سبح بحمد الثورة وقول شكراً يا شباب مصر الحر مش هستني هنا على طول اصل حياتي كلها مُر كنا زمان بنسبح واحد ظالم طاغي وكان فرعون كان بيعذب أتخن واحد شاري وبايع مهما يكون كنا في عهده بنشكى بطاله وأزمة سكر , رز وعيش وكنا بنقرا في كل مقالة اسمه منور, تقولش أفيش كنا بنشكي زمان م الواسطة وفلان يدخل وعلان يخرج وفلان ياكل وحده البسطة وعلان يبقى في موقف محرج كنا بنشكي كتير م الرشوة وتقول أصلي وهو فشنك اللى بقرية واللى بعشوة واللى بفتح حساب في البنك كانت كل مشاكل الناس مواصلة بسيطة وطريق رايق كنت بحس إنها ألماس واحنا بتناكتنا بنتعايق كنا بنشكي ونشكي ونشكي وإحنا نصرخ مين يسمعنا؟ كان بيسيبنا نهري ونحكي كأنه ملاك وإحنا فراعنه كنا بنشكي من التوريث ورجال سلطة تعلي الضغط ماهو لو نرجع للتأسيس الشفاط عايش ع الشفط كنا بنشكى لاء ومازالنا قاعدين نشكي من المأساة لحد ما خرجوا شباب الثورة قلنا عليهم ما شاء الله في اللى استشهد ومنهم حى والأتنين في الحلم اتقابلوا خلى الرايح قبل الجي يعرف ان الظلمة اتغلبوا ظلمة وكانوا فوق انفاسنا وكان الظالم هو الأمن لو نتكلم راح يحبسنا ويحول لك فرحك هم لكن آه .. وآه من لكن فجأة الحلم اتحول غُلب لسه الظلم معشش ساكن طلعوا ولاده , أه م الصلب ماهو بالعقل إزاي هتقول إن فراعنة يعرفوا صلح؟ لو بالمنطق مش معقول إنك تدخل بيت م السطح قائد أعلى وكان للجيش رمز سلام , عدل و حرية باعوا الملح قبل العيش وحطوه تحت إقامة جبرية مش هنساعدك وإنزل دور وانت يا قلب إنسى حبايبك كرسي السلطة لما ينور خلا قطز يطعن لك أيبك بس نهاية القصة يا ناس وياريت نتعلم من الدرس يشرب كده من نفس الكأس ويكون موته على إيد بيبرس أصل المُلك العدل أساسه حكمة وعَّرفناها للكل اللي يجَّوع شعبه و ناسه يشرب لكيعانه من الذل واللي يفرق ناس بتصلي وبتسجد بخشوع على أرضه قادر ربك انه يخلي مقامه قليل و يكشف عرضه بعد ما كان عايش في النعمه عايش متهني وكسبان مش بتفارق عينه الدمعه بقى منبوذ من ورا قضبان آدي رجال السلطة في عهد ولى وكان م الماضي خلاص