نشر حزب الدستور، أمس السبت، رسالة من حمدي قشطة، عضو الحزب المحبوس على ذمة قضية التحريض على التظاهر في 25 إبريل، ضد اتفاقية ترسيم الحدود بين مصر والسعودية، أعلن فيها اضرابه عن الطعام منذ الخميس 21 يوليو الماضي، مطالبًا بالافراج عنه لأن جريمته الدفاع عن الأرض. وأوضح "قشطة"، فى رسالته أن مكانه ليس بالسجن لأنه مصري يُدفع عن أرضه، وأن محكمة مجلس الدولة حكمت بمصرية جزيرتي "تيران وصنافير" ولا يجوز التفريط فيهم.
وأضاف عضو الحزب المحبوس، أن "رغم كل ما حدث تم الحكم عليا ب 3 سنين و مائة ألف جنيه"، موضحًا أنه "زمان قالو لنا أن الدفاع عن الأرض الوطن واجب وشرف، وأيضًا قالولنا دلوقتي أن الحرية موجودة ومكفولة في الدستور، ورغم كدة لما بنعتمد على وجودك بيحبسونا".
ونصت رسالة عضو حزب الدستور.. بسم الله الرحمن الرحيم
من أجل حريتي
واحشاني جدًا يا حريتي، وأعرف كويس أنه مينفعش تتقيدي أو مش أشوفك حتى لو كلفني موتي، إنتِ تستحقي ده، حرية الأرض.. الأرض تستحق ده، عدم التفريط في أرضنا يستحق ده.. سماع صوت عياطك وإنت لسه صغيرة يستحق ده، اتأكدي إني هوصلك وهعيشك وهحضنك، واعرفي إني رافض أتحبس واتحاكم في قضيتين بتهمة واحدة.
تهمتي إني رفضت بيع أرض البلد، وقولت أنهم مصريتين آه والله متستغربيش.. الأرض اللي استشهد فيها واتأسر جنود زيي وزيك يا حرية مصريين، وعايزك تكوني متأكدة تمامًا إنهم فعلاً مصرييتين دم الجنود اللي استشهدوا فيها هو اللًي قال قبل ما يقول الورق والتاريخ والمواثيق والاتفاقيات.
وبعد كدة حكم محكمة أكد إنهم مصريتين ولا يجوز التفريط فيهما، ورغم كل ده أتحكم عليا ب3 سنين و مائة ألف جنيه.. يا حرية أصلاً قالولنا زمان أن الدفاع عن أرض الوطن واجب وشرف، وقالولنا دلوقتي إنك موجودة ومكفولة في الدستور، ورغم كده لما بنعتمد على وجودك بيحبسونا.
وخلي بالك يا حرية معنديش غير السلمية طريق ليكِ، وخلي بالك يا حرية السلمية طريقك و مبدأك ويهون أي شيء في سبيل إني أعيشك و أحضنك.
بصي أنا قررت واضربت عن الطعام من الخميس 21/7/2016 الساعة 12 منتصف الليل يا إما أموت أو أعيش بيكي وليكي.. أنا مصري بدافع عن أرضي، مكاني مش السجن .. أنا مضرب من أجل حريته أولاً وأخيراً موكا.
حمدي قشطة.. الخميس 21/7/2016".
وكانت محكمة جنح بولاق الدكرور، حكمت على 10 من متظاهري 25 إبريل، بينهم حمدي قشطة، بالسجن 3 سنوات مع الشغل، وغرامة 100 ألف جنيه، بتهم إشاعة أخبار كاذبة والتحريض على التظاهر، في القضية 11646، جنح بولاق الدكرور.
وضمت قائمة المحكوم عليهم، ميريت عبد المولى، وسامح سيد، ومحمد عبد الستار، ومحمود حنفي، ومحمد سعيد، وصبحي محمد، وعمر إبراهيم، وزكي رضا، وحمدي كمال، وسعيد رجب.
وكانت المحكمة، قررت في وقت سابق إخلاء سبيل المتهمين في القضية، بكفالة مالية 1000 جنية، عدا حمدى كمال الشهير بحمدي قشطة كونه مطلوبًا على ذمة قضية أخرى.
ويذكر أن حمدي قشطة متهمًا على ذمة قضية آخرى، وهي القضية رقم 58 لسنة 2016 حصر حوادث جنوبالجيزة، متهم فيها مع 8 آخرين بالانضمام لجماعة إرهابية تهدف للتحريض ضد نظام الحكم، وإشاعة أخبار كاذبة من شأنها تكدير السلم والأمن العام، والتحريض على التظاهر ضد مؤسسات الدولة، في 25 إبريل، بعد القبض عليه خلال تظاهرة في منطقة بولاق الدكرور في 25 إبريل.
