- خبر إيه أمال ياعم احمد مش عم يجولوا كل شيء وله آخر! أمال إحنا آخرنا فين عاد هكذا قال عبده شمه فأجابه أحمد القزعة: - إنت حتكفر ولا إيه يا غيبوبة؟ ما تصلي ع النبي أمال فأكمل عبده شمه - اللهم صلي عليك يا نبي فقال أحمد القزعة: - حد له في نفسه حاجة يا جدع؟ فأجاب عبده شمه: - لا ما حدش يا جزعة أنا بس صعبانة عليّ أم فتحي جوي البت ياعم احمد ماداقتش الزاد من يومها قلت: - ربنا يصبرها يا حاج عبده فقال احمد القزعة: - ويصبر كل أهالي الشهدا وينتقم من اللي كان السبب فاغتصب عبده شمة ابتسامة واهية وقال: - ويا تري مين اللي كان السبب؟ مش ده برضه سؤال؟ قلت: - الله هو العالم وهو المنتقم الجبار فقال عبده شمه - ميتا ياعم احمد ميتا عاد فقال احمد القزعة: - اهو حيبتدي يهجص اهه.. يا جدع ربنا قبل مابينزل المصيبة بينزل الصبر وما تقوليش ميتا قلت: - مولانا الإمام الشافعي رضي الله عنه وأرضاه يقول: وكم من نازلة يضيق بها الفتي ذرعاً وعند الله منها المخرج فرجت وكنت أظنها لا تفرج فقال عبده شمه: - وإحنا نروح فين للناس دي ياعم احمد؟ قلت: - هم قدوتنا وأساتذتنا نحن بهم نقتدي يا حاج عبده أليس كذلك؟ فقال احمد القزعة - دا الحزن مخيم علي مصر كلها يا جدعان قلت: - حسبنا الله ونعم الوكيل.. ليس لنا إلا الله فقال عبده شمه: - ونعم بالله.. لكن هما ليه بيعملوا فينا كده! ليه بيكايدونا المفروض ان إحنا مش اعدائهم! قلت - المفروض دا مين اللي فرضه يا حاج عبده؟ فقال احمد القزعة: - الدين والوطن والإنسانية ولا دول كمان ضاعوا قلت - مافيش حاجة ضاعت يا قزعة وإلا ماكنش ربنا سبحانه وتعالي قال في كتابه العزيز «كل نفس بما كسبت رهينة» فقال عبده شمه - فيه كده يا جدعان! فيه ناس وضحة كد كدية قلت - انتو فاكرين فضيحة مباراة مصر والجزائر؟ فقال احمد القزعة - أيوة صحيح يابن الإيه ياعم احمد تصدق يا غيبوبة ان احنا ماكناش واخدين بالنا من الحكاية دي فقال عبده شمه: - كيف يا جدعان اذا كان الفاعل محبوس قلت: - دا احنا اللي محبوسين يا حاج عبده لكن كل حبسة ولها آخر.
