احنا مش اتفقنا على كده؟ الست أمك قارشة ملحتي.. وبتزعل قوي لو مانكدتش علينا كل ليلة.. أنا زهقت من كتر المناهدة يا حبيبتي. ابعد عني بقه!!.. يا حبيبتي.. يووه.. الله يسامحه اللي اخترع اليوم ده. لأ لأه ده مش من أعياد ربنا.. ما تعديش سنة الا لم يحصل نفس السيناريو الممل.. هو أنا حلاقيها من هدايا عيد الأم والا من فلوس الدروس المنيلة بنيلة. ربنا يسامحكم يا أولاد آمين. كان لازم يا علي انت ومصطفى من عيد الأم ده؟!! طول عمر الأم المصرية محترمة ومبجلة من غير عيد أم ومن غير هدية. الحب والتقدير مش بالأعياد والهدايا وشغل الحموات إياه.. الحب عطاء وتبادل من غير ماديات ومنظرة فاضية. موضوع عيد الأم ده أصبح رسمياً في العالم كله بعدما أقنعت «جوليا آن جارفيس» الرئيس الأمريكي ويلسون به وجعله عيداً رسمياً في البلاد والعالم كله قلده.. طبعاً أمريكا!! طالب على أمين في مقاله اليومي بتحديد يوم عيد الأم في مصر واختاره هو وأخوه مصطفى أمين توأمه أول يوم في الربيع 21 مارس من كل عام حيث تتفتح الزهور وتغرد الطيور. وكانت الواقعة.. مصر كلها بتحتفل بعيد الأم.. هوجة وحفلات وزهور وهدايا وملابسات. أطفال أيتام من الألم ما بتنام. عشوائيات مليانة أطفال صبيان وبنات عمرها ما حست الا بحنان الجوع والمطر ومجاري الأزقة. أمهات مطحونات.. غارمات ومعيلات.. أمهات يحتجن التكريم والقبلات لكن ظروفهن وظروف ولادهم تايهين صايعين ضايعين من غير لقمة عيش وإلا ورد وملبسات. الأم الواعية المربية الحقيقية بتكون شخصية ومدرسة وأعجوبة تربوية.. الأم اللي كلها محبة ومودة ورحمة وألفة تستاهل عيد أم لأنها بتربي وتعلم وتكبر وتترك للمجتمع ناس ترفع من شأنه مش يضربوه بالشماريخ والمولوتوف. الأم صفاء القلب ونقاء الروح وعماد البيت آية الله ورحمته.. الأم صفاء القلب ونقاء السريرة وولاء وحنان واحسان ونعم الجليس وخير الجليس. عيد أم حلو ومر.. أنا كهل وحضن أمي حكمت هانم والله حاسة ودموعها على كتفي وهي بتودعني.. والله بندم على كل يوم سافرت فيه وتركتها.. لو ترجع الأيام ما أغادر ولا أسافر بعيداً عنها حتى ولو يوم واحد دي كانت عتاد البيت وآية الله ورحمته. فجأة راحت وسافرت.. تهت وسط الزحام.. مش لاقي حضن الأمان.. حضن التضحية والزهد وانكار ذاتها.. ليه عشان رسالة؟!! عشان أم؟؟!.. عشان إيه؟!.. كبرنا واتربينا واحترقت مشاعر الأب وحوطت بولادها عليه.. كبرنا واتربينا وسهرت وصامت.. وبعدين رضا وسافرنا واتغربنا.. أخويا كان مغادر أمريكا.. دموعها لم تجف عليه طوال السنين.. وفجأة وسط خضم المشاعر فاتتنا وراحت.. رحلت.. ومازال صوتها بين جنبات ودهاليز البيت.. هي دي الحياة؟! لما راحت بصيت لقيت باقي الحنان قاعد على طرف الزمان بيعيد الذكريات والكلام والحكايات بيفكرني بالحضن بتاع زمان.. أصل الحنان دور داير عند بلبل.. بلبل وتغريدات بلبل على طول الزمان. عيدها هو عيد أمي.. مصبرني ومحيرني ومفكرني.. عايز حنانها اللي بيفكرني بحضن أمي والسنة ورا السنة والعمر شاب والأيام ولت ولسه حياتنا ينبوع حب نشأ أساسي من حضن وحنان. السنة الجاية بعون الله نحتفل مع طفل يتيم ولا ننساه في حوش ضيق طالع من حارة سد من ضاحية مهملة عايشها بسطاء.. أطفال صبيان وبنات يطلع قدامهم طفل يتيم بيدور علي حضن يلمه من غدر الأيام. ليس الحب أن تحب من تحب ولكن الحب أن تقدر حب وعطاء من تحب. دكتور وفيق الغيطاني المنسق العام لحزب الوفد