أحمد القزعة من جنان أمه حول دكان العلافة اللي ورثه عن المرحوم والده إلي »منقشة« ولما سألته - هتنقش إيه هنا يا قزعة ضحك بشدة وقال لي - اشحال لو ما كنتش كبيرنا اللي معلمنا البوظان ثم اردف - منقشة يا محترم يعني زي ما تقول كده مسرح المناقشات يعني اللي مزنوق في مناقشة يشرفنا بحضوره الي هذا المكان الديمقراطي لكافة الشعوب المقهورة أمثال مصر المحروسة قبل ثورة 25 يناير أو الشقيقه العزيزة تونس قبل هروب زين العابدين بن علي بعد قيام ثورة »البو عزيزي« التي سبقت الجميع واعلنت علي رؤوس الاشهاد بداية عصر الشعوب تحت شعار »الشعب يريد«. قلت له: ومين تاني؟ ما تكمل يا قزعة ضحك وقال لي - اقول ولا تزعلش؟ - قلت له - ازعل علي مين يا اهبل ضحك وقال لي - علي صاحبك »زنجة زنجة« قلت له - دا كان صاحبي مع الأسف وخلعته بعد ما ظهرت أنيابه السامة اللي غرزها في قلب ليبيا الطيبة اللي انخدعت فيه زي حالاتي - وحسبي الله ونعم الوكيل قال لي والملك الانتيكة تبع البحرين قلت له - ولا الشاويش علي عبدالله صالح اليمني قال لي - تصدق ان البلاد دي كلها بيحكمها عسكر! قلت له - وتفتكر دي صدفة يا قزعة! قال لي - يا راجل يا متعلم! وده كلام تقوله برضه! قلت له - بس احنا نسينا البحرين ودي حاكمها مش عسكري ضحك بشدة وقال لي - دا عسكري ابن عسكري من ساسه لرأسه واوعي تغرك الدشداشة والغطرة. وشال العمه دا كان مجرد شيخ قبيلة وطقت في دماغه يبقي ملك بقي ملك واللي تعرف أبويا يروح يقول له قلت له - طب امال ليه ملوك النفط في الخليج لحقوه بدرع الجزيرة قال لي - ما هم دول برضه مش ملوك دول حيا الله شوية قطاعين طريق رفعهم الاستعمار إلي سدة العروش علي شرط يحافظوا للخواجة علي كمية الدهب الاسود اللي بينهبوه من الارض العربية اللي ما لهاش صحاب كده يبقوا ملوك برضه؟ قلت له - لا يا قزعة لكن انا عندي سؤال قال - اتفضل اسأل قلت له - إذا كانوا شوية الزبالة دول بيخافوا علي بعض من غدر الشعوب ويبعتوا الجيوش المدججة بالسلاح لحماية أي خنزير منهم الشعب قلب عليه وعايز يشيله طب إحنا ليه يا قزعة ما بنعملش ذيهم قال لي - بالراحة علي وفهمني تاتا - تاتا قلت له - شيخ المنسر اللي اسمه القذافي بعت جاب مرتزقة عشان يخلصوه من الشعب الليبي وثورته العظيمة وليبيا لها حدود مشتركة مع كل من تونس ومصر ودول الشعبين اللي انجزوا ثورتهم.. ليه ما نمدش يد المساعدة لاشقائنا ثوار ليبيا قال لي - ياااااه وانت راجل قروب. ازاي الحكاية دي فاتت علينا كلنا! وهنا دخل الشيخ عبده وهو بيقول - صباح الثورة والنصر وحين رأي أحمد القزعة ضحك وقال - انت هنا يا فجري؟ فقال القزعة للشيخ عبده عسكرينا هرس عسكريكو يقدر عسكريكو يهرس عسكرينا زي عسكرينا ما هرس عسكريكو فقال الشيخ عبده - وايه اللي جاب السيرة العفشة دي دلوك علي الصبح؟ بنجول صباح النصر والثورة يا واكل أبوك
