ياه كل ده جواكو لسه دا احنا كنا يئسنا منكو قلنا جيل خانع وضايع ياما قلنا وعدنا عنكو ياما قلنا بعتو مصر بكيس فشار مع صحن فول ياما قلنا سبتو مصر ياكلها غول والبطالة والندالة والتحرش والرزالة والقعاد ع النت والفيس بوك وتشيت وتلغي في العقول فجأة يا ولاد الفراعنة قام تحتمس شد عبدالله وبطرس للميدان والهتاف هادر بيعلا من حناجر ست جميانة وجيهان والعيون فيها العزيمة والقلوب شايلة الكرامة والتحضر والإيمان يحرس القبطي صلاة المسلمين ويؤدي قداسه ف أماني تكتبوا تاريخ بلدكم من جديد عادة المصري بطول الدهر وف كل العهود لما يطغي الظلم ويعشش غراب الشؤم فوق كل الحيطان كل ده جواكو كان كام شهيدة وكام شهيد دمهم سجل لمصر تاريخ مجيد شعر مريم توفيق
