أثناء وقوف حبيب العادلي و6 من مساعديه في قفص الاتهام بقاعة المحاضرات بأكاديمية الشرطة صباح أمس الخميس، أمام المستشار أحمد رفعت، رئيس محكمة جنايات القاهرة للمرة الثانية، الذي قام بفض الأحراز ومواجهة المتهمين بالتهم الموجهة إليهم ، تابع المصريون المحاكمة وانهالت تعليقاتهم على مواقع التواصل الاجتماعى وخصوصا موقع تويتر الذى كتبوا عليه تعليقاتهم على كل تفصيلة تحدث خلال جلسات المحاكمة التى اعتبروها بمثابة مهزلة ومسرحية سخيفة مشككين فى جديتها. انتقد المصريون عبر تعليقاتهم ما اعتبروه فوضوية اتسمت بها المحاكمة سواء فى تنظيم الإجراءات أو تنظيم الأدوار المتعلقة بمحامى المتهمين ومحامى الحق المدنى الذين انتقدوا أداءهم بشده واتهموهم بالبحث عن الشهرة والأضواء دون الالتفات لحقوق من يمثلونهم تماما، كما حدث فى جلسة محاكمة الرئيس المخلوع مبارك أول أمس الأربعاء كما انتقدوا تدافعهم للحديث وعدم اتحادهم على موقف واحد دفاعى موحد من حيث المبدأ، متسائلين عن سبب غياب أسماء شهيرة يشهد لها بالنزاهة عن فريق الدفاع عن الشهداء والمصابين . أدان المصريون غياب أهالى المجنى عليهم من الشهداء والمصابين ومنع معظمهم من الدخول كما تردد خلال الجلسة ولفت مشهد فض الأحراز الخاصة بالقضية انتباههم، حيث قللوا من أهميتها واعتبروها غير جادة لا تفى لإدانة العادلى ومساعديه منتقدين وضعها فى كراتين مياة معدنية وعدم توافر أداة مناسبة لفضها، مما ساهم بإخراج المحاكمة بمظهر غير حضارى معتبرين أن تعددها بهذا الشكل وعدم جديتها يهدف إلى إطالة مدة المحاكمة، بينما هم فى حاجة إلى عدالة ناجزة وليست عدالة يستغرق تحقيقها سنوات ؛ فاندفعت تعليقاتهم الساخرة التى انتقدوا من خلالها وقائع الجلسة بشكل عام والأحراز وآلية فضها بشكل خاص، ومن أمثلة تلك التعليقات: - الدنيا حرز أوي النهاردة - إيه هبل الأحراز ده ..ده أنا عندي في البيت أحراز أكتر من كده - حَرزني نضيييف أحَرزك نضيييف - الواد دا حرز سابق سنه - القاضي :كلمة السر :أروح أدور ..أروح أدور.أروح أدور ...المحامي :علي حرزي - كوكا زيرو يعني تبقا في محكمة وأدام القاضي وتفتح الحرز بمطواه قرن غزال..القضاء المصري ...ام الأجنبي - حبيب إبراهيم العادلي....خليك في حرزك - أدى اللى اخدناه من الثورة .. شوية أحراز - هى محاكمات بعد الثورة إيه غير شوية أحراز فشنك فوق بعض - عزيزى القاضي.. احترس ، الحرز به سمّ قاتل - أحراز قضية العادلى اتحرزت فى قضية العادلى ...مع تحيات حمادة هلال - اللى انهارده شيرز بكرة يبقى حرز - أنا حَرَزّت واتحرّزت - الحرز الحق هو من يُحَرَز في كرتونة مياة معدنية داخل المحكمة ثم يُفتح بمطواه قرن غزال قدام القاضي والعالم كله - آمال فين حرز القنابل المسيلة وفوارغ الرصاص..؟؟؟؟؟؟؟؟تزوير من أولها - ساعة الحرز متتعوضش - من عجائب الجلسة أن أحد الأحراز بوكسر مثقوب لواحد من المجنى عليهم والقاضي قالها كدة عيني عينك فمتتفرجش وانت متوضي.. - البوكسرات وصلت للمحاكمات يا جدعان إيه الأحراز العجب دى أنا حاسس إنى بتفرج على مسلسل كوميدى مش محاكمة اللى قتلوا الشهدا بعد الثورة - العادلى : أنا حرزي ف الدنيا كده - إلي ربات البيوت....مترموش كراتين المياه المعدنية بنحتاجها بعد كدة في الأحراز - بعد المحاكمة دى أحب اسمع أغنية : بالأحراز بالأحراز بالأحراز. بالأحراز يابلدنا ياحلوة.. بالأحرااااااز - مش قادرة أصدق إن صناديق الأحراز في محاكمة العادلي النهاردة هي كاراتين من عند البقال! يادي الكسوف - كل المحاكمات علنية إلا في مصر فوضوية - الاختلاف في الحرز لا يفسد للمتهم قضية - لا و الأحراز جوه كراتين ميه و المخابرات لسه بتسجل علي شرايط و بيفتح الحرز بولاعو و مطواه و حاجه عنب - قضية العادلي كلها مفيهاش إلا الكام حرز دول ؟ إمال مستندات أمن الدولة والأرواب و و و و راحو فين .. - فضحتونا الله يفضحكم أصحابي في أوروبا والدول المتقدمة أترجملهم حرز ولا كرتونة إزاي أنا دلوقت - هو لما عبد الحميد ملقاش الكاتر، قلب مطوة من حرز تاني ولا إيه!!؟؟ - أهو حرز دفاتر السلاح دة مش هنلاقى فيه اى حاجة .. اصلا الدفاتر دى مش متأيد فيها حاجة مفيدة عشان يبوظوا الموضوع - أنا اول مرة أشوف شكل الأحراز فى القضية بتاعة النهارده، أحراز بالأهمية ديه متشالة فى كراتين مياه معدنية؟؟ ايه الفضيحة ديه؟ - مصر مبارك : نيابة تعبأ أحراز في كراتين مياه.. المخابرات مازالت تعمل بشرائط الفيديو كاسيت.. المحكمة تفض الاحراز بمطواة قرن غزال - الشعب ماسك أحراز أسلحة على الشرطة .. شعب فكاهي و ربنا - عاجل: المحكمه تستخدم مطواه قرن غزال وولاعه صيني ب جنيه واحد وربع لاغير في فض احراز قضيه بغيض العادلي - على فكره يعنى مش كل يوم هسيب شغلى واقعد اتفرج على فض أحراز وطلبات الدفاع..عاوز أسمع استجواب العادلى من القاضى..هو ده الأكشن - داساني ؟ مين صاحبها ؟ دعاية بمليون جنيه على الهواء ! أحراز مائية - جلسة أحراز وجلسة تفحيص وجلسة تفريغ !!!!!! قابلونى السنة الجاية - يا جماعة انتوا مش واخدين بالكوا الجلسة بتاعة امبارح دي كانت جلسة إجراءات, النهاردة بقى نسمع شهود و نفك احراز و كده - يعني هو القاضي مش عارف ان هيكون في احراز يعني متشمعه يعني لازم اداه يفتحوا بيها المفروض تكون متحضره! مش يطلب سكينة أو ولاعة - يا خوفي لا يكونو عايزين يعملوا كبش فدا و يطلعوا الباقي منها ربنا يستر - لقد وقعنا في الحرز - دى مش محكمة دى وكالة..كراتين مية..و المحامين اللى جاى يدعى ب10باكو فواحد يقول علية ب40 و محامية تقول للرجالة متزقوش عيب كدة - طب بالنسبة للاحراز دى كلها و لا عينات بس ؟؟؟ معلش عشان نعرف بس إحنا قدامنا كم سنة ونخلص - الشعب يريد مقص يفوكو بيه الأحراز بدل المطوة القرن - العادلي ال 12 سنة اللي عليه هايعدوا بسرعة و هايتسلى في المحاكمات..عقبال ما يفكوا الأحراز بتاعت القضايا - من لم يمت بالحرز مات بغيره تعددت الكراتين والحرز واحد - لكل المشككيين في آلية حفظ الأحراز وفضها نقول لكم إن شكاير البصل والكراتين وكياس الزبالة كلها صناعة مصرية 100% والله الموفق - المخابرات العامة مسجلة اللي حصل علي شرائط فيديو ...والمحكمة تفض الأحراز بمطواة قرن هو إحنا في سنة كام يا جدعان؟؟ - بقيت أتابع المحاكمات بدل المسلسلات ..محاكمات مصرىة ..أم المسلسلات - إيه الهبل اللى بيحصل ده هم فاكرين هيضحكوا علينا بالأحراز الفشنك دى ..أتاريه داخل بيضحك وواثق من نفسه إمبارح وقاعد النهاردة حاطط لنا رجل على رجل طبعا عارف إنه هيطلع منها ..يومهم اسود لو كانت تمثيلية - محامين بالحق المدنى مش واخدين حقهم فعلا .. بس اللى موجدين دول عار على القضية أصلا - هو ليه صحيح الخضيرى أو مكى أو البسطويسي غير موجودين فى جبهة الدفاع عن الشهداء , هما مش خبراء فى القانون برضه ؟؟ - عاوز أحراز بجد يا سيادة القاضي؟! إنزل كل شارع فى مصر هاتلاقى دم الشهدا عالأسفلت و فوارغ الرصاص على أسطح العمارات - لازم نتوقع انه لا قدر الله ممكن الناس دى متخدش الأحكام اللى متخيلنها..وساعتها لازم نحاكمهم سياسيا وبتهم الخيانة العظمى كمان.
